Pr 20 - A Txꞌan Biblia Yin Kꞌanjobal 1989

¹ A eb chi uc'wi vino, chi buchwaj eb; chi aj uchnaj eb yuj an cerveza; a junok aj nabal, c'am chi yak' ayc'ay ba yin uq'uej an tu'.

² A junok rey tol ow, lajan wal axca junok no coj chi el yaw yuj yowal; a mactxel chi tec'baj ba tx'emoni ay is may chi cami.

³ Caw wal watx' yet mactxel chi tenchanen ay teyelejbail, palta a mac yob is nabal xin, chi yiaj owal.

⁴ A mac isaj, c'am chi mulnaj yet tiempoal yoc awoj, xan a yet chi ajapnok tiempoal yoc sat awoj, c'am tzet chi waja'.

⁵ A tzet yetal ewantak yayji yin nabalej, lajan wal axca a' aej ay yul junok olan najat yich; a pax mactxel ay is nabal xin, chi je' yojtaknen elok.

⁶ Xiwil mac chi yala' tol ayc'al is camc'ulal jin, palta jaywannej mac chi je' jaon oc yipok co c'ul.

⁷ A mactxel caw wal tojol is nabal, cax c'am jabok tacnakil yin is beybal, caw wal yin tzalojc'ulalil chi yun cancan eb yuninal.

⁸ A yet chi ay chotan junok rey bay is despacho yuj beyc'ulnewi, asan tol chi oc t'anan yin, cax chi c'ayil yobtakilal.

⁹ C'am mactxel chi je' yaloni tol watx' is nabal, tol c'am is mul.

¹⁰ A echbal man tz'akanok, c'al cuerda miman, a wal cab tu' c'am chi cha c'ul Jehová.

¹¹ A yuj is beybal junok mactxel, xan chi ojtaknelay elok; toltax eb unin chi txecloj el yin eb yuj tzet chi yun eb.

¹² A Jehová max watx'nen co txiquin yuj jabeni, c'al co bak' sat yuj jiloni.

¹³ Manchak a bek a ba yul k'ab wayan, talaj chi jay mebail eban; ak' ep a mulnaji yet watx' ok yak' sobra a lobej.

¹⁴ Yobc'al tzet che txon tinani', ẍi mactxel chi manji; axa yet mayal manji xin, chi yaloni tol caw wal jelan yin manji.

¹⁵ Xiwil oro, c'al ch'en ch'en watx' yili bay yulyibank'inal ti', palta man comonok chi ilchaj junok chi k'anjab yin aj nabalil.

¹⁶ Ta ay mactxel chi wabaj ba yin junok tx'ok animail, checan el is pichil, cax cheoncan yin majanbilal.

¹⁷ A janic'ok lobej junok mactxel chi yi' yin elk'an, caw wal watx'xac'al loji chi yabej; axa yin tzunanil xin, axcaxa c'aj ch'en ok yab yul is ti'.

¹⁸ A tzet yetal chi nalayi, chi yi ba yuj junok watx' nabalej; chi je' yayc'ay junok owal, ta watx' chi yun lajtinelayi.

¹⁹ A junok wajom k'anej, c'am chi makchej ay junok tzet yetal tol ewantak yayji, yuj tu' xan manchakc'al ach ayji yetok anima alom k'umal.

²⁰ A mactxel tol chi baj is mam ma is txutx, ok lajwok ay is k'inal axca junok tzektebalej chi tani.

²¹ A beyomal tol chi ilay yin subojal yet babelal, axa yin lajubal xin, c'amxa tzet chi oqui.

²² C'amokab chala': Ok in pak in ba, man cachiok. Aoc a c'ul yin Jehová, a Cham ok watx'nen elok.

²³ A wal echbal man tz'akanok, caw wal chi yajlay yuj Jehová.

²⁴ A wal caw Jehová chon ikbani, xan man jojtakok tzetc'al ok yun co beytok.

²⁵ Ay wal is may, tatol yin aymanil chi jak' co ti' bay Dios, chi lajwi tu' cax chi co naon pax co ba bay max jak' co ti' tu'.

²⁶ A junok rey tol ay is nabal, chi yuktej el eb yobtakwom satak, cax chi can eb yalan yuj.

²⁷ A nabalej chi yak' Dios ayon, a chi tx'oxon ayon yin co sayon jil janimail.

²⁸ A junok rey watx'xac'al yayji yin yikbej, tatol chi beybalnej camc'ulal c'al tojolal.

²⁹ A yipal eb ach'ej ayoc is maynejbailok; a pax is mimanbilal eb icham winak xin, a ton yuj sakxa xil jolom eb.

³⁰ A mac yobtakwom, chi jaycan is nabal yuj bay chi yab yail, c'al bay chi yasjitok.