Pr 6 - A Txꞌan Biblia Yin Kꞌanjobal 1989

Ay is may joc fiadoral

¹ Ach in c'ajol, tatol cha wabaj a ba yin junok tx'ok animail,

² a achc'al oc cha watx'nej ay a yalil, chi titcan eban yuj a k'anej tu'.

³ Ach in c'ajol, cay wal ti' chi yun a colon el a ba yul k'ab nak aj tumin. Asi', cax chi toj eon ay a ba bay jun anima tu', cax chak'on pural yak'on pax tzet yetal bay ay ach oc fiadoral tu'.

⁴ C'amxaokab chach way yuj, c'amxaokab chach xew junok bek

⁵ masantac'al chach el yalan, axca chi yun yelaj junok no tx'ucchej bay mac chi ukten ec'ok; elan ajok, axca chi yun yelaj junok no tz'iquin bay junok yal.

Tenchebal bay eb isaj

⁶ Ach isaj, asi', il no tx'equen, chi cam eloni, tzet chi yut ba no', chi cam a cuywi yintak no'.

⁷ Caxc'al c'am mactxel chi ikban no', tamwal ay mac chi alon bay no' tzet chi yunej,

⁸ palta asan tol chi waj no' is lobej yet is tiempoal, a wal yet elnak wal lobej no' tu', chi wajoncan no'.

⁹ K'okbilxac'al a way tu', ach isaj, k'okbilxac'al aj telan tu'.

¹⁰ Yak'ban chi tit numumok a wayan, c'al wacxi a jolom yuj wayan, yetok c'apax a jeltzobnen can a k'ab, cax watx'xac'al chi yun a wayi,

¹¹ axa ok yunej, ok jayoc mebil eban, ok oc wal mebil tu' en axca junok elk'om ibil oc arma yuj.

Beybal eb yobtakwom

¹² A mactxel tol yob is nabal asan lek'tial chi ec' yal xolak anima;

¹³ chi mutz' sat, chi yak'on yechelej yetok yakan, cax chi tx'oxon yetok yiximal k'ab.

¹⁴ Junelnej tol caw wal yob is nabal, cax asan yobtakil chi naobtanej yuneni; a bay chi eq'ui, asan owal chi aj yuj.

¹⁵ Yuj wal tu', yin aymanil ok jayoc yailal yiban; yin junnej mutz'satil ok yun lajwok ayok, c'amxa tzet watx' ok yunej.

A tzet yetal tol chi yajlay yuj Jehová

¹⁶ Ay ukeb tzet yetal chi yajlay el yuj Jehová wal yin junelnej:

¹⁷ maynejbail, lek'tial, mak'oj cam anima man yujok is mul,

¹⁸ naoj tzet yetal man watx'ok, chi toj lemnaj yin yobtakil,

¹⁹ ak'oj lek'ti testigoal, c'al tx'emoj owal xol eb yuẍtak.

A tzet chi yun yelcan apnok ajmulal

²⁰ Ach in c'ajol, c'ubaj juntzan in chekbanil ti' yin a nabal, c'al cuybanilej chi yak' a txutx.

²¹ Ic'al oc yin a nabal, c'amokab chi toj c'ayc'ulal oj.

²² A ok ach ikban bayc'al ok ach ec'ok, man ok ach xiw yuj yet chach wayi. A yet ok el a wayan, ac'al juntzan ti' naan oj.

²³ Wal yel, a chekbanilej c'al cuybanilej ti', axca wal junok tzektebal yayji oc ayach. A tenchebalej, c'al nabalej chach ikban yul beal k'inalej.

²⁴ A ok ach colon el bay yul k'ab ix ix yob is nabal, c'al bay ix ay yajaw tol chi'xac'al k'anjabi.

²⁵ Manchak aoc a nabal yin is watx'il yili; manchak a cha' somchaj aj a c'ul yuj tzetbil chach yut yilon ocok.

²⁶ A mac chi yun mul yetok ix ajmul ix, chi ocxac'al mebil yin. Axa pax mac chi yun mul yetok ix ay yajaw, chi je' chi camxac'al yuj.

²⁷ Tatol ay mac chi yochej chi yitok k'ak'ej txam is c'ul, chi tz'atok is pichil yuj.

²⁸ A mactxel chi bey yiban tzak'ak', chi tz'atok yakan.

²⁹ A mactxel chi oc yin ix ay yajaw, yowalil chi jay yiban.

³⁰ Chito wal nalay eb chi elk'anwi, yujtol ay wajil eb.

³¹ Caxc'al mi axca tu', ta chi ayc'ayi, yowalil ukeb makan chi yun tojlanen tzet chi yelk'anej tu', caxc'al yetok masanil tzet ay bay.

³² Palta yelxac'al c'am is nabal mactxel chi ec'jab yetok ix ay yajaw. A mactxel chi yun axca tu', ac'al oc chi yak' lajwok ay ba.

³³ Ok cha yatakilal, c'al mak'layi; majxa tok c'ayc'ulal is q'uixwiltakilal tu' yuj eb anima.

³⁴ A nak winak max etnelay yistzil tu' caw wal ow nak axca k'ak'ej, c'am jabok chi yak' mimanc'ulal yet chi apni oc tiempoal paktzeni.

³⁵ C'am chi cha sabalej chi yak' jun ay mul tu', tamwal chi sicbi c'ul yuj xiwil sabalej chi ak'lay bay.