Ro 5 - A Txꞌan Biblia Yin Kꞌanjobal 1989

Watx'xa jak'on yetok Dios

¹ A tinani', toxa mayal yal Dios, tol watx' on yul sat, yujtol chi jaoc co c'ul yin. Yuj tu', junc'ulalxa ayon yetok, yujc'al Cham Jajawil Jesucristo.

² Yuj Cristo xan ay jalon jet co chaon watx'c'ulalil Dios, yujtol chi jaoc co c'ul yin. Yuj tu', xiwil is watx'c'ulalil chi tx'ox ayon tinani'. Caw wal chon tzaloji, yujtol chi jaoc yipok co c'ul, tol ay jalon jet yin is watx'ilal Cham.

³ Man asannejok yuj tu' xan chon tzaloji, palta tzalojokonek c'apax yet chi jaben yail yuj. Yujtol jojtak, tol a juntzan yailal tu', a chi texac'al ak'on co tec'anil.

⁴ Yuj co tec'anil tu' xan chi tzaloj Dios jetok. Yuj tu', chi je' jaon oc Cham yipok co c'ul.

⁵ Maj el co q'uixwil yet chi jaon oc Cham yipok co c'ul, yujtol tz'akaki max yut yak'on Cham is camc'ulal yin janimail yet max yak'on Cham Espíritu Santo ayon.

⁶ Maj je' juj yul jet jak'on tzalojbok c'ul Dios, axa yet max ajapnok tiempoal xin, max cam Cristo juj, ayon c'am Dios yul co sat ti'.

⁷ K'inalok ay junok mac watx' is beybal tinani', tekan c'am mac chi yak' ba cam yuj. Asan ta ay junok mac caw wal watx' is nabal, ay mi junok ayman chi tec'baj ba cam yuj.

⁸ Palta tx'oxnak Dios camc'ulal ayon, yujtol a Cristo max yak' cam ba juj yet caw wal yobtakwom onto.

⁹ Axa tinani', watx' onxa yul sat, yujtol jujc'al max cam Cristo. Yuj tu' xan ok on colchaj el bay jun miman yailal tolto ok jay yuj yowal c'ul Dios.

¹⁰ A yet yalan, caxc'al ajc'ul on oc yin Cham palta max on oc yin watx'c'ulalil yetok, yujtol jujc'al xan max cam is C'ajol. A pax tinani', watx'xa jak'on yetok, yuj tu' xan ok on colchaj yuj yiquisal is C'ajol tu'.

¹¹ Man asannejok yuj juntzan ti' chon tzaloji, palta caw chon tzaloj c'apax yin Dios yuj Cham Jajawil Jesucristo. Yujtol yuj Cham xan watx'xa jak'on yetok Dios tinani'.

A Adán yetok Cristo

¹² Yuj ch'an jun winak a ton Adán, xan max el yich yobtakil yulyibank'inal ti'. Yuj yobtakil tu', xan elnak yich camich, xan ayoc camich jiban co masanil, yujtol max oc co mul co masanil.

¹³ A yet manto ak'lay ley Moisés, ayxac'alta' yobtakil anima chi oqui. Palta a is yobtakil eb tu', maj oc is mulok eb, yujtol c'amto ley.

¹⁴ Palta yecheltaxc'al yul is tiempoal Adán, masantac'al max eltek is ley Moisés, ayc'alta' oc camich jiban co masanil, caxc'al man lajanok co yobtakil axca yet Adán tu' tol maj yikej tzet max al-lay bay. A Adán tu', yenel Cham t'inan jayi.

¹⁵ A jun is yobtakil Adán tu', caw wal man lajanok axca co colbanil chi yak' Dios. Yuj is yobtakil jun winak tu', xan max ijbelaycan oc camich jiban co masanil, palta jun colbanilej, toc'al wal chi el yin c'ul Dios yak'oni, yelxac'al miman yelapnok, yujtol yuj ch'an jun mactxel, a ton Jesucristo, xan xiwil on chi co cha' watx'c'ulalil Dios.

¹⁶ A is yobtakil jun winak tu', caw wal man lajanok axca jun co colbanil chi yak' Cham ayon. Yuj wal ch'an jun is yobtakil jun winak tu', xan max jaycan yowal c'ul Dios jiban co masanil. Palta caxc'al xiwil co yobtakil max oc bay Cham, palta chi yak' Cham co colbanil yin toc'al chi el yin is c'ul, xan watx' on yul sat tinani'.

¹⁷ Asan yuj is yobtakil ch'an jun winak, xan max ijaycan camich jiban co masanil. Palta yuj ch'an junokxa mactxel, a ton Jesucristo, xan ok co cha' k'inalej tol ayc'al yin tojbalk'inal, c'al joc yajawilal yetok, yujtol caw miman is watx'c'ulal Dios tx'oxnak ayon, xan max yala' tol watx' on yul sat.

¹⁸ Yuj is yobtakil Adán, xan ijancan oc yailal jiban co masanil, palta ay wal jun tzet caw wal watx' yunnak Jesucristo. Yuj wal jun tu', xan chi yal Dios, tol watx' on yul sat, cax chi yak'on co k'inal tol ayc'al yin tojbalk'inal.

¹⁹ Yuj wal tenomtakil jun winak maj iken tu', xan ocnak on can yin yobtakwomal co masanil. Palta ay pax jun mac max ikeni. Yuj yikemal jun tu', xan xiwil on chon oc watx'il yul sat Dios.

²⁰ Jaynak ley Moisés, yet chi txecloj el yobtakil sic'libil. Caxc'al max texac'al aj can yobtakil tu', palta yelxac'al max aj can watx'c'ulalil Dios yintak jun tu'.

²¹ Ayon oc co masanil yul k'ab yobtakil. Yuj yipalil yobtakil, xan chon cami, palta a is watx'c'ulalil Dios, ay c'apax is yipalil. Yuj xan, watx' on yul sat tinani'. Axca tu' max yut yak'on co k'inal tol ayc'al yin tojbalk'inal yin Cham Jajawil Jesucristo.