Pr 2 - A Txꞌan Biblia Yin Kꞌanjobal 1989

A tzet yetal chi ji' yin jelanilal

¹ Ach in c'ajol, aoc juntzan in k'anej ti' yin a c'ul; c'ubaj juntzan in chekbanil ti' yin a nabal.

² Acbaj wal a txiquin bay jelanilal, ak' ep a nabalnen elok.

³ K'an a jelanil, c'al aj nabalil yin masanil a c'ul.

⁴ Ak' wal a tiempo yin tz'akanil yin a sayon ec'ok, axca wal chi yun saylay ch'en plata, ma junok beyomal tol c'uan elok.

⁵ Caywal tu' ok yun nachaj el oj tzet yayji oc tol ay yelapnok Jehová yul a sat, c'al ojtaknen el Cham.

⁶ A Jehová chi ak'on jelanilal; a is k'anej chi ak'on ojtakbilal, c'al aj nabalil.

⁷ A Jehová chi yak' is colwal bay eb c'am is mul, c'al bay eb watx' is nabal.

⁸ Chi taynelay eb watx' chi yut ba yuj, chi col-lay eb tol yikem chi yut ba.

⁹ Tatol chacbaj a txiquin yin in chekbanil, ok ojtaknej el bay ijanilal, c'al tojolal, yetok watx' beybalejal.

¹⁰ Axca tu' ok yun yayji ec' jelanilal yin a nabal, cax ok ak'on a nabal yetok tzet yetal ojtak tu'.

¹¹ A jelanilal c'al aj nabalil, a wal juntzan tu' ok ach colonok.

¹² A juntzan tu' ok ach colon el bay yob beybalej, c'al bay yul k'ab eb anima yob is nabal,

¹³ a ton eb chi bekoncan be watx', cax chi tojcan xol yobtakil;

¹⁴ tol chi yak' wal eb nabal yetok, cax chi chaon eb k'inal is yob beybalil tu'.

¹⁵ Yin beybalej yob chi yaoc eb is nabal, chi bekoncan eb watx' beybalej.

¹⁶ A jelanil, c'al aj nabalil ok ach colon el bay yul k'ab eb ix tx'ok ixal, c'al bay eb ix tx'ok conobal tol chach montej yetok k'anej manxa watx'ilok.

¹⁷ Ma junok ix chi bekcan yichamil, cax chi tojcan leyal Dios c'ayc'ulal yuj.

¹⁸ Tatol chach toj yul beal is na ix ix tu', axca wal tol lanan a toj yul beal camich.

¹⁹ A mac chi occantok bay yul na tu', c'amxa chi eltek junelxa, c'amxa yechel okto ec'jab yul beal k'inalej.

²⁰ Ec'jaban yin beybalej watx', cax cha beybalnen is beybal eb tojol.

²¹ A eb tojol is beybal, tol c'am wal jabok is tacnakil, najatil tiempo ok ayjok eb bay sat tx'otx' ti'.

²² A pax eb yob is beybal c'al eb etnewom, ok ilay el eb bay sat tx'otx' tx'otx', axca yoclay aj junok awoj.