Ro 7 - A Txꞌan Biblia Yin Kꞌanjobal 1989

Axca tol ichamilej yayji Cristo ayon

¹ Ex wuẍtak, ex wanab, e yojtakxa ley Moisés, tol a jun ley tu', ay yalon yet yin junok mactxel yet iquisto ec'ok.

² K'inalok junok ix ay yichamil. A yet iquis ec' yichamil tu', mojan ix yetok yuj jun ley tu'. Tatol chi cam yichamil ix tu', cax bekanxa ix yuj jun ley tu'.

³ K'inalok ta iquisto yichamil ix tu', cax chi toj ix bay junokxa winak, chi toj ix yin ajmul ixal axca tu'. Palta tatol chi cam yichamil ix xin, chi bekchaj el ix yalan jun ley tu'. Caxc'al chi yi ix junokxa winak, man ajmulok chi yun ix axca tu'.

⁴ Ex wuẍtak, ex wanab, a tinani', junxanej jayji yetok is mimanil Cristo yet max cami. Yuj tu', a yul sat Dios, camnak onxa el bay ley Moisés. Yuj tu', ay junxa mac axca tol jajawil yayji, a ton Cham max ictzoj aj xol eb camnak. Axca ton tu' jak'on yetok, yet watx' ay jopiso yul sat Dios.

⁵ A yet yalan, asan co yob ochwanilal chi co beybalnej. A ley Moisés max pitzc'onej aj juntzan tzet man watx'ok chi yochej oc co mimanil ti'. A juntzan tu' chon iontok bay camich yin junelnej.

⁶ A yet yalan tu', a jun ley tu' ay yalon yet jin. Axa tinani xin, camnak onxa el bay yul sat Dios. Yuj tu', bekan on tinani', yet watx' asan Dios chi jak' serbil. Yuj tu', lanan co beybalnen jun ac' beybalej max yak' Cham Espíritu ayon. Axa jun icham ley tz'ibbilcan tu', c'amxa yalon yet jin tinani'.

A yobtakil ayoc jin

⁷ Palta, ¿tzet quex chi? A ley Moisés tu', ¿tom yob che na'? C'amak toni. Yuj jun ley tu' xan max wojtaknej elok, tol yob tzet max el wuneni. A yet max wochen oc junok tzet yetal, max wojtaknej elok, tol man watx'ok tzet chi el wuneni, yujtol chi yal ley axca ti': Manchak e yochej oc junok tzet yetal, ẍi. K'inalok ta c'am tzet chi yala', man wojtakok ta yob jun tu'.

⁸ Palta yuj juntzan chekbanilej tu', xan max texac'al pitzc'oj aj tzet man watx'ok win. Yuj tu', xiwil tzet man watx'ok max wochej ocok. K'inalok ta c'am jun ley tu', c'am mi yelapnok yobtakil.

⁹ A yet manto wojtakok jun ley tu', iquis in yul sat Dios in naoni. Axa yet max wojtaknej el jun ley tu', max nachaj el wuj, tol c'am jabok in watx'il. Catatu bian, max wojtaknen elok, tol camnak in yul sat Dios yuj.

¹⁰ A ley tu', ay yopiso yak'on k'inalej, palta a' max iontek camich wiban.

¹¹ Yuj jun ley tu', xan max texac'al pitzc'oj aj yobtakil win. Caw wal max in etax yuj juntzan tu'. A yobtakil tu' max iontek camich wiban yuj jun ley tu'.

¹² A jun ley tu', c'am jabok is paltail. Cac'apax tu' masanil is chekbanil tu', caw wal tojol, caw watx'.

¹³ Palta, ¿tzet quex chi? ¿Tom a jun tzet watx' tu' max iontek camich wiban? C'amak, manak. A yobtakil ayoc win, a' max iontek wiban. Xan tix wal max yun txecloj el tu', tol c'am ton watx'il juntzan tu'. A juntzan tu' max iontek camich wiban yuj jun ley watx' tu'. Axca ton tu' max yut tx'oxon el jun ley tu', tol a tzet man watx'ok tu', caw wal yob.

¹⁴ Jojtak tol a Cham Yespíritu Dios anejtek jun ley tu'. Palta ayin ti', ac'ala' ibilc'al oc jun in yob ochwanilal ti'. Axca tol txonbil in oc yak'omalok serbil yobtakil.

¹⁵ Yujtol a tzet chi el wuneni, man watx'ok chi wila'. Ay tzet watx' chi wochej chi wunej, palta c'am chi wun paxok. Axa juntzan tzet man watx'ok yul in sat, axa chi wunej.

¹⁶ Ta chi wabej tol yobtak tzet chi wun tu', caytu' chi yun nachaj el wuj tol a ley watx' toni.

¹⁷ Yujtol mayin wal nak acaw chi el wunen juntzan tu'. A yobtakil toc'alta' ayoc win, a' chi uneni.

¹⁸ Wojtak, tol c'am jabok tzet watx' win, a ton yin jun in yob nabal ti'. Yujtol a tzet yetal watx' chi wochej chi wunej, palta c'am chi je' wuj.

¹⁹ C'am chi wun tzet watx' axca wal chi wochej tu'. A tzet man watx'ok, c'am chi wochej tu', a chi wunc'al.

²⁰ Palta ta chi wun tzet c'am chi wochej tu', chi yal elapnok, tol mayinnak lanan wuneni. A yobtakil toc'alta' ayoc win tu', a' chi uneni.

²¹ Xan tix ton wal chin on ti'. Tol a yet chi wochej chi wun junok tzet yetal watx', axa chi wiloni, a tzet man watx'ok lananxa wuneni.

²² A in nabal, caw wal chi tzaloj yetok ley Dios.

²³ Palta wojtak, tol ay junxa chi yajawbi yin in mimanil ti', a ton yobtakil. A chi yak'lej owal yetok tzet chi yochej in nabal tu'. Yuj tu', axca wal tol preso wayji yuj yobtakil chi yajawbi yin in mimanil ti'.

²⁴ Caw ok'bal c'ul chi wun yuj. A jun in mimanil ti' chin iontok bay camich yin junelnej. Palta, ¿mac chi je' yuj on colon el yul k'ab co mimanil ti'?

²⁵ Asan Dios, yin yak'balnen Cham Jajawil Jesucristo. Yuj tu', caw wal chi wal yuj diosalil bay Dios tinani'. Ti pax yetok wal in nabal chi wak' serbil Dios, palta axa in yob ochwanilal ti', ayoc yak'omalok serbil jun chi yajawbi yin in mimanil ti', a ton yobtakil.