Ro 13 - A Txꞌan Biblia Yin Kꞌanjobal 1989

¹ Yikemokab chi jut co ba co masanil bay eb yajaw, yujtol a Dios chi aon oc eb yin yopiso. A Dios chi aon oc yopiso eb, ta c'amak c'am mi junok eb ay yopiso.

² Yuj tu', ta ay mac chi tenon tzet chi yal eb yajaw tu', chi yal elapnok tol a bay ikbej, ma bay opiso tz'unbilcan el yich yuj Dios, a chi tena', cax ac'al oc chi yitek yowal c'ul ley chi ten tu' yiban.

³ Yujtol a eb yajaw tu', ayoc yopiso yet watx' chi xiw eb c'am watx'il is beybal bay eb. Man yujok xiw eb watx'c'al tzet chi el yunen bay eb, xan ayoc yopiso eb. Yuj tu', ta chi jochej c'am chon xiw bay eb, watx'okabc'al chi jut co beybal tu'. Ta watx'c'al chi jut co beybal, chi tzaloj eb jetok.

⁴ Ayoc yopiso eb yuj Dios, yuj watx'ilok masanil anima. Palta ta yob tzet chi el juneni, moj chon xiw bay eb, yujtol ay yikbej eb yaon oc yailal jiban. Yujtol ayoc yikbej eb yuj Dios yak'on yailal mac yob tzet chi el yuneni.

⁵ Yuj tu', jikejek tzet chi yal eb yajaw tu'. Man asannejok yujtol chon xiw yaon oc eb yailal jin, xan chi jikej, palta yujokab tol axca tu' chi cha c'ul Dios.

⁶ Yuj tu', yowalil chi jak' co tojlabal axca chi yal ley, yujtol a Dios anej oc yopiso eb yin yajawil, cax lanan yilon eb yopiso tu'.

⁷ Tzanc'al yajawil chi k'anil tumin jin, cax ta caytu' yalon ley, jak'ek. Caxc'al co boleto, ma junok co licencia, co tojlanej axca yalon ley. Ta moj co xiw bay eb yajaw tu', xiwokonek bay eb xin. Ta moj ay yelapnok eb yul co sat, ayokab yelapnok eb yul co sat.

⁸ Ta ayon ay bay ay co jec, jak'ek paxok. Ay jun tzet axca tol co jec yayji bay eb jet animail, a ton co camc'ulal, yujtol yowalil chi co camc'ulnelej co ba. Ta chi co camc'ulnej co ba, chi yal elapnok tol lanan jiken ley Dios masanil.

⁹ Ay juntzan chekbanil chi alon axca ti': Manchak e yaoc e mul yul k'ab e yetbi junjun ex. Manchak e mak' cam e yet animail. Manchak ex elk'ani. Manchak e yochej oc junok is tzet yetal e yet animail, ẍi. A juntzan tzet max in txoltek ti', c'al juntzanxa, chi junanej ay ba yin jun chekbanil ti'. Che ya'ilnej e yet animail axca che yut e ya'ilnen e ba junjun ex, ẍi.

¹⁰ A mac chi ya'ilnej yet animail, c'am chi yak' junok yobc'ulalil bay yet animail tu'. Yuj tu', ta chi co ya'ilnej eb, c'am tzet chi jak' palta yul sat ley Dios.

¹¹ Ti chi wal c'apax junxa ti' ayex. Ojtaknejek el tzet yayji jun tiempoal ti' tinani'. Yujtol a tinani', tiempoalxa naon ba co c'ul axca yel co wayan, yujtol janic'xanej, cax ok tz'aknajxac'al co colbanil. Cawilxa yintak yet max jaon oc co c'ul yin Cristo.

¹² A tinani' lananxa q'uexchaj tiempo; axca tol lanan yec'can el ak'bal, toxa chi sakbi. Yuj tu xin, co bekcan junen yobtakilal, cax chi co watx'nen co ba yin jak'on jip junen watx'ilal.

¹³ Axcaokab eb watx' chi yut ec'jab ba yet c'ualil, axcaokab tu' chi jut co ba. Tojolokabc'al chi jut co beybal yil anima. Manchak on uc'wi an, cax chon wekeki. Manchak on mulji, manchak el junen junokxa tzet man watx'ok yetok co mimanil. Manchak jak'lej owal yetok junokxa mactxel. Manchak on sawenbi oc yin junok mactxel, yuj tzet ay yul is k'ab.

¹⁴ Yowalil chi co cha is yipalil Cham Jajawil Jesucristo axca chi yun junok soldado yet chi chaon is mitx'k'ab yet owal, cax manchakxa jaoc co nabal yin tzet chi yochej oc co yob ochwanilal.