Pr 9 - A Txꞌan Biblia Yin Kꞌanjobal 1989

C'am chi chalej ba jelanilal yetok c'am nabalil

¹ Axca wal yin ilwalil max yun wilon jun ix, tol max watx'nej aj yatut, watx'xac'al max yun yili, ukeb wal yoyal max yaocok.

² Max mak'cam ix no no', max watx'nen jun miman loj, max watx'nej vino caw wal watx', axa watx'nen ay meẍa tu'.

³ Lajwi tu' max chekontok eb is chekbej awjok bay tzalanlak xol conob tu'.

⁴ Max yalon eb axca ti': Sebaxek ex ach'ej tol c'amto e jelanil. Ex c'am e nabal sebaxek,

⁵ tol ok ex lowok c'al e yuq'uen in vino max in watx'nej.

⁶ Bekekcan e c'am nabalil tu', yet watx' chex iquisbi ec'ok, beybalnejek beybal eb aj nabal, ẍitok ix. A jun ix max wil tu', a ton jelanilal.

⁷ Tatol chak' cuenta eb buchwajwom, asanc'al yalon eb k'anej man watx'ok en ok yun eb. Tatol chak' cuenta eb yobtakwom, toc'al ok ach bajlay yuj eb.

⁸ Tatol cha tenchanej eb anima ch'aan, ok oc eb ajc'ulal en. Tatol chak' cuenta eb aj nabal, ok ach yochej eb.

⁹ Cuy eb jelan, yet watx' yelxac'al jelan ok eloc eb; cuy c'apax eb anima watx' is nabal, yet watx' chi aj can yojtaknen el eb.

¹⁰ A yichbanil jelanilal, tol ayokab yelapnok Jehová yul co sat; a yin jojtaknen el Cham tol asanxanej ocok, chon eloc yin aj nabalil.

¹¹ A wal yuj jelanilal tu' xan ok ach ayjok ec' miman tiempo, caw wal xiwil yabilal ok yun a k'inal.

¹² Ta jelan ach, etc'al oc watx'ilal ok yak'a'; tatol ch'aan chot a ba xin, ebanc'al ok titcanok.

¹³ A junok ix c'am nabal, xiwil chi k'anjabi, c'am chi q'uixwi, c'am pax tzet yojtak.

¹⁴ Toc'al chi ay chotan bay yul junok ẍila ti yatut, can ayaj bay tzalanlak yul conob,

¹⁵ cax chi yawtentek eb chi ec'jab bay yulak be.

¹⁶ Sebaxek ex ach'ej tol c'am e jelanil, ẍi ix. Chi yal c'apax bay eb c'amto is nabal:

¹⁷ A a' aej tol chi elk'anelayi, caw wal chi' yuq'ui a'; a jabok loj ewantak chi co lo', caw wal watx',*fn* ẍi ix.

¹⁸ Palta a eb ach'ej tu', man yojtakok eb tatol a eb maxax awtelay yuj ix tu', camnakxa eb tinani'.