Rt 2 - A Txꞌan Biblia Yin Kꞌanjobal 1989

Max betic' Rut xol yawoj cham Booz

¹ Ay jun winak ayto yuj ba yetok cham camom yetbi xal Noemí. A jun winak tu' chi yik Booz, caw wal beyom winak, cax mimanbil bay Belén tu'.

² Ay jun c'ual max yal ix Rut bay xal Noemí axca ti': —Mata chin a chatok toj wila' ta ay bay lanan jolay ixim cebada, talaj chi cha c'ul eb aj awoj tu' chin jotx'nej jayebok yakan jet, ẍi ix. —Asi'naj xin, ẍi xal Noemí.

³ Cax max toj ix Rut bay lanan jolay ixim cebada, max ec' jotx'lok yintak eb chi jowi cebada tu'. C'uxanc'al tol yet cham Booz jun awoj bay max apni oc tu', a ton jun ayto yuj ba yetok cham camom Elimelec.

⁴ Lanan sic'on aj ix Rut ixim chito cancan yuj eb joom cebada tu', cax max apni oc cham Booz, petoj bay conob, max yalon bay eb mulnajwom: —Ayokab oc Jehová e yetok, ẍi. —Yak'okab Jehová watx'c'ulalil ayach, ẍi eb is mulnajwom tu' bay.

⁵ Ayman max k'anlej cham Booz tu' bay is caporal: —¿Mactxel ay yet jun ix k'opoj tu'? ẍi.

⁶ Max tak'wi is caporal tu': —Axtol a ix aj Moab max jay yetok xal Noemí.

⁷ Max k'an ix ayin tol chi ec' ix jotx'lok yintak eb mulnajwom ti'. Yettaxc'al k'inibalil max jay ix, c'amc'al chi bek ix sic'on ixim chi can yuj eb mulnajwom ti', ato wal jay ix xew junok bek bay ay yenel ti', ẍi jun caporal tu'.

⁸ Max lajwi tu', max yalon cham Booz bay ix Rut axca ti': —Txo ix, ab tzet chi wala': C'amxa chach toj jotx'lok cebada bay junokxa, palta canancan yetok eb ix in chekbej ti'.

⁹ A yetok eb ix ok ach tok bay chi jowi cebada eb in mulnajwom. Mayal wal bay eb tol c'am chach tx'em eb. Yet ta ay a takintial, chi je' eon eltek aej oc' bay yul moc bay chi yieltek eb mulnajwom yet, ẍi cham bay ix.

¹⁰ A yet max yaben ix axca tu', cax max ay nojan ix sat tx'otx', max yalon ix bay cham axca ti': —¿Tzet yuj xan chach oc t'anan win, c'al watx' chot a c'ul win? Ti pax wal tx'ok conobal in, ẍi ix.

¹¹ Max tak'wi cham Booz axca ti': —Yujtol max wabej, tolab xajanc'al max el xal alib yettax max cam echamil, cax tol wojtakxa tolab max a bekcan a mam c'al a txutx c'al a conob, max ach tzakloj yintak xal Noemí, c'al a cajay co xol ti', ti pax wal man ojtakbilok on oj.

¹² Paktzejokab Jehová co Diosal ayon Israel on ti', masanil watx'c'ulalil ayach, ak'layokab paktzil a watx'c'ulal yuj Cham bay max ach jay a sayon a colbalba, ẍi cham Booz.

¹³ Max tak'wi ix bay axca ti': —Caw wal watx' a c'ul win mamin, caw wal miman chi tzalojbi aj in c'ul yuj tzet chal ayin ti', caxc'al man lajanok in yetok junok eb ix a chekbej ti', ẍi ix Rut.

¹⁴ A yet max apni oc yorail yoc loj, max awtelay ix low yuj cham, max yalon axca ti': —Sebach, lo' junok a pan ti' jetok. Laaytok xol vinagre ti', ẍi cham. Max ay chotan ix c'atan eb mulnajwom tu', max yak'on cham ixim k'anbinak cebada bay, yet chi c'ux yetok is lobej tu'. Max low ix xin, masantac'al max yal noj is c'ul, cax aytoc'al maj lajwok yuj.

¹⁵ A yet max toj pax ix jotx'lok tu' junelxa, max yalon cham Booz tu' bay eb is mulnajwom axca ti': —Chi je' sic'on ix ixim chi pukay xol ixim yinxa topanil yayji oc tu'.

¹⁶ Cax chi je' e bekoncan jun junokxa yakan ixim yet chi ec' yiaj ix yet. C'amc'al mac chi tenchanen ix, ẍi cham.

¹⁷ Masantac'al yet lananxa yay c'u, catatu' max bekon ix yec' jotx'lok bay is yawoj cham Booz tu'. A jantak max yi' yet jun c'ual tu', yet max mak'on elok, axca mi junok arroba max yi'.

¹⁸ Max lajwi tu xin, cax max meltzoj bay conob, max toj tx'oxon ix bay xal Noemí jantak max yi'. Max yion c'apax apnok ix ixim k'anbinak cebada bay xal Noemí tu', a ton jantakto maj lajwok yuj c'uxoni.

¹⁹ —¿Mac ay yawoj bay max ach betic'ok? Yak'okab Jehová yaxilal yiban jun mac bay miman a jotx' cebada max e' tu'. Xiwilokab ok yun paktzen Cham bay jun mac max colwaj ayach tu', ẍi xal Noemí. —A jun cham winak ay yawoj bay max in betic' tu', chi yik Booz, ẍi ix Rut.

²⁰ Max yalon pax xal Noemí axca ti': —Yak'okab Jehová is watx'c'ulal yiban jun winak tu', yujtol caw wal watx' c'ul cham jin, axca max yut c'apax c'ul yin camnak wichamil. Ayto juj co ba yetok jun winak tu', xan chi ton je' colwaj ayon,*fn* ẍi xal.

²¹ Max yalon ix Rut axca ti': —Max yal cham ayin, tol chi je' in tojc'al in sayon janic'okxa wet, cax a ab yetok eb ix is chekbej cham chin tojc'al, masantac'al ok yal lajwi aj masanil is yawoj jolayi, ẍi ix.

²² —Watx' xin ach wune', watx' tatol chach tojc'al yetok eb ix is chekbej tu, c'amc'al chach toj bay junokxa makan, yet watx' c'am mac chach etneni, ẍi xal Noemí.

²³ Yuj tu' max tojc'al ix Rut yetok eb ix is chekbej cham Booz, masantac'al yet max lajwi jolay ixim cebada yetok ixim trigo. Junejc'al ayic' Rut yetok yalib tu'.