Ro 11 - A Txꞌan Biblia Yin Kꞌanjobal 1989

Ay eb israel ok colchajok

¹ A eb conob Dios tu', ¿xin ta pilan wal max intaknelay el eb yuj Cham? Majc'al bian. Ilab ayin ti', israel in yetok eb. Yinatil in c'apax Abraham yetok eb. Yinatil in Benjamín.

² Atax yet payxa max yalcan Dios, tol yet yayji conob israel, xan a tinani', man intaknebilok el is conob tu' yuj. Jojtak yabixal Elías yul tx'an Un. A yet max txajli Elías tu' bay Dios junel, max yalon tzet is mul eb yet israelal tu', max yal axca ti':

³ Mamin, a eb wet conob ti', max yak' cam eb juntzanxa eb a chekbej, cax max yuchontok eb a altar. A tinani', asan in max in cani, palta ilab chi yochej eb chin yak' c'apax camok, ẍi bay Dios.

⁴ Palta max yal Dios bay axca ti': C'amak. Ayto ukebokxa mil eb et israelal mitx'bil waay wuj tol majc'alta' oc eb yin ayilal bay Baal, ẍi Dios bay.

⁵ Ac'ala' ton c'apax tinani', ay jaywan eb xol eb wet israelal, tol sic'bil el yuj Dios yuj is watx'c'ulal.

⁶ Yuj is watx'c'ulal Cham, xan max sic'lay el eb yuj, man yujok tzet max el yunen eb. K'inalok ta yuj tzet chi el yunen eb, xan chi sic'lay el eb, tita tol man yujok watx'c'ulal Dios chi yal tu'.

⁷ Palta, ¿tzettax chi eloc eb israel che na'? Max yak'lej eb sayon tzetbil chi yun yoc eb watx'il satak Dios, palta maj je' yuj eb. Ti asan eb sic'bil el yuj Dios xol eb tu', asan eb tu' max je' yuj. Axa pax juntzanxa xin, tol max ak'lay pitbok el eb.

⁸ Yujtol chi yal yul tx'an Un axca ti': A Dios max ak'on pitbok el eb. Yuj tu', caxc'al chi yilc'al eb, palta c'am chi nachaj el yuj eb. Caxc'al chi yabc'al eb, palta majc'alta' nachaj el yuj eb. Ac'ala' eb tinani', ẍi yul tx'an Un tu'.

⁹ Yalnak c'apax can David axca ti': A is lobej eb yin amigoal, yutokab ba yin yalil bay eb. Telc'ojokab tok eb xol juntzan is k'in tu'. Jayokab yailal yiban eb.

¹⁰ Utcantok eb yin c'amxa chi ilwi eb. Axcaokab junok anima tenbil ay nojan yuj tzet ikbil yuj, cayokab tu' chi yuncan eb masanil tiempo, ẍi David tu'.

Tzetbil chi yun colchaj eb man israelok

¹¹ Chin k'anlej ayex, a yet max etax el eb wet israelal tu', ¿xin ta junelnej wal max etax el eb? C'amak. Yujtol max pitbi el eb, yuj tu' xan ay eb man israelok chi colchaji. Axa eb wet israelal ok ilonok, ok yochej oc eb.

¹² Yujtol etaxnak el eb wet israelal tu', yuj tu' xan watx' yet masanil anima yulyibank'inal ti'. Yujtol cannakcan eb yalan, yuj tu xan caw watx' yet eb man israelok. Ta axca tu xin, ec'ban watx'il jet co masanil yet ok meltzoj pax oc nabal masanil eb wet israelal junelxa.

¹³ Palta ay jun tzet chi yochej in c'ul chi wal ayex, ex mayex israelok. A Dios max yak' wopiso in mulnaj e nan e xol. Yuj tu', caw miman yelapnok jun wopiso ti' yul in sat.

¹⁴ Chi wochej chi yil eb wet conob tol lanan e colchaji, talaj c'uxan ayto pax eb chi yochej ajok tol chi colchaj c'apaxok.

¹⁵ A eb wet israelal tu', intaknebil el eb yuj Dios jun tiempoal. Yuj tu' chi je' yoc masanil juntzanokxa anima yin junc'ulal yetok Dios. Tx'okxam wal watx'il yet ok chalay pax oc eb junelxa xin. Axq'uijanxac'al mi tol chi ictzoj aj eb anima xol eb camnak, yujtol miman watx'ilal ok cha eb.

¹⁶ K'inalok a ixim babel pan chi eltek yin ixim harina, yet ton Dios yayji, ta caytu', yet ton Dios ixim masanil. Axca junok te te', ta yet Dios te xeej, yet Dios te k'ablakej c'apaxok.

¹⁷ Palta ay eb wet conob elnak yul is k'ab Dios. Axca junok te k'ab olivo chi tzoc'lay el yin is txutxal, caytu' eb. Axa ayex ti' xin, axca junok k'ab te xolakteal olivo, cayex tu', yujtol mayex israelok. Palta axca tol max quex tz'unlaycan oc q'uexelok eb bay max tzoc'lay el yin te txutxalej tu', yujtol ay e yalon e yet yetok eb jichmam on ayon israel on ti'.

