Pr 15 - A Txꞌan Biblia Yin Kꞌanjobal 1989

¹ A junok tol watx' chi yun paktzen junok k'anej, chi tanay owal yuj; a pax mactxel ow chi yun paktzen xin, tol chi tec'al aj can owal yuj.

² A yet chi k'anjab jun aj nabal, caw wal chi cha c'ul eb anima yaj nabalil tu', a pax eb yob is nabal xin, a nabalej c'am yopiso chi yalc'al eb.

³ Tzanc'al bay ayc'al ec' Jehová; ayc'al oc sat yin eb watx' c'al yin eb yob.

⁴ A k'anej watx' tol chi ji' mimanil co c'ul yin, axca tol chon yak' pitzc'oj ajok, a pax etnewomal k'anej xin, manxa animaok chon yutcanok.

⁵ A mactxel yob is nabal, c'am chi cha yab tenchebalej chi yak' is mam; a pax mactxel chi cha yab xin, lanan tx'oxon elok tol ay is nabal.

⁶ Xiwilxa tzet yetal ay bay yatut junok anima tol watx' is nabal, a pax mac yobtakwom xin, asan bilc'ulal chi jayoc yiban yuj tzet chi yi'.

⁷ A mactxel tol jelan, chi yalil jelanilal tu'; a pax mactxel tol c'am is nabal xin, c'am yelapnok tzet chi yala'.

⁸ C'am chi cha c'ul Jehová is xajanbal eb yobtakwom, a pax eb watx' is nabal xin, watx' chi yun chalay is txaj eb.

⁹ C'am chi cha c'ul Jehová is yob beybalil eb yobtakwom, palta ay is camc'ulal yin mactxel tol watx' is nabal.

¹⁰ A mactxel chi bekcan watx' beybalej, yelc'ulal chi ak'lay cuenta. A mactxel c'am chi yochej chi tenchanelayi, ok camok.

¹¹ Txequelc'al yayji tzet yetal ay bay najatil yich cambal yul sat Jehová, akxam wal is nabal eb anima.

¹² A mactxel ch'aan, c'am chi yochej ay mac chi tenchaneni, tamwal chi k'anlej is nabal bay eb jelan.

¹³ A mactxel tol chi tzaloji, chi tzetzon sat; a pax mactxel chi cusi, cabtakc'al c'ul.

¹⁴ A mac aj nabal, chi sayic' ojtakbilal; a pax eb yob is nabal xin, chi tzaloj eb yetok is yob nabalilal tu'.

¹⁵ A mactxel ayoc yin bilc'ulal, yobxac'al masanil c'u yul sat; a pax mactxel chi tzaloj xin, k'inc'al yul sat masanil tiempo.

¹⁶ Yelxac'al watx' jet, tatol ay yelapnok Jehová yul co sat, caxc'al meba' on, yintak pax tol beyom on, palta ayonc'al oc yin bilc'ulal.

¹⁷ Yelxac'al watx' ta ay camc'ulal, caxc'al itaj chi co chi', yintak pax tol chibejc'al chi co chi', ayc'al pax owal.

¹⁸ A mactxel tol yaxc'ayinakc'al, asanc'al owal chi yiaj can; a pax mactxel tol ay mimanc'ulal xin, chi yak' tan owal.

¹⁹ A bay eb isaj, axq'uijan wal tol ay q'uix yul be; a pax bay eb anima watx' is nabal xin, jichanc'al be, c'amc'al tzet yetal ayay yul.

²⁰ A eb uninalej tol ay is nabal, chi yak' tzalojbok eb c'ul is mam; axa eb c'am is nabal xin, chi yintaknej el eb is txutx.

²¹ A mactxel c'am is nabal, chi yak' tzalojbok c'ul yetok c'am nabalil; a pax mac ay is nabal xin, chi yilc'al tzet chi yut beytok ba.

²² Ta c'am chi cam wal co k'anlen ec'ok, a tzet yetal chi co na', chi etax elok; a pax mac chi cha yab nabalej watx' xin, watx'c'al chi elocok.

²³ Watx' chi jabej ta watx' chi yun co paktzeni; manxa watx'ilok tatol chi chalej ba co k'anjabi.

²⁴ A beal k'inalej chi toj yajti', xan c'am chi aycantok jun jelan is nabal bay cambal.

²⁵ A Jehová chi yuch lajwok tzet ay yul k'ab mac chi mimanej ba, palta chi yak'c'al ayjok ec' Cham is satak eb xal ix camnakxa yichamil.

²⁶ C'am chi cha c'ul Jehová tzet chi na eb yobtakwom, palta caw wal chi cha c'ul Cham watx' k'anej.

²⁷ A mactxel xiwilc'al tzet chi yochej, chi aj can bilc'ulalil yiban, axa mactxel c'am chi chaon ch'en montebal tumin, ok najatilbok is k'inal.

²⁸ A mactxel tol tojol is nabal, chi cam naon tzet ok yut tak'wok ba; a pax mactxel yobtak is nabal xin, txololixanej yalon yobal k'anej.

²⁹ Najat chi el Jehová c'atan eb yobtakwom, axa pax eb tojol is nabal xin, chi chalay is txaj eb yuj Cham.

³⁰ A mac chi tzetzoni chi tzaloj aj co c'ul yuj; a junok watx' abix chon iptzeni.

³¹ A mactxel chi cha yab tenchebalej chi ak'on cawilej, ay yalon yet xol eb aj nabal.

³² A mac c'am chi cha yab tenchebalej, ac'al oc chi yintaknej el ba; a pax mac chi cha yab tenchebalej xin, tol chi yi' is jelanilal.

³³ A mactxel tol ay yelapnok Jehová yul sat, chi aj can is jelanilal; tatol chi jochej tol miman jelapnok, yowalil tol yaynakil chi jut co ba yin babelal.