Pr 24 - A Txꞌan Biblia Yin Kꞌanjobal 1989

-19-

¹ Manchak ochej oc is tzet yetal eb yobtakwom, tamwal chochej chach ayji ec' xol eb;

² yujtol asan yin etnej anima ayoc nabal eb, axac'al yobtakilal tu' chi yalubtanej eb.

-20-

³ Yetok wal jelanilal chi watx'nelay aj junok na, yetok aj nabalil chi aytok cimientoal yich.

⁴ Yuj chi nachaj el yuj mac ay yet, xan chi noj is cuartolak yuj tzet yetal tol ay is tojol, c'al watx' yili.

-21-

⁵ Yelxac'al watx' eb aj nabal, yintak pax eb tol ay yip; yelxac'al watx' tol ay tzet jojtak yintak pax tol ay jip.

⁶ Tatol ok ak' owal, k'anlej ec' a nabal; ta xiwil mac ok ak'on a nabal, ok je' oj.

-22-

⁷ A junok c'am is nabal, c'am chi nachaj el yuj tzet yetal chi yal satak eb yajaw bay despacho, xan toc'al chi tz'inji elok, yujtol c'am is jelanilal.

-23-

⁸ A mactxel asan yak'on yobc'ulalil chi na', xiwil chi binaj yuj is yob nabalil tu'.

⁹ A tzet chi na eb c'am nabal, a ton mulej; c'am mac watx' chi yab yuj eb buchwajwom.

-24-

¹⁰ Tatol chi cabax aj a c'ul yet ayach oc yin a cawxinakil, c'am a tec'anil chi yal tu'.

-25-

¹¹ Col eb tol chi ilaytok bay camich; mitx' waay eb tol lanan toj k'ek'on bay yolanil mukbanil camnak.

¹² Caxc'al chala' tol man ojtakok, palta a Cham chi beyc'ulnen el tzet ay yin a nabal, ok yak' ojtaknej elok; a Cham chach tayneni yojtak tzetbil yayji ocok, a ok tojlanen bay junjun atac'ala' is yunben.

-26-

¹³ Ach in c'ajol, uc' yal cabil no akan manxa chialok; ablej wal jabok chial ayoc yin.

¹⁴ Axca tu xin, caw wal watx' jelanilal c'al ojtakbilal ok abej. Tatol ok chaloj oj, watx' ok yun el ocok, axa tzet yetal ayoc yipok a c'ul, c'am yechel ok lajwok ayok.

-27-

¹⁵ Manchak a na nabalej yob yin anima watx' is nabal, manchak elk'anej tzet yetal ay yul yatut;

¹⁶ yujtol caxc'al chi ayc'ay ukelok, ac'ala' ukel ok aj pax wan; a pax eb yobtakwom xin, chi ayxac'al c'ay eb yin junelnej.

-28-

¹⁷ Manchak ach tzaloj yet chi ayc'ay mactxel ajc'ul oc en.

¹⁸ Ta chach tzaloj yuj xin, manxa ok yaoc Jehová yowal c'ul yiban, yujtol man watx'ok a tzalojc'ulal tu' yul sat Cham.

-29-

¹⁹ Manokab yobok chabej yet chi aj can eb yobtakwom yin beyomal, tamwal chel oc a c'ulok yin is tzetak yetal eb,

²⁰ yujtol a eb yobtakwom tu', man watx'ok yet eb; toc'al ok tanay eb axca junok tzektebalej yet yajtok tu'.

-30-

²¹ Ach in c'ajol, ayokab yelapnok Jehová yul a sat c'al cham rey; manchak a junanej a nabal yetok eb ajc'ul oc yin cham rey tu',

²² yujtol jun bek ok jay is camichal eb, axa lajwi ay eb tu'. C'am mac yojtak tzet yailal ok yak' Dios, c'al cham rey yiban eb.

Juntzanxa k'anej max yal eb aj nabal

²³ Yetok c'apaxok, a juntzan ti' max yal eb aj nabal: Yelxac'al man watx'ok ta a satak beyc'ulal ay q'uexanil eb anima.

²⁴ A junok juez toc'al chi bekil eb ay is mul, yob chi yal eb conob yin, chi intaknelay el yuj masanil anima.

²⁵ A pax mactxel chi awi oc yailal yin eb ay is mul, watx' chi el ocok, axa eb anima, watx' chi yal eb yin.

²⁶ A mactxel watx' chi yun paktzen junok k'anej, lajan wal axca junok chi tz'ubon el ti' junok mactxel.

²⁷ Manchakto a watx'nej a na, tatol c'amto tzet ay ayach yuj tzet ok yun yec' tiempo oj.

²⁸ Man comonok chal k'anej yin et animail, tamwal chal k'anej man yelok yin.

²⁹ Manchak a na a pakon a ba yin et animail, axca wal chach utlayi.

³⁰ Max in ec' bay mulnajil junok isaj, a ton yawoj uva jun c'am nabal tu'.

³¹ A tzet yetal max wil bay jun tx'otx' tu', asanc'al q'uix chi ch'ibajok, yetok is corral ch'en mayal uchchajtok.

³² A yet max wilon juntzan ti' max in c'ubancan yin in nabal; max wioncan jun in cuybanil yin.

³³ Yak'ban chach way jabok, c'al wacxi a jolom a wayi, cax cha jeltzobnen a k'ab yin a xewi,

³⁴ axa mebil chi jayoc en, axca wal junok elk'om ibil oc arma yuj, caytu' ok yun jayi.