Pr 26 - A Txꞌan Biblia Yin Kꞌanjobal 1989

¹ Man watx'ok tol ay sakbacom yet c'atxanil, tamwal nabil k'inal yet ay wajoj sat awoj, tamwal moj ay mimanbilal eb yob is nabal.

² Axca junok no' tz'unun toc'al chi eq'ui ma axca no' q'uisom satcan c'am bay chi oc waanok, axca tu' a catab k'anej chi al-lay yin tol c'am tzet yujal, c'am chi oc yopiso.

³ Chicote chi oc yin no caballo, freno chi oc yin ti' no burro, axa te c'ax chi oc yin yichin junok yob nabal.

⁴ Manchak ach tak'wi bay junok yob is nabal, yet chi yalon is yob nabalil tu' ayach, yet watx' man lajanok chon yetok.

⁵ Tak'wan bay junok yob is nabal axca mojalil is yob nabalil tu', yet watx' chi nachaj el yuj tol yob is nabal.

⁶ Ta chi co chek junok yob is nabal yin junok co chekbanil, lajan wal axca tol chi co tzoc'tok jakan; toc'al chi co saytek yatakilal jiban.

⁷ A yakan junok coxo c'am yopiso; caytu' nabalej chi yal junok tol c'am is nabal.

⁸ Tokwal watx' chi co c'albaj oc ch'en ch'en yul junok jurjubej, cay c'apax tu' man watx'ok, ta chi co mimanbilnej junok c'am is nabal.

⁹ A junok c'am is nabal chi yak'lej yalon el k'anej yet jelanilal, lajan axca junok uq'uem an chi yak'lej yion ajtek q'uix yul k'ab.

¹⁰ A junok patrón chi yaoc junok c'am is nabal, ma uq'uem an yin is mulnajil, lajan wal axca junok comonc'al chi julwaji, comonxac'al chi low yin anima yuj.

¹¹ A no tx'i', chi meltzoj no' lek'on aj is xaw, caytu' eb yob is nabal chi meltzoj yin is yob nabalil.

¹² Ayto wal janic'okxa watx'ilal yin eb yob nabal yintak pax eb chi yaloc ba jelanil.

¹³ Chi yal junok isaj tol a bay yul calle ay junok no coj chi makwaji, yujtol c'am chi yochej chi toj mulnajil.

¹⁴ Axca chi yun beyic' junok puerta yuj is bisagrail, caytu' chi yun meltzojtakbi junok isaj bay is wayub.

¹⁵ A junok isaj chi yaytok k'ab bay yul sec', palta c'am chi yaoctok lobej tu' yul is ti'.

¹⁶ A junok isaj chi na tol jelan yintak ukwanok anima yojtak chi tak'wi yin watx'il.

¹⁷ A mac chi yaltok yet xol owal bay c'am yalon yet, lajan wal axca tol a txiquin junok no tx'i' chi co mitx'a'.

¹⁸ Axca junok loco chi julwaj yetok julbalej ayoc k'ak'al,

¹⁹ caywal tu' mactxel chi yetnej junok yamigo, chi lajwi tu' cax chi yalon paxajok tol sakach chi yunej.

²⁰ Ta c'am te si', chi tanil k'ak'ej; ta c'am wajoj k'anej chi lajwi owal.

²¹ Axca chi yun yion yip k'ak' k'ak' ayoc yin tzak'ak' yet chi alay oc si' yiban, axca tu' chi yun yaj can owal yuj mac tol yinc'al ak'oj owal chi eq'ui.

²² A is k'anej eb wajom k'anej lajan axca junok tzet yetal watx' loji, tol chi tojtac'al bay yulak co c'ul.

²³ Axca jabok pintura plata chi alay oc yin junok tx'otx' xij, caywal tu' juntzan k'anej manxa watx'ilok chi yal junok anima yob tzet naan yuj.

²⁴ A mactxel ay is yobc'ulalil, watx'xac'al chi yut k'anjab ba, axa pax yin is nabal xin, a tu' ay is yob nabalil.

²⁵ Caxc'al watx'xac'al k'anjab ayach, manchak a cha abej, yujtol a is nabal tu', caw wal nojnak el yuj yob nabalil en.

²⁶ Caxc'al c'am chi yochej chi tx'oxil is yajc'ulalil, palta yowalil chi txecloj el satak masanil anima.

²⁷ A mactxel chi joton junok olan, ac'al oc bay yul jun tu' chi ayc'ayi; a mactxel chi tenon aj junok ch'en, ac'al oc yiban chi tit canok.

²⁸ A junok lek'ti' chi yetnej junok bay ay is yobc'ulal; a junok chi tz'ak yal watx'il, miman tzet chi yetnejtok.