Pr 22 - A Txꞌan Biblia Yin Kꞌanjobal 1989

¹ Yelxac'al watx' tatol watx' co binaji, yintak pax tol xiwil ch'en oro c'al ch'en plata ay ayon.

² A junok beyom, c'al junok meba', lajanc'al el eb, a eb cawan tu', a Jehová max watx'nen eb.

³ A mactxel aj nabal, chi yil tzet yetal ay is may, cax chi colon ba bay; a pax mactxel tol c'amto is nabal xin, chi beyc'al toji, masantac'al chi yal yayc'ay yuj yatakilal tu'.

⁴ A yin jion ay co ba, c'al yin tol ay yelapnok Jehová yul co sat, chi ji beyomal, mimanbilal c'al k'inalej paktzilok.

⁵ A bay yul-lak is be eb yobtakwom, xiwilxa q'uix c'al tx'an yal ayayok; a pax mactxel tol chi taynej ba xin, man ok ayc'ay yul yal tu'.

⁶ Ak' watx' cuybanilej bay eb unin tinani', yet watx' chi beybalnej eb watx' beybalej, axa yet ok oc eb icham animail, man ok yican el ba eb yin.

⁷ A eb beyom, axca rey yayji xol eb meba'; a xol eb jequelwom, a ton eb chi ak'on tumin tu', yajaw yayji yiban eb.

⁸ A mactxel asan yobtakilal chi yunej, asan yatakilal ok cha'; axa is yetnewomal, ok lajwok ayok.

⁹ A mac elbej yel yuj, ok cha watx'c'ulal yuj pojon ec' is lobej xol eb meba'.

¹⁰ A yet chi ilay eltok junok buchwajwom, chi lajwi ay teyelejbail, owal, c'al tx'emlejbail.

¹¹ A junok rey caw wal chi tzaloj yetok nabalej watx', cax chi tx'ox is watx'c'ulal bay mactxel watx' k'anjabi.

¹² Taynebilc'al eb aj nabal yuj Jehová, palta chi tenic' Cham tzet yetal chi yal eb lek'ti'.

¹³ A junok isaj, chi yala' tol a bay yul calle ay jun no coj chi yochej chi mak'on camok; chi yal axca tu' yet watx' c'am chi toj mulnajil.

¹⁴ A wal is k'anej junok ix chi mulji yul k'ab yichamil, lajan wal axca junok xab olan, a bay tu' chi ayc'ay eb chi catabnelay yuj Jehová.

¹⁵ A c'am nabalil ayc'alta' yin eb unin, palta chi el jun tu' yin eb ta chi mak'lay eb yetok c'ax.

¹⁶ A mac tol yuj chi yochej chi oc beyomal, xan chi yetnej eb meba', c'al mac chi yak' montebal bay eb beyom, a eb tu' yinxac'al mebil ok yun lajwokcan ay eb.

A treinta k'anej eb aj nabal

¹⁷ Ab xin, ok ach in cuy yin tzet yetal max yal eb aj nabal, chi cam a cuyon xin.

¹⁸ Watx' tatol cha c'ubaj yin a nabal, yet watx' chi je' alubtanen masanil.

¹⁹ A wal tinani' chi wak' wal ojtaknej elok, yet watx' chawal oc a nabal yin Jehová.

²⁰ Ti chin tz'ibej treinta k'anej ayach; a juntzan k'anej ti' ay nabalej c'al ojtakbilal ibil oc yuj,

²¹ yet watx' chi tx'ox tzet yetal watx' c'al yel, tol moj chojtaknej elok, yet watx' chi je' alon wal yin watx'il bay mac chi k'anlej yab ayach.

-1-

²² Manchak etnej junok meba' yujtol c'am chi je' colon ba, tamwal chetnej junok mactxel tol c'am mactxel chi colon satak eb yajaw.

²³ Yujtol a Jehová ok colonok, axa Cham ok paktzen ayach yuj tzet chon tu'.

-2-

²⁴ Manchak a junanej a ba yetok eb anima yob is nabal, c'al yetok eb toc'al chi chichon c'ul,

²⁵ axa talaj chi yun ajok, cha cuyontok is yob beybalil tu', cax cha sut'on cam a ba.

-3-

²⁶ C'amc'al bay chaoc a ba a tojlanen is jec junokxa anima,

²⁷ yujtol ta c'am tzet watx' chi yun a tojlaneni, toltax a wayub chi je' yilay ec' ayach.

-4-

²⁸ Manchak a q'uex mojonal satakej aycan ay yuj eb echmam.

-5-

²⁹ A mactxel watx' chi yut mulnaj ba, a ton jun tu' ok mulnaj bay eb rey, cax manak bay juntzan anima tol c'am yelapnok ok mulnajok.