Ro 8 - A Txꞌan Biblia Yin Kꞌanjobal 1989

Yowalil chi co beybalnej axca chi yochej Yespíritu Dios

¹ A tinani', junxanej jayji yetok Cristo Jesús, xan c'amxa yowal c'ul Dios jiban.

² A Yespíritu Dios chi ak'on co k'inal yin junelnej, yujtol junxanej jayji yetok Cristo Jesús. Yuj yipalil Yespíritu tu', xan max on colchaj el yul k'ab yobtakil, c'al yul k'ab camich.

³ Yuj co yob ochwanilal ti', xan c'am chi je' jiken tzet chi yal ley Moisés. Yuj tu', c'am yopiso jun ley tu' on is coloni. Palta a Dios chon coloni, yuj yanaktek is C'ajol yuj ul yuten ba yin animail. Lajan is mimanil Cristo axca jet ayon anima on ti', yuj tu' max je' cam yuj co mul. A yet max cami, tz'akan max yi' lowbanilej yailal mulej yin is mimanil, tol lajan axca jet.

⁴ Axca tu' yutnak ba, yet watx' tojolxac'al chi jut co ba axca chi yal ley. Yujtol ayon ti', c'amxa chi co beybalnej axca chi yochej co yob ochwanilal. Lanan co beybalnen axca chi yochej Yespíritu Dios.

^5-6 A eb chi beybalnen yob ochwanilal, ac'al yin chi yaoc eb is nabal. Asan yin tzet man watx'ok chi yaoc eb nabal tu'. Yuj wal tu', chi tojcan eb bay camich yin tojbalk'inal. Ayon tol lanan co beybalnen axca chi yochej Yespíritu Dios, asan yin chi jaoc co nabal. Yuj wal tu', xan ok co cha' co k'inal tol ayc'al yin tojbalk'inal, cax chon oc yin junc'ulalil yetok Dios.

⁷ Palta a eb chi beybalnen yob ochwanilal xin, toc'al chi yajc'ulnej aj ba eb yetok Cham. C'am chi yochej eb chi yikej ley Cham, tamwal chi je' yuj eb.

⁸ Yuj tu', a eb chi beybalnen yob ochwanilal, caw c'am chi je' yunen eb axca chi yochej Cham, xan c'am chi tzaloj Cham yetok eb.

⁹ Palta ayon ti', manchakxa co beybalnej co yob ochwanilal. Asannejokab tzet chi yochej Yespíritu Dios chi co beybalnej, yujtol a' ayoc jin. A eb c'am oc Yespíritu Cristo yin, man yetok Cristo eb.

¹⁰ Palta ayon ti', ayxa oc Cristo jin. Yuj tu', caxc'al camnak co mimanil ti' yuj yobtakil, palta iquisc'al janimail, yujtol watx' on yul sat Dios tinani'.

¹¹ A Dios ak'nej ictzoj aj Jesucristo xol eb camnak. Tatol ayoc Yespíritu Cham jin, ok yictzonej pax aj Cham co mimanil cambejal yayji yuj Yespíritu ayoc jin.

¹² Yuj wal tu', ex wuẍtak, ex wanab, ayoc jiban co beybalnen axca tzet chi yochej Yespíritu Dios. C'amxa oc jiban co beybalnen axca chi yochej co yob ochwanilal.

¹³ Ta ac'ala' co beybalnen tzet chi yochej co yob ochwanilal, ok on cam yuj yin junelnej. Palta ta yetok yipalil Yespíritu Dios chi co bekoncan junen yob ochwanilal ti', ok co cha' k'inalej tol ayc'al yin tojbalk'inal.

¹⁴ Tzanc'al mac chi beybalnej tzet chi tx'ox Yespíritu Dios bay, a ton eb tu' yel yuninal Dios.

¹⁵ A Cham Espíritu chabilxa juj, maj on yaoc Cham yak'omalok serbil yin xiwc'ulal, palta max on yaoc Cham yuninalok Dios. Yuj Cham Espíritu ti', xan chi je' yaj jaw bay Dios axca ti': Mamin, con chi bay.

¹⁶ Jojtak junjun on yin janimail, tol yel yuninal onxa Dios. Yetok c'apaxok, acaw Espíritu chi ak'on jojtaknej elok.

¹⁷ Yujtol yuninal onxa Dios, yuj tu' ok co cha' co satak ok yak'a'. Ac'al oc jet ok co cha' yetok Cristo. Tatol chi jab yail yetok Cham, junnej ok on ayjok yetok xol is watx'ilal.

Is watx'il Dios ok txecloj el jin

¹⁸ Ayin ti', chin na', tol a juntzan yailal lanan jaben ti' tinani', caw wal c'am chi apni yintak watx'il Dios ok txecloj el jin yet yajtok tu'.

¹⁹ Masanil tzetak yetal watx'nebil yuj Cham, caw chi maka' bak'in ok on txeclonelay aj ayon yuninal on Cham ti'.

²⁰ Yujtol a juntzan tzet watx'nebil yuj Cham, majxa eloc axca naon Cham yin. Man yulok yet juntzan tzet yetal tu' xan axca tu' max yunej; palta a Cham max uteni. Palta ay jun tiempoal makbil jayi.

²¹ Yujtol masanil juntzan tu', ok colchaj elok, yet watx' c'amxa tzet chi oni. Axca tu' ok yun co colchaj el ayon yuninal onxa Dios ti', axa joc yin watx'il tu'. Axca tu' ok yun colchaj c'apax el juntzan tu' jetok.

²² Jojtak, tol masanil juntzan tzet watx'nebil yuj Cham yettax payxa, ayoc yalan yailal. Axca junok ix ix lanan yaben yail unin, axca tu' yaben yail juntzan tzetak yetal tu' tinani'.

²³ Man asannejok juntzan tu' lanan yaben yail. Palta cayon c'apax tu'. Ayxa oc Cham Espíritu jin, yet watx' txequel, tol ay tzet ok yak' Dios ayon. Caxc'al mi axca tu', palta lanan jaben yail tinani'. Lanan co makon bak'in ok on oc yuninalok Cham sic'libil. Cax a yet tu' ok colchajcan el co mimanil ti'.

²⁴ Yettax max on colchaji, max jaon oc yipok co c'ul, tol ok co cha co colbanil sic'libil. K'inalok ta mayal co cha' jun tu' tinani', manxa yowalilok chi co mak jayi, yujtol a tzet mayal jilocok, c'amxa chi co mak jayi.

²⁵ Palta ta chi jaoc yipok co c'ul tzet c'am chi jiloc yin, yowalil tec'an chi jut co ba co makon jayi.

²⁶ Ac'ala' c'apax Cham Yespíritu Dios, caw wal chi oc Cham jetok bay man tz'akanok co nabal. Yujtol man jojtakok tzet chi jut txajlok co ba axca chi yochej Dios. Ay bay toc'al chon sik'son aj jay co c'ul, yujtol c'am chi nachaj juj tzet chi jut jalon co ba bay Dios. Palta axa Cham Espíritu chi txajli juj yin co k'akawil tu'.

²⁷ Axa Dios chi ilon tzet ay bay janimail junjun on. Chi nachaj c'apax el yuj, tzet chi yal Yespíritu, yujtol axca wal chi yochej Dios, caytu' chi yun txajli Yespíritu tu' juj ayon yet onxa ti'.

Ay is camc'ulal Cristo jin yin tojbalk'inal

²⁸ Jojtak tol a Dios chi yak'balnej masanilc'al tzet chi jay jiban, yuj co watx'ilok, ayon ay co camc'ulal yin ti', ayon awtebil on yuj ti', yuj jelapnok axcatac'a naoni.

²⁹ Yojtakxa Dios yet payxa, tol yet on. Atax yet tu' sic'nej on can elok, yet watx' lajan chi juncan el axca is C'ajol. Max con yut Dios axca tu', yet watx' a is C'ajol tu' chi oc babel winakil co xol ayon yuninal on Dios ti'.

³⁰ A mac on sic'bil on el yuj, awtebil on c'apax yuj. A' c'apax chi alon juj ayon awtebil on yuj ti', tol watx' on yul sat, cax chi yak'oni tol ay jalon jet yin is watx'il.

³¹ Yuj juntzan chi wal ti', xan caw c'amxa tzet chi co na' tinani'. Caw wal ayoc Dios jetok. Yuj tu', ¿xin ta ay mac chi tzakay on yaoncan yalan?

³² A Dios max yacan oc is C'ajol yul k'ab camich jujc'al co masanil. Caxc'al is C'ajol, palta maj colo'. Yujtol yanaktek is C'ajol tu', xan jojtak, tol ok yak' masanil tzet watx' ayon.

³³ A mac on sic'bil on el yuj Dios, ¿xin ta ay junok mac chi je' con yak'on queja bay? A Cham chi aloni tol watx' on bay.

³⁴ Yuj tu' ¿xin ta ay junok mac ok je' yaon oc jiban? Yujtol a Cristo max cami, max ak'lay ictzoj pax ajok. Axa tinani' ayic' bay is watx' k'ab Dios, lanan tewi juj.

³⁵ C'am junok tzet yetal chi tx'oxo' tol man camc'ulnebilok on yuj Cristo. Caxc'al yailal, caxc'al junok miman cusc'ulal, caxc'al ay mac chi aon oc junok tzet yetal jiban, caxc'al chi jay wajil jiban, caxc'al c'am co pichil, caxc'al mi ay junok tzet yetal ayxamay, caxc'al chon mak'lay camok, ac'ala' con camc'ulnen Cristo.

³⁶ Axca yaloncan tx'an Un: Oj wali, xan chon yak' cam eb yin junjun txolan axca calnel chi ilaytok yet chi cami, caytu' chon yut eb, ẍi yul tx'an Un tu'.

³⁷ Caxc'al ok jay juntzan ti' jiban, palta yelxac'al chi uj juj yuj is yipal Cham chon camc'ulneni.

³⁸ Yuj tu' wojtakxa, caxc'al ay tzet yetal, ac'ala' caw camc'ulnebil on yuj Dios. Caxc'al camich, caxc'al co k'inal, caxc'al junok ángel, caxc'al junok ay yikbej, caxc'al junok tzet yetal ayic' tinani', caxc'al tzet toxa ok jayok,

³⁹ caxc'al junok ayic' bay satcan, caxc'al junok ay yalan tx'otx' ti', tzanc'al junok tzet yetal watx'nebil yuj Cham, tutun c'am chi je' chi yiay co nan yetok co Mam Dios, ac'ala' caw camc'ulnebil on yuj Cham yuj Cristo Jesús, a ton Cham Jajawil.