Pr 23 - A Txꞌan Biblia Yin Kꞌanjobal 1989

-6-

¹ Ta ay junok eb cham mimek winak chach awten lowok, chi cam a naoni, mactxel cham bay ayach ec' satak tu'.

² Caxc'al mi xiwil a wajil, palta watx' tol cha yanej low a ba.

³ Man yelokxac'al chi cam a loon jun loj manxa watx'ilok tu', talaj toc'al chi yochej jun tu' chach yetnej.

-7-

⁴ Manchak ak'xac'al ep oc yin beyomal; manchak ach oc il yuj juntzan tu'.

⁵ A ch'en tumin, junnej bek chi lajwi ay ch'en, ayman chi toj ch'en axca toj jenenok no' tx'acbaj, axcaxac'al tol mayal elol xic'.

-8-

⁶ Manchak ach low bay meẍa junok bas, manchak ochej oc is lobej manxa watx'ilok.

⁷ A jun aj loj tu', miman chi na' yin tojol jun loj tu'; caxc'al chi tz'ak yala': Lowan, ẍi, palta c'am chi yal yin masanil c'ul.

⁸ Ok a xayej el tzet yetal max a loaytok tu', cax c'am yopiso a k'anej tol watx'xac'al max yun alon bay.

-9-

⁹ Manchak al watx' nabalej bay junok tol yob is nabal, yujtol toc'al ok buchwaj yin a watx' k'anej tu'.

-10-

¹⁰ Manchak a q'uex mojonal tx'otx' tol aycan ay yettax payxa, tamwal cha tok'ic' satak eb c'amxa is mam, c'amxa is txutx,

¹¹ yujtol a Cham ay yipalil ok colon el eb, c'al yak'on owal etok.

-11-

¹² Acbaj wal a txiquin, c'al a nabal bay cuybanilej, c'al bay ojtakbilal.

-12-

¹³ Manchak a bek ak'on cuenta junok unin, tokwal ok cam yuj jayebok tz'um chak' yika'.

¹⁴ Palta tatol ok ak' cuenta, lanan a colon el bay camich.

-13-

^15-16 A wal yet ok eon a jelanil, ach in c'ajol, c'al yet ok waben a k'anjab axca wal is mojalil, caw wal miman ok tzalojbok in c'ul.

-14-

¹⁷ Manchak ochej oc is tzet yetal eb yobtakwom; a ti' et, tol ayokab yelapnok Jehová yul a sat.

¹⁸ Ta axca tu' ok onej, caw wal watx' ok ach el ocok, axa tzet ayoc yipok a c'ul, c'am yechel tol ok lajwok ec'ok.

-15-

¹⁹ Ach in c'ajol, taynej abej, cha cuyoni; ak' ep a toj yin beybalej watx'.

²⁰ Manchak a junanej a ba yetok eb uq'uem an, tamwal yetok eb yelxac'al chi ec' yiban lowi,

²¹ yujtol a eb uq'uem an, c'al eb miman chi low tu', ok lajwokxac'al ay eb yuj mebil. A eb isaj tu', toxac'al olquiẍtak is pichil eb ok yaocok.

-16-

²² Cha ab tzet chi yal a mam, mac max ach pitzc'oneni; manchak entaknej el a txutx yet ixnamil ixxa.

²³ Ak' ep a sayon tzet yetal tol yel yetok jelanilal, cuybanilej c'al aj nabalil; a juntzan tu' c'am chentaknej elok.

²⁴ A is mam junok uninalej watx', tol aj nabal, moj ton tol chi tzaloj eb c'al maynen ba eb.

²⁵ Yuj tu xin, ak' tzalojbok c'ul a mam, c'al a txutx, yet watx' miman yelapnok eb ok yabej.

-17-

²⁶ Ach in c'ajol, taynej ab tzet ok wala', chi cam wal elon in beybal;

²⁷ yujtol a junok ix ix chi mulji yul k'ab yichamil, lajan wal yetok junok xab olan najat yich palta txennej yul;

²⁸ chi makwaj yul be axca junok elk'om, xiwilxa winak chi etax el yuj.

-18-

²⁹ ¿Mactxel chi yab yail? ¿mactxel chi el yaw? ¿Mactxel chi ec' ya' chi yabej? ¿Mactxel chi yasjitok yin tol c'am tzet yujal? ¿Mactxel tol cakxac'al yul sat?

³⁰ A ton mactxel tol c'am chi bekcan uq'uej an, ayc'al oc yin yablen tzetbil yuq'ui an.

³¹ Manchak ach occ'al t'anan yin an an tu'; cakxac'al yili yul is copail, subojxac'al yaytok an.

³² Axa is lajubal xin, lajan wal axca junok no labaj tol manxa yailok bay chi chi'.

³³ Xiwilxa tzet yetal ok ak'i el yuj, xiwil tzet yetal man watx'ok ok ala', c'al a naon yuj.

³⁴ Axcaxac'al tol yiban a' mar ayach oc chabej; oybinakxac'al ay a sat, axq'uijanxac'al tol a chon junok miman teal barco ayach ajtok chabej.

³⁵ Cax ok alon axca ti': Max in is mak' eb, palta maj wab yail; max wik tz'um, palta maj wabej; axa yet chi el lenaj chi wila', chin toj pax in sayon an junelxa, cachi mi.