Pr 21 - A Txꞌan Biblia Yin Kꞌanjobal 1989

¹ A yul k'ab Jehová ayoc is nabal eb rey; a Cham chi ikban nabal eb tu', axca chi yun yilay ec' a' aej xol junok awoj yet chi oc yal.

² A eb anima chi na eb tol watx'c'al tzet chi yun eb, axa pax Jehová chi beyc'ulnen el nabalej.

³ Beybalnej watx'ilal, c'al tojolal; a juntzan tu' chi yochej Jehová yintak pax xajanbal.

⁴ A mac can ayaj sat yuj maynen ba, yobtakwom toni; toltax is nabal jun tu', yobtak yayji.

⁵ A junok tzet yetal tol chi cam nalayi, watx' chi elocok; a pax tzet chi uj yinc'al yaxc'ayinakil xin, ibil oc mebil yuj.

⁶ A mac chi yi is beyomal yin lek'tial, jun wal bek chi eq'uelok, axa camich chi saya'.

⁷ A eb yobtakwom, ac'al oc yobtakil chi yun eb tu', a chi ak'on lajwok ay eb, yujtol c'am chi yochej eb chi beybalnej tojolal.

⁸ A is beybal eb yobtakwom, man tojolok, a pax is beybal eb anima watx' is nabal, caw wal jichan.

⁹ Yelxac'al watx' chon ayji bay junok yaliẍ lanchu, yintak pax tol a bay junok miman na yetok junok ix ix owalc'al ay.

¹⁰ A eb yobtakwom, asanc'al yobtakil naan yuj eb yuneni; c'am bay chi yak' eb watx'c'ulal bay yet animail.

¹¹ Ta chi alay oc yailal yiban junok ch'aan, ok nachaj el yuj eb c'amto nabal, a pax mac ay is nabal xin, asan yet chi al-lay bay, cax chi nachaj el yuj.

¹² A Cham Dios tojol, chi cam wal yilon oc eb yobtakwom, asanc'al yatakilal chi yatok yiban eb.

¹³ A mactxel c'am chi cha yab is tewilal eb meba', man c'apax ok chalay is tewilal yuj Dios yet ok k'anon colwal Cham.

¹⁴ A sabalej chi ak'lay yin ewantakil, chi oc wanaj yowal c'ulej yuj.

¹⁵ A yet chi watx'nelay el junok k'anej yin tojolal, a junok mactxel tojol is nabal caw wal chi tzaloji, axa mactxel yob is nabal xin, caw wal chi xiwaj yuj.

¹⁶ A mactxel chi yican el ba yin watx' beybalej, a jun tu' lanan tojcan bay xol eb camnak.

¹⁷ A mactxel chi yaxac'al oc ba yul k'ab ochewalil yin uq'uej an, c'al yin mimek loj, yinxac'al mebail chi yuncanok.

¹⁸ A wal eb anima man watx'ok, caw wal ok yab yail eb q'uexelok eb tojol is nabal.

¹⁹ Yelxac'al mi watx' tol chon ayji bay junok lugar tol tz'inini, yintak pax tol chon ayji yetok junok ix ix tol owalc'al ay.

²⁰ A bay yatut junok aj nabal, ay loj c'al tumin c'uan ec' yuj, axa pax jun c'am is nabal xin, chi yak' lajwok yin aymanil masanil tzet yetal chi yi'.

²¹ A mactxel tojol, c'al watx' chi yut ba, chi cha' is cawil, c'al is mimanbilal, watx'c'al yul sat Dios.

²² A mactxel ay is nabal, chi je' yoc yak'on owal yin junok conob tol taynebil wal sic'libil, cax chi yuchon ay is murallail jun conob tu'.

²³ A mactxel chi taynej ba yin tzet yetal chi yala', chi col ba xol yatakilal.

²⁴ A mac ch'aan c'al lues, chi ec'xac'al yiban maynen ba; buchwajwom chi yika'.

²⁵ A eb isaj, chi cam eb yin yochen tzetak yetal, yujtol c'am chi yal c'ul eb chi mulnaji.

²⁶ Masanilc'al c'ual chi yochej eb junok tzet yetal; a pax junok tojol xin, elbejc'al yel yuj.

²⁷ C'am chi cha' c'ul Jehová is yofrenda eb yobtakwom, akxam wal yofrenda eb chi yitek yin yob nabalejal.

²⁸ A mac chi oc yin lek'ti' testigoal, ok lajwok ayok; a pax mactxel chi cam yaben xin, a jun tu' chi mayjic'al is k'anej.

²⁹ A eb yobtakwom, chi tz'ak tx'oxil eb tol watx' yayji eb; a pax mac watx' is nabal xin, watx' ton yayji oc yin is beybal.

³⁰ C'am jelanilal, tamwal ojtakbilal, tamwal nabalej chi je' tenon oc wanaj yochwan Jehová.

³¹ A nak winak chi watx'nej aj tz'um is chej, cax chi toj yin owal, palta asan yuj Jehová xan chi je' yuj.