Pr 16 - A Txꞌan Biblia Yin Kꞌanjobal 1989

¹ Ayon ti', ay jalon jet co naon tzet chi junej, palta asan Jehová chi je' yalon tzet chon elocok.

² A eb anima chi na' eb tol watx'c'al tzet chi yunej, palta xin, a Jehová chi beyc'ulnen el masanil tzet chi na eb.

³ Aoc masanil a nabal yul k'ab Jehová, axca tu' ok yun tzet cha na tu'.

⁴ A Jehová chi yak' yun is yochwan yin masanil; toltax eb anima yobtakwom, ay yalon yet eb yin yailal.

⁵ C'am chi cha c'ul Jehová eb chi maynej ba; t'inan ok chac'alta' eb yailal.

⁶ Yuj watx'c'ulal, c'al ikemal, xan chi ak'lay tan yobtakilal; tatol ay yelapnok Jehová yul co sat, chon el xol yobtakilal.

⁷ Tatol chi cha c'ul Jehová is beybal junok anima, toltax eb is yajc'ul chi oc yin junc'ulalil yetok.

⁸ Yelxac'al watx', caxc'al txennej tzet chi ji' yin watx'il, yintak tol miman chi ji' yin man tojolalok.

⁹ Ayon ti' chi cam co naon tzet chi junej, palta asan Jehová chi je' yaloni.

¹⁰ A junok rey chekbej Dios yayji, xan man is mojok chi yal tzet yetal tol c'am chi chalej ba yetok tojolal.

¹¹ A masanil echbalej tz'akan, txequel yayji yul sat Jehová; a Cham max nabalnen elok, xan ay echbalej.

¹² A eb rey, man mojok chi yun eb tzet yetal man tojolok, yujtol a yikbej eb, a yin tojolal chi yi' yip.

¹³ A eb rey chi camc'ulnej eb, c'al tzaloj eb yetok mactxel tol yelc'al chi yala'.

¹⁴ A yowal c'ul cham rey, camich chi yitek, axa junok aj nabal, chi na' tzet chi yun sictanen ayok.

¹⁵ Tatol chi tzetzon cham rey, c'amxa xiwc'ulalil camich jin, axa is watx'c'ulal cham, lajan wal axca yasunal babel nab.

¹⁶ Yelxac'al watx' ta chi ji' co jelanil, yintak ch'en oro; yelxac'al watx' tol ay co nabal yintak ch'en plata.

¹⁷ A is nabal eb tojol, tol chi pojc'al el ba eb yin yobtakilal; tatol chi co taynej co beybal, lanan co taynen co ba chi yal tu'.

¹⁸ A maynejbail, chi yitek ayc'aybail; tatol chi yiaj can ba junok mactxel, yintakxa tu' chi ayc'ayi.

¹⁹ Watx' tol yaynakil chi jut co ba yetok eb meba', yintak pax tol chi co pojic' tzet chi ji' yetok eb maynejbailwom.

²⁰ A mactxel chi cha yab cuybanilej, watx'c'al ok yun beytok; yelxac'al tzalojc'ulal yet mac tol a Jehová chi yaoc yipok c'ul.

²¹ A mactxel jelan, ok al-lay yin tol chi nachaj el yuj; a k'anej chabejtak, chi monchaj eb chi aben yuj.

²² A mac chi nachaj el yuj, chi aj can; a pax mac yob is nabal, asan yailal chi tit yiban yuj is yob nabalil tu'.

²³ A mac jelan, chi na tzet chi yut k'anjab ba, xan ay mac chi monchaj yuj is k'anej tu'.

²⁴ A k'anej watx', lajan wal axca yalcabil no akan; chi tzalojbi aj animailej, cax chi yion yip yuj.

²⁵ Ay wal be tol watx'xac'al toj jaloni, palta a yin lajubal xin, chon yitok bay camich.

²⁶ Watx' yet mac ay tzet chi yochej, yujtol a yochwan tu', a chi iptzen yin mulnajil.

²⁷ A junok yobtakwom, chi naobtanej yobtakilal, toltax a is k'anej, lajan wal yetok xak k'ak'ej.

²⁸ A junok c'aynaktok is nabal toc'al chi yiaj can owal; a yuj is wajoj k'anej tu', xan chi yajc'ulnej ba eb watx' yak'oni.

²⁹ A junok yaxc'ayinak, chi yetnej yamigo, cax chi ilaycantok eb yuj bay beal man watx'ok.

³⁰ A mac lanan naon yak'on yobal, chi mutz'mon sat, axa yet toxa chi yak' yobc'ulal tu' chi c'uxay is ti'.

³¹ A mac sakxa xil jolom, axca wal is corona yayji, a jun tu' chi yi' yuj is watx' beybalil.

³² Yelxac'al watx' tol miman chi jut co c'ul, yintak pax tol jelan on jak'on owal; yelxac'al watx' tol ayon chi co mitx' waay co ba, yintak pax tol chi ayc'ay junok conob juj.

³³ Caxc'al chi jaoc suerte yin junok tzet yetal, palta a Jehová chi tx'ox is yochwan yin.