Pr 5 - A Txꞌan Biblia Yin Kꞌanjobal 1989

Elan bay eb ix ix yob is nabal

¹ A wal in jelanilal ti' cha cha ab ach in c'ajol; chi cam wal a taynen ab in k'anej chi wal yin waj nabalil.

² Axca tu xin ok je' nachaj el oj cax ok je' a k'anjab yin aj nabalil.

³ A ix ix ay yichamil, watx'xac'al k'anjabi, c'ununixac'al yul is nuk' k'anjab yin is montebal k'anej.

⁴ Axa yin is lajubal xin, lajanxa chi yuncan aj ix axca c'ail an ixaj, axcaxac'al chi yun co lajwi yuj ch'en espada cab ye.

⁵ Tatol ok ach ec'jab yetok jun ix tu', ok ach yitok bay camich; a jun be ibil oc yuj ix tu', lanan tojcan bay cambal.

⁶ A bay ix ix tu', c'am yelapnok beal k'inalej, c'am chi na', ta watx' be ma yob.

⁷ Yuj tu xin ach in c'ajol, ab wal tzet ok wala'. Manchak ecan el a ba yin in cuybanil ti'.

⁸ Najat chach el bay c'atan ix ay yajaw tu', tamwal chach apni oc bay ti' puertail is na,

⁹ yet watx' c'am chi c'ayil a mimanbilal, tamwal yin aymanil chach cam yul k'ab mac c'am yabenc'ulal;

¹⁰ yet watx' c'am chi aj can beyomal junok tx'ok animail yuj sat awoj max a watx'nej yetok epalil.

¹¹ Axa ok yunej, toxac'al ok ach ok'can ec'ok, yinxac'al jab jabil ok yun lajwok ay a mimanil.

¹² Xan ok al axca ti': ¿Tzet wal yuj xan max wintaknej el tenchebalej? ¿Tzet wal yuj xan maj wikej?

¹³ Maj yal in c'ul max in cha wab tzet max yal eb in meẍtol, tokwal max in cha wab bay eb max in cuyoni.

¹⁴ Janic'xanej maj in etaxxac'al el satak masanil conob, cachixac'al mi.

¹⁵ Uc' a' aej bay a' uc'bala' tol etc'alta' yayji ocok, yet watx' chi ec'tok a takintial. (Chi yal elapnok tol asanokab yin etbi ayoc a nabal.)

¹⁶ ¿Tzetto wal yuj xan ok el onenal yetok eb ix chi ec' yulak calle?

¹⁷ Watx' tol chi colwaj eb onenal etok, yintak pax tol tx'ok mac bay chi colwaj eb.

¹⁸ Tzalojan, ayokab onenal yetok etbi max ach mojay yetok yin ach'ejal.

¹⁹ Watx'okab c'al yili ix yul a sat, axca wal junok no' tx'ucchej; c'am chi lajwi a tzalojc'ulal yin, ayokabc'al a tzalojc'ulal yuj is camc'ulal ix.

²⁰ Ach in c'ajol, manchak ak' somchaj a nabal yuj junok ix ay yajaw. ¿Tzet yuj xan ok a bekxac'al oc telan a ba yul k'ab ix tu'?

²¹ A Jehová lananto yilon tzetbil yili co beybal junjun on, tok ay junok tzet yetal tol c'am chi yil Cham.

²² A eb yobtakwom, ac'al oc yin is yobtakilal eb tu' ok ayc'ayok; ac'al oc is yobtakilal tu' chi c'alon ay eb axca lasu.

²³ Yujtol c'am chi mitx' waay ba, xan ok tokcan bay camich; yuj is c'am nabalil, xan ok tokcan bay c'aybanilal.