Ro 9 - A Txꞌan Biblia Yin Kꞌanjobal 1989

A eb israel sic'bil el yuj Dios

¹ Tutun ayoc Cristo yin in c'ul e yetok, xan a juntzan ok waltok ayex ti', caw yel, man lek'tialok. A yikbomal in nabal chi ak'on wojtaknej elok, tol yel juntzan ok waltok ayex ti', yujtol a Cham Espíritu Santo chi ak'on in na'.

² Caw chi cus in c'ul. Pitz'anc'al oc eb wet israelal yin in c'ul, yujtol caw wal chi wochej chi colchaj eb.

³ K'inalok ta chi colchaj eb wet conob tu' yuj chin k'antek yowal c'ul Dios wiban, c'al wel yin Cristo, chin k'antek, cax chin el yin, yujc'al eb.

⁴ Yinatil israel eb wetok. A Dios max on ion oc yuninalok on. Max tx'ox is tzekekial ayon on. Ay juntzan is trato max yak' jetok on. Max yak' c'apax is ley ayon. Yalnak c'apax ayon tzet chi jut jion ay co ba bay. Ay juntzan tzet yetal max yak' Dios is ti' yak'on ayon.

⁵ A eb jichmam, a ton eb mimek yelapnok yul sat Dios yet payxa. Ocnak Cristo jet conobok on yet max oc animail. A Cristo Dios toni, Yajaw yayji yiban masanil tzetak yetal. Al-layokab watx' k'anej yin Cham yin tojbalk'inal. Yunokabi.

⁶ Caxc'al maj colchaj eb wet israelal masanil, palta maj je' jaloni, tol maj yun juntzan tzet bay max yak'can Dios ti' ayon on. Yujtol a eb wet israelal tu', man masanilok eb yel israel yul sat Dios.

⁷ A ayon yinatil on Abraham ti', man co masanilok yel yuninal on Abraham yul sat Dios. Yujtol yalnak Dios bay Abraham tu' axca ti': A yin nak Isaac, a tu' ok beyc'altoj enatil, ẍi Dios bay.

⁸ A jun ti', chi yal elapnok tol c'am junok mac tol yujc'al yichmam chi je' yoc yuninalok Dios. Ayon yinatil on Abraham ti', pitzc'ojnak on el yuj yak'oncan Dios ti' bay, asan on tu' caw yel yinatil Abraham on tu' yul sat Dios.

⁹ Tix tzet yalnak Dios bay Abraham tu' yet max yak'on is ti' bay: Ok in jay yet jun tiempoal txequel yayjicanok. A yet tu' ok jay junok yune' Sara, tol winak unin, ẍi Dios bay.

¹⁰ Chi wal c'apaxtok ayex yabixal Isaac jichmam on. A Rebeca ocnak yetbiok. Ay cawan yune xal junnejc'al max yun yalji. Yet Isaac tu' eb cawanil.

^11-13 A yet c'amto chi alji cawan unin tu', c'amto junok tzet watx', ma junok tzet yob chi el yunen eb, max yal Dios bay Rebeca tu' axca ti': A nak babel, ok can nak yalan is chekbanil nak tzunan, ẍi bay. A jun ti' chi chalej ba yalon yetok juntzanxa tzet tz'ibbil c'apax can yul tx'an Un bay chi yal axca ti': Max in camc'ulnej Jacob, axa Esaú max in cabc'ulnejcan elok, ẍi Dios yul tx'an Un tu'. A ton juntzan k'anej ti' chi tx'oxk'abnen elok, tol ay yalon yet Dios sic'on el junok mac chi yochej. Man yujok tzet chi el juneni, xan chon yawtej oc Dios yetok.

¹⁴ Palta, ¿tzet con chi che na'? ¿Xin ta man tojolok chi yut Dios axca tu'? C'amak, tojol toni.

¹⁵ Yujtol yalnak axca ti' bay Moisés: Ok wak' in yabenc'ulal bay mac chi yal in c'ul, cax ok ok' in c'ul yin mac bay chi yal in c'ul, ẍi Dios.

¹⁶ Caxc'al chi jochej chon colchaji, caxc'al caw chi jak' jip, man yujok tu' chon colchaji, palta asan yuj chi ok' c'ul Dios jin.

¹⁷ Tz'ibbilcan ay yul tx'an Un tzet yalnak Dios bay faraón, cham yajaw bay Egipto. Max yal axca ti': Max ach waoc reyal bay jun conob ti', yujtol wochwan chin tx'ox in mayk'ak'al en, cax ay is may in binaj bay masanil yulyibank'inal, ẍi Dios bay.

¹⁸ Yuj tu xan a Dios chi ok' is c'ul yin mac bay chi yal is c'ul, chi yak' c'apax pitbok c'ul mac bay chi yal c'ul.

¹⁹ Palta tekan ayex ok e yal axca ti' ayin: Ta axca tu xin, ¿tzet yuj xan chi yal pax Dios tol ayon yobtakwom on xin? ¿Mac junok chi je' tenon oc wanaj tzet chi yochej Dios? tekan quex chi.

²⁰ Palta c'am chi je' jalon axca tu'. C'am junok mac chi je' teyelen ba yetok Dios. A junok tx'otx' tol tz'akbil, xin ta chi je' yalon tx'otx' bay is tz'akomal axca ti': ¿Tzet yuj xan caytu' chin otej? ¿xin ta ẍi tx'otx'?

²¹ Yujtol a jun tz'aklom tu', chi je' tz'akon junok tx'otx' axca chi yochej c'ul. Caxc'al junnej bay chi tit is tx'otx' chi k'ana', palta chi je' watx'nen junok tx'otx' yuj k'anlay yin watx'il, c'al junokxa yuj k'anlay yin comonc'al.

²² Xan caytu' Dios yetok eb anima. Ay eb moj chaon yowal c'ul Dios, moj eb tojcan bay yailal yin junelnej. Caxc'al chi yochej Dios chi tx'oxk'abnej el yowal c'ul yin eb, yuj tx'oxon el eb is mayk'ak'al Cham, palta caw miman chi yut c'ul, chi yak'c'al techaj yobtakil eb.

²³ Axca ton ti' max yun tx'oxon el Dios tol caw miman yelapnok is watx'c'ulal ayon, yet max ok' c'ul jin. Yujtol payxatax max on yacan oc yetok, yet watx' ay jalon jet yin is watx'il.

²⁴ Caxc'al ayon israel on, caxc'al ayon mayon israelok, awtebil onxa yuj joc yetok.

²⁵ Yuj tu xan max yal Dios yul libro Oseas axca ti': A juntzan eb man in conobok yet yalantok, ok wak' yik eb tol in conob eb. A eb c'am in yabenc'ulal yin yet yalantok, axa tinani', ok in yabenc'ulnej eb.

²⁶ A bay max wal bay eb axca ti': Man in conobok ex, quin chi, a bay tu' ok al-lay e yin: Tol yuninal ex Cham Dios iquis, ẍi, ẍi tx'an Un tu'.

²⁷ Albilcan yuj Isaías yabixal eb jet israelal, max yalcan axca ti': Caxc'al tol c'amxa chi bischaj eb conob axca yarenail ti' a' mar, palta jaywannej eb ok colchajcanok.

²⁸ Yujtol majxa mayjok tiempo beyc'ulnen Cham Yajaw yulyibank'inal ti' yin tz'akanil, ẍi.

²⁹ Ac'al ton oc Isaías tu' alnej c'apaxcan axca ti': Tolok wal maj el yin c'ul Cham Jajawil, Yajaw yin masanil, max yak'can jaywanokxa jinatil, axca mi wal max yun c'aylay el conob Sodoma, c'al Gomorra max juncanok, ẍi.

Maj yaoc eb israel jun k'anejal yet colbanilej yin c'ul

³⁰ Ti chi waltok tzet chi yal elapnok juntzan chi wal ti' ayex. A eb man israelok, c'am chi ec' nanon c'ul eb tzet chi yun yoc eb watx'il yul sat Dios, palta chi yal Dios tol ay eb watx' yul sat. Chi yal Dios yin eb axca tu', yujtol chi yaoc eb c'ul yin.

³¹ Yak'ban pax eb wet israelal, caw chi yaoc eb nabal yin ley Moisés, yet watx' chi oc eb watx'il yul sat Dios yuj, naoni. Palta maj yun axca tu'.

³² ¿Tzet yuj xan axca tu' chi elol yiban eb? Yujtol c'am chi yaoc eb c'ul yin Cristo. A naon eb tol chi je' yoc eb watx'il yul sat Dios yuj juntzan chi el yunen eb tu'. Yuj tu', axca junok ch'en ch'en bay chi chipil eb yakan, caytu' Cristo yul sat eb.

³³ Yalnak Dios yabixal Cristo yul tx'an Un axca ti': Ayin wal max wacan oc jun ch'en ch'en bay conob Sión, jun ch'en bay chi chipil eb yakan, cax chi telc'ojtok eb yuj. Palta a mactxel ok yaoc c'ul yin, c'am bak'in ok somchaj el c'ul eb yuj, ẍi Dios yul tx'an Un tu'.