¹⁸ Palta maj je' e naoni tol watx' ex yintak eb ibil el tu'. Yujtol axcac'al junok k'ab te', cayex tu'. A junok k'ab tu', c'am chi je' tol a' chi ak'on yaxbok te xeej, palta tol a te xeej chi ak'on yaxbok te k'abej tu'.

¹⁹ Tekan che yal axca ti': A eb israel tu', axca tol tzoc'bil el eb yin is txutxal, yet watx' ayonxa chon oc q'uexelok eb, tekan quex chi.

²⁰ Yel toni, axca ton tol tzoc'bil el eb wet conob tu', yujtol maj yaoc eb c'ul yin Dios. Axa ex pax xin, yuj che yaoc e c'ul yin, xan max quex occan q'uexelok eb. Yuj tu', xe yi talaj aj can e ba, taynejekc'al e ba.

²¹ Ilab maj yak' Dios mimanc'ulal yin eb yetc'alta'a. Akxam ex wali, man ok yak' mimanc'ulal e yin c'apaxok, ta che yiel e c'ul yin.

²² Ojtaknejek elok tol miman is watx'c'ulal Dios, palta ak'om cuenta c'apax Cham sic'libil. A eb etaxnak el tu', ak'bil cuenta eb yuj. Palta xiwil is watx'c'ulal Cham chi tx'ox ayex. Yowalil che cawxanej oc e ba yin is watx'c'ulal tu'. Ta c'amak, ok ex ilay c'apax el yuj ayex ti'.

²³ A eb wet conob tu', ta ok ya pax oc eb c'ul yin junelxa, ok yi pax oc eb yetok junelxa. Axca tol ok tz'unlay oc eb yin is txutxal junelxa. Yujtol ay is yikbej Dios yuten eb axca tu'.

²⁴ A ex mayex israelok, axca tol a yin junok te xolakteal olivo tzoc'bil ex elok, cax max ex tz'unlay oc yin te awbejal olivo. Caxc'al mayexc'alta' is mimanilok te' yet yalan, palta max ex oc is mimanilok te'. Ta axca tu' max ex utlayi, ac'ala' c'apax eb wet conob, axca tol ok tz'unlay oc eb yin is txutxal bay elnak tu', is txutxalc'alta' eb yet payxa. Yuj tu', ok watx'jok oc eb yin junelxa.

Ay jun tiempoal ok colchaj eb israel masanil

²⁵ Ex wuẍtak, ex wanab, a juntzan chi waltok ayex ti', c'am mac ojtaknen payxa. Palta tinani', chi wochej che yojtaknej elok, yet watx' c'am che yi can e ba yuj e jelanil. A eb wet israelal tu', xiwil eb pitbinak elok. Ok can eb axca tu', masantac'al ok yal tz'aknaj yoc eb man israelok.

²⁶ Catatu bian, cax ok colchaj masanil eb wet conob, yujtol chi yal yul tx'an Un axca ti': A bay conob Sión, a tu' ok aj jun colwajwom. A' ok ion el is yobtakil eb yinatil Jacob.

²⁷ Axca ti' ok wut wak'on in trato yetok eb, yet ok wak'on tan is yobtakil eb, ẍi Dios.

²⁸ A eb wet conob tu', yajc'ul ba eb yetok Dios, yujtol c'am chi yaoc eb jun k'anejal yet colbanilej yin c'ul. Caytu' yak'on eb axca ti', yet watx' ayexxa chi je' e colchaji. Palta ac'ala' camc'ulnebil eb yuj Dios, yujtol a' sic'nejcan el eb jichmam on.

²⁹ Yujtol a tzet chi yak' Dios, junelnej chi yak'a'. C'amxa chi yiec' junelxa. A eb chi yawtej oc Dios yetok, junelnej chi yawtej oc eb yetok.

³⁰ A yet yalan, mayex yikemok bay Dios. Axa tinani xin, chi ok' c'ul Cham e yin, yujtol a eb wet conob, man yikemok eb bay.

³¹ Caywal tu' yayji eb wet conob tu' tinani', caw wal man yikemok eb bay Dios, yet watx' a yet ok yilon eb tzetbil chi yun e yion is yabenc'ulal Cham ayex ti', ok yi c'apax eb is yabenc'ulal Cham.

³² A Dios max yala' tol c'am junok on yikem on. Max con yut axca tu', yet watx' jun lajan yok' c'ul jin co masanil.

³³ A Dios, ¡manxa jantakok is watx'il, manxa jantakok is jelanil, manxa jantakok tzet yojtak! C'am chon tzakay jalon el tzet max nabalnej elok, c'al tzet chi el watx'neni. Cax c'am c'apax junok chi nachaj el is beybal Cham yuj.

³⁴ Axca chi yal yul tx'an Un: ¿Mac junok maxax ojtaknen el is nabal Cham Jajawil? ¿Mac junok max ak'on nabal Cham?

³⁵ ¿Mac junok max ak'on junok is sabal bay Cham yin babelal, cax tzunanxa chi yak' Cham yet bay? ẍi yul tx'an.

³⁶ Yujtol masanil tzetak yetal, a bay Dios chi tita. A Cham watx'nenej masanil tzetak yetal, yet watx' chi txecloj el is watx'il Cham. Mimanokabc'al yelapnok Cham masanil tiempo. Yunokabi.