Salmos 108 - A Txꞌan Biblia Yin Kꞌanjobal 1989

SALMO 108 Chi k'anlay colwal Dios yin eb ajc'ul

A ton bit David ti'

¹ Ach in Diosal, caw bekan in c'ul chach in bitnej yetok in son ti', c'al yetok wanimail.

² A yet puch k'inibalil, ok in txal warpa, c'al in salterio.

³ Ok ach in bitnej yin bital Mamin Jehová, bay nan xol conoblak, c'al nacionlak.

⁴ A wal a camc'ulal, yelxac'al miman yintak satcan. C'am chi q'uexlabi tzet chala', lajan yak'on yetok satcan.

⁵ ¡Ach in Diosal, txeclojokab a mimanbilal bay satcan! ¡Txeclojokab a mayk'ak'al bay masanil tx'otx' tx'otx' ti'!

⁶ Colon el yuj epalil. Tak'wej on yet watx' chon colchaj ayon camc'ulnebil on oj ti'.

⁷ Max k'anjab Dios tac'al bay is templo: Ok tzaloj aj in c'ul yet ok in coc'pojnen Siquem, c'al yac'alil Sucot.

⁸ Axa Galaad c'al Manasés in satak yayji ocok. Axa Efraín axca in ch'en toctor yayji, axa Judá axca varail wikbej.

⁹ Axa Moab axca palangana yet in tx'aj k'ab. Axa yiban Edom ok wacantok in xanab. Yin tzalojc'ulalil ok in awjok, yuj ok ayc'ay eb filisteo wuj, ẍi Cham.

¹⁰ ¿Mac chin iontok bay conob ayoc murallail yinlak? ¿Mac chin iontok bay Edom?

¹¹ Ilab xin, max con entaknej el ach Dios. Tok chito je' a c'ul chach toj yetok eb co soldado on.

¹² Ocan jetok xin, colon el bay eb ajc'ul oc jin. Tokwal ay yelapnok colwal eb jet animail ayon.

¹³ A yetok colwal Dios ok jak' ayc'ay owal. A Dios ok tec'on ay eb ajc'ul oc jin.