Ro 14 - A Txꞌan Biblia Yin Kꞌanjobal 1989

Manchak co beyc'ulnej jet creyenteal

¹ Ay eb creyente manto tec'anok waayi, yujtol c'amto chi nachaj el cuybej Cristo sic'libil yuj eb. Chaek oc eb e yetok, palta man comonok che teyelej e ba yetok eb yin tzet manto nachaj el yuj eb tu'.

² Yujtol a eb creyente tec'anxa waayi, yojtak eb tol tzanc'al tzet chi je' loon eb ma chion eb, palta ay eb manto tec'anok waayi. Yuj tu', chi xiw eb chion chibej, asan itaj chi chi eb.

³ A ayon mac on chi co chi' masanil tzetak yetal, maj je' jalon k'umal eb c'am chi chion masanil tzet yetal tu'; yetok c'apaxok, a eb c'am chi chion masanil tzet yetal tu', maj je' yalon c'apax eb co k'umal, yujtol chabil onc'al yuj Dios yetok eb.

⁴ K'inalok ay junok mac chi mulnaj bay is patrón, ¿xin ta ay jalon jet co beyc'ulnen nak tu' che na'? C'amak. Asan is patrón nak tu' chi je' yaloni ta watx' nak yul is sat, ma c'amak. Xan cayon tu' bay Cham Jajawil. Watx' ok on eloc yul sat, yujtol ay is yipalil Cham ayoc jetok, yet watx' watx' chon elocok.

⁵ Ay eb creyente chi aloni tol ay juntzan c'u miman yelapnok yintak juntzanokxa. Ay eb chi alon xin, tol lajanc'al junjun c'u, c'am junok miman yelapnok. Yuj tu', co naek yin co nabal junjun on baytet chon cani.

⁶ A mac chi yikej ba yet juntzan c'ual chi wal ti', chi yikej ba yujtol miman yelapnok Cham Jajawil yul sat. Yetok c'apax junxa ti', a mac chi chi' tzanc'al tzet yetal, chi chi', yujtol ay yelapnok Cham Jajawil yul sat, yujtol chi yal yuj diosalil bay Dios yuj, cax chi looni ma chi chioni. A pax mac c'am chi chi', ma c'am chi lo' masanil xin, c'am chi chi', yujtol ay yelapnok Cham Jajawil yul sat, cax chi yal c'apax yuj diosalil yuj bay Dios.

⁷ Yak'ban iquis on, man jetok co ba. A yet chon cami, man c'apax jetok co ba.

⁸ Ta iquis on ec'ok, yuj jion can Cham Jajawil xan iquis on. Ta chon cami, yuj jion can Cham Jajawil xan chon cami. Yuj tu', caxc'al iquis on ec'ok, caxc'al chon cami, yet onc'alta' Cham Jajawil tu'.

⁹ Yujtol max cam Cristo, cax max ictzoj pax ajok, yet watx' chi oc Cham Yajawilok eb camnak, c'al Jajawilok mac on iquis on c'apax ti'.

¹⁰ Yuj tu', c'am chi je' co beyc'ulnen junok jet creyenteal. C'am c'apax chi je' jaloni, tol c'am yelapnok eb, yujtol co masanil yowalil ok on apnok oc satak Dios, cax ok on beyc'ulneni.

¹¹ Yujtol chi yal yul tx'an Un axca ti': Ayin Yajaw in ti', chi wala' cax chi wak'on in ti', tol ok ay jajan masanil anima in satak, cax masanil eb ok yak' ti' ayin, ẍi yul tx'an Un tu'.

¹² Yuj tu', yowalil junjun on ok jal tzetak max el junen bay Dios.

Ay is may ta chi jak' etax el nabal eb jet creyenteal

¹³ Yuj tu', manchakxa co beyc'ulnelej co ba. Aokab junxa ti' chi junej. Tol watx'okab chi jut co beybal yil eb jet creyenteal, yet watx' c'amokab junok eb chi etax el jujc'al, cax c'am junok eb chi somchaj el nabal.

¹⁴ Ayin ti', yujtol ayoc in nabal yin Cham Jajawil Jesús, xan wojtak sic'libil tol c'am junok loj munilc'al ay yowalil yuj, palta ta ay mac chi naoni tol ay yowalil junok loj yuj Dios, c'am chi je' loon jun tu', yujtol ay ton yowalil yuj Dios bay xin.

¹⁵ K'inalok ay junok tzet ay yowalil loji ma chiji yuj juntzanok eb jet creyenteal. Ta yuj chi co lo' ma yuj chi co chi', cax chi cus c'ul eb, c'am co camc'ulal yin eb chi yal tu'. Palta max cam Cristo yuj eb c'al juj. Yuj tu', caw ay is may, ta chi etax el nabal junok anima yuj junok tzet chi co lo' ma tzet chi co chi'.

¹⁶ Ayon ti', jojtak tol watx' juntzan tu', palta ta ay eb chi aloni, tol c'am watx'il yuj chi co lo' ma yuj chi co chi', manchak co loek, manchak co chiek satak eb.

¹⁷ A tinani', ayon oc yul k'ab Dios. Yuj tu', manxa mojok chi jaoc co nabal yin tzet chi co lo', ma tzet chi co chi', c'al tzet chi juq'uej. Palta mojxa tol tojol chi jut co nabal, junc'ulalokab ayon, cax chi co chaon jun tzalojc'ulal chi yak' Cham Espíritu Santo ayon.

¹⁸ Ta axca tu' chi jut jak'on serbil Cristo, ok tzaloj Dios jetok, cax chi yilon c'apax eb jet animail, tol watx' co beybal.

¹⁹ Yuj tu', chi cam co naon tzet watx' chi jut co ba, yet watx' junc'ulalokabc'al ayon co masanil. Chi cam co naon c'apax tzet chi jut co wajan anej oc co tec'anil.

²⁰ Caw ay is may chi etax el is mulnajbal Dios yin eb jet creyenteal, yujc'al tzet chi co lo' ma tzet chi co chi'. Yuj tu', manchak jut axca tu'. Yel toni, c'am junok tzet yetal chi co lo' ma chi co chi' ay yowalil yuj Dios. Palta ta ay eb chi somchaj el nabal yuj tzet chi co lo' tu' ma chi co chi' tu', co bekcan co looni ma co chioni.

²¹ Yuj tu', ta ay eb chi somchaj el nabal, yuj chi co chi' chibej, ma yuj chi juc' vino, ma yuj junokxa tzet chi el juneni, yelxac'al watx' chi co bekcan junen juntzan tu'.

²² Yujtol ayoc Dios yin co c'ul, yuj tu' jojtak tol c'am junok tzet ay yowalil yuj, palta munilokab chi co na juntzan ti' yul sat Dios. Ta jojtak tol c'am yowalil yuj Dios tzet chi el junen tu', watx' jet.

²³ Palta a yet chi co lo' ma chi co chi' junok tzet yetal, ta chi co na' tol ay yowalil yuj Dios, cax chito co loon paxok, chi oc co yobtakil bay Cham, yujtol c'am chi jaoc yin co c'ul tol watx' chi el juneni. Tzanc'al tzet chi junej, ta man watx'ok yul sat Dios co naoni, cax chi junen paxok, chi oc co yobtakil bay Cham.