Pr 3 - A Txꞌan Biblia Yin Kꞌanjobal 1989

Tzet chi yun jion jelanilal

¹ Ach in c'ajol, manchak toj c'ayc'ulal juntzan in cuybanil ti' oj, c'ubaj in chekbanil ti' yin a nabal,

² yet watx' ok najatilbok a k'inal; yinc'al tzalojc'ulal ok ach ec'ok.

³ Manchak a bekcan a beybalnen watx'c'ulal c'al ikemal; chi cam wal a naoni, cax tojta wal c'ayc'ulal oj.

⁴ Axca tu xin caw wal watx' ach yul sat Dios, c'al yul sat eb anima.

⁵ Aoc a nabal yin Jehová yin masanil a c'ul; manchak aoc a jelanil yipok a c'ul.

⁶ Nac'altek Jehová yin masanil tzetak chonej, a Cham ok ach iontok yin beybalej watx'.

⁷ Manchak a naxac'al tol jelan ach; ayokab yelapnok Jehová yul a sat, cax cha pojon el a ba xol yobtakil.

⁸ Ta axca tu' chonej, ay a cawil, cax tec'an a mimanil.

⁹ Tx'oxo' tol ay yelapnok Jehová yul a sat, yin ak'on junok ofrenda bay Cham yin a beyomal, c'al yin a babel sat awoj.

¹⁰ Caytu' ok yun noj a c'una' yuj sat awoj, tz'akanc'al ok yun noj netal a vino.

¹¹ Ach in c'ajol, manchak entaknej el is tenchebal Jehová, manchak cabax aj a c'ul yet chach yak'on cuenta.

¹² Yujtol a mac ay is camc'ulal Cham yin, chi yak' cuenta axca chi yun yak'on cuenta junok mamej yuninal tol chi tzaloj yetok.

¹³ Caw wal tzalojc'ulal yet mac chi yi' is jelanil, c'al yaj can is nabal.

¹⁴ Yujtol yelxac'al watx' juntzan tu' yintak ch'en plata, chi aj wal can watx'ilal bay yintak ch'en oro.

¹⁵ A wal jelanilal tu', yelxac'al watx' yintak ch'en chi oc yelbubok colk'abej. Tokwal chi je' co lajlen jun jelanilal tu' yetok juntzanxa tzet yetal caw wal ochebil.

¹⁶ Yuj jelanilal ok najatilbok a k'inal, yuj xan ok e c'apax a beyomal c'al a mimanbilal.

¹⁷ Ta chi co beybalnej jelanilal, tzalojc'ulalc'al chon eq'ui, cax ayc'al co junc'ulal.

¹⁸ A mac ay is jelanil tu', axca wal cawilej yayji bay. Caw wal tzalojc'ulal yet mactxel chi je' yuj mitx'on waayok.

¹⁹ Yetok is jelanilal, c'al ojtakbilal max watx'nej Jehová satcan, c'al sat tx'otx' ti'.

²⁰ Yuj is jelanil tu', xan chi ajol nuk'lak aej, cax chi tit yal ak'bal xol asun.

²¹ Ach in c'ajol, manchak a bek c'ayil a jelanil c'al aj nabalil; manchak eil a sat yin.

²² Yujtol ok najatilbok a k'inal yuj, watx' ok ach eloc satak eb anima yuj.

²³ Yinxac'al junc'ulalil ok yun ec'jabi, cax c'am bay ok ach ayc'ayok.

²⁴ A yet ok ach xewok, c'amc'al a xiwc'ulalil, yinc'al tzalojc'ulalil ok ach wayok.

²⁵ C'amc'al tzet cha na', ta c'uxan ok jay c'aybanil eban, axca chi yun jay yiban eb yob beybal.

²⁶ Yujtol chaoc Jehová yipok a c'ul, xan man ok ach cha ayc'ay yul junok yal.

²⁷ C'am bay tol man ok ach oc yetok mac ok k'anon colwal ayach, tatol chi je' a colwaji.

²⁸ Ta chi je' a colwaj tinani', manchak ala' tol ato yet yecal chach colwaji.

²⁹ Manchak a na ak'on yobc'ulal yin mac cajan a cawilal, tol c'am is cabc'ulal en.

³⁰ Manchak ak' owal yetok junok mactxel, ta c'am tzet yob chi yun ayach.

³¹ Manchak ochej oc beyomal eb c'am yabenc'ulal, tamwal chot a ba axca is beybal eb tu'.

³² Yujtol c'am chi cha c'ul Jehová eb yobtakwom tu'; a pax eb watx' xin, watx' yak'on yetok.

³³ Chi yatok Jehová catab yiban eb yobtakwom; axa pax eb watx' xin, chi yak' watx'c'ulal yiban eb.

³⁴ Chi buchwaj Cham yin eb buchwajwom; a pax eb yaynakil chi yut ba xin, caw wal chi yak' is watx'c'ulal bay eb.

³⁵ A wal ioj aj canilal ayoc paktzebalok bay eb aj nabal, axa eb yob nabal xin, toxac'al chi elcan q'uixwil eb.