Pr 14 - A Txꞌan Biblia Yin Kꞌanjobal 1989

¹ A junok ix ix aj nabal, caw wal chi watx'nej aj yul yatut; a pax junok ix c'am is nabal xin, tol chi yak' lajwok ayok.

² A mactxel watx' is beybal, ay yelapnok Jehová yul sat, a pax mac tol yob is beybal xin, tok ay yelapnok Cham yul sat.

³ A yuj tzet chi yal junok c'am nabal yin maynejbail, xan chi tit yailal yiban; a pax yuj is k'anej junok aj nabal xin, chi col-layi.

⁴ Ta c'am no wacax, c'am trigo yul c'una', a ton wal yuj yipal no wacax tu', xan chi aj can ixim.

⁵ A testigo watx', c'am chi yak' lek'tial; a pax eb yobal testigo xin, asanc'al lek'tial chi yal eb.

⁶ A mactxel chi maynej ba, chi say jelanilal, palta c'am chi chaloj yuj; a pax mactxel jelan xin, caw wal suboj nachaj el yuj.

⁷ Elan c'atan eb c'am is nabal, yujtol a yin tzet chi yal eb, c'am tzet che' yin.

⁸ A jelanilal mac jelan, a' chi ak'on yojtaknej el tzet chi yunej; a pax mac yob is nabal xin, ac'al oc is yob nabalil tu' chi etneni.

⁹ A eb yob is nabal, c'am tzet chi na eb, caxc'al yob chi yun eb, a pax eb anima watx' xin, man comonok chi tx'emwaj eb xol anima.

¹⁰ Junjunc'al yojtak tzet is bilc'ulal, c'al is tzalojc'ulal; a eb tx'ok animail, c'am yalon yet eb yin.

¹¹ A tzet ay eb yobtakwom ok lajwok ayok; a pax tzet ay eb anima watx' is nabal, tol chi aj can.

¹² Ay wal be tol watx' jaloni; ti tol a pax bay camich chon yicantok.

¹³ Caxc'al ay tzet yetal ya chi jabej, palta chon tzewi, yuj c'am chi co tx'oxilok. A nan xol co tzalojc'ulal, a tu' ay c'apax co cusc'ulal.

¹⁴ A mac chi elcan yintak Dios, toxac'al ok ispay el yuj tzet ok yun yelcan apnok, a pax mac watx' is beybal xin, watx' tzet ok yi' yuj is watx' beybalil tu'.

¹⁵ A mactxel c'amto is nabal, chi yac'al oc yin c'ul masanil tzet chi al-lay bay; a pax mac ay is nabal xin, chi cam yilon bay chi eq'ui.

¹⁶ A mactxel ay is nabal, chi xiw bay tzet yetal ay is may, cax chi pojon el ba yin; a pax mactxel yob is nabal xin, chi maynej ba, c'am yelapnok yul sat.

¹⁷ A mac c'un tit yowal, yob tzet chi yunej; ca c'apax tu', a mac chi cam naon tzet chi yun yak'on yobc'ulalil, ajc'ul eb anima yin.

¹⁸ A mactxel c'amto is nabal, chi cha wal paktzil atac'ala' is c'am nabalil tu'; a pax eb aj nabal xin, chi aj wal can is jelanilal eb.

¹⁹ A eb yobtakwom, chi ay nojan eb satak eb watx', cax chi tewi octok eb bay puertalak eb tojol is nabal.

²⁰ A eb meba', chi intaknelay el eb yuj yet animail; a pax eb beyom xin, xiwilxa yamigo eb.

²¹ Chi oc co mul, ta chi jintaknej el eb jet animail, palta caw wal watx' jet, ta chi ok' co c'ul yin eb meba'.

²² A mactxel asan yobtakil chi say yunej, chi c'aytok yul is be; a pax mac tol watx' tzet chi say yunej, yikem eb anima bay, cax chi camc'ul eb yetok.

²³ Ay tzet chi ji' yin tzanc'al tzet mulnajilal chi jak' jip yin; a pax yin tol k'anejc'al chi jun xin, mebil chi jay jiban yuj.

²⁴ A mac aj nabal, chi ilay can yuj is yaj nabalil; a pax eb yob is nabal xin, chi intaknelay el eb yuj is yob nabalil tu'.

²⁵ A junok testigo yel chi yala', chi colcan el yet animail bay camich, axa junok lek'ti testigo xin, chi yetnej yet animail.

²⁶ Caw wal tec'an co yipc'ulalil, ta ay yelapnok Jehová yul co sat; a c'apax yuj tu' xan chi col ba eb juninal.

²⁷ Ta ay yelapnok Jehová yul co sat, ay co k'inal yin, chon ilay el yul beal camich yuj.

²⁸ Ta a junok rey ayoc yin yajawilal yiban xiwilok anima, caw wal mimanbil chi yal tu'; ta txennej xin, ok lajwok ay chi yal tu'.

²⁹ Ta ay co mimanc'ulal, a jun tu' chi yal elapnok tol ay co jelanilal; ta c'un tit jowal xin, chi yal elapnok tol c'am co nabal.

³⁰ Ta junc'ulalc'al ayon, watx'c'al co c'ul yuj, a pax sawenc'ulal xin, chi c'uxlaytok co bakil yuj.

³¹ Ta ay junok mactxel chi etnen eb meba', lanan yintaknen el Cham max watx'nen eb, palta tatol chi ok' c'ul yin eb xin, lanan tx'oxoni tol ay yelapnok Cham yul sat.

³² A eb yobtakwom, ac'al oc is yobtakilal eb chi ak'on low yin; a pax mactxel watx' is nabal xin, toltax a yet chi cami, ay tzet ayoc yipok c'ul.

³³ A mactxel caw wal jelan, c'am chi maynej ba yetok is jelanil tu'; a pax mac c'am is nabal xin, caw wal chi mimannej ba yalon el jabok tzet yojtak.

³⁴ A yuj tojolal, xan caw wal chi aj can junok nación, a pax yuj yobtakilