Salmos 101 - A Txꞌan Biblia Yin Kꞌanjobal 1989SALMO 101 A is ti' cham rey bay Dios A ton bit David ti' 1 Chin bitni yuj a camc'ulal c'al yuj a tojolal. Ach Jehová, chach in bitnej. 2 Chi yochej in c'ul chin beybalnej tojolal. ¿Bak'in ok ach jay ayin? C'am jabok yob ok al-lay yin in beybal, tamwal bay watut, c'am tzet yetal. 3 C'am bak'in ok in tok t'anan yin yob nabalej. C'am chi wochej eb yob yak'on yetok Dios. C'am bak'in tol ok in cha' jay eb in c'atan. 4 Najattac'al ok wacantok eb yob is nabal, c'am chi yal in c'ul chin oc yetok yobtakil. 5 Ok wak' tz'injok juntzan eb chi yal k'umal is vecino yin ewantakil. Man ok techaj wuj mac chi mimanej ba. 6 Ok wil mactxel eb ikem cajan ec' bay tx'otx' tx'otx' ti', yet watx' chi cajay eb wetok. Asan eb watx' beybal ok oc in chekbejok. 7 Maj je' yayji eb etnem anima bay in despacho, maj je' yayji ec' junok naom aj k'anej in satak. 8 Junjunc'al c'u ok wak' c'aycan el eb yobtakwom cajan sat co tx'otx' ti', ok wak' lajwok el masanil eb unem yobtakil yul a conob, Mamin Jehová. |
Kanjobal (Q’anjob’al) © Sociedad Bíblica de Guatemala 1989
Bible Society in Guatemala