Salmos 11 - A Txꞌan Biblia Yin Kꞌanjobal 1989

SALMO 11 A Cham Yajaw yipc'ulej toni

A ton bit David ti'

¹ A yin Cham Jehová chin say in colbalba. Nabaxac'al che yal ayin: Asi', c'ubaj el a ba bay witzlak axca no tz'iquin.

² Ila wal eb nak yobtakwom, chi yaoc eb julbal yin tx'an julbalej, caw t'ininak chi yut eb, axa bay ewantak chi julwajtok eb yin eb anima watx'.

³ Ta a eb ikbajwom chi etaxtok, ¿tzetto wal ok yut ba mac watx' beybal? quex chi ayin.

⁴ Palta ayic' Cham Jehová bay is templo, tol asannej Cham ay yet. A bay satcan tu', a tu' ay is trono Cham, cax chi camc'ul yiloni, chi beyc'ulnen beybal eb anima.

⁵ A Cham chi beyc'ulnen eb anima watx', c'al eb yob, caw wal chi yajil Cham eb anima chi beybalnejc'al yaxc'aynakilal.

⁶ A Cham ok yatok k'ak'ej, axca yax nab yiban eb yobtakwom, c'al azufre ayoc k'ak'al. Ok yatok jun miman cak'ek' yet chi takcan el masanil. A Cham ok paktzen bay eb, atac'ala' yunben eb.

⁷ A Jehová tojol toni, chi cam c'ul yin masanil pojanil tojolal. Tix wal yuj tu xin, xan a eb anima tojol is beybal, ok yil eb yin Cham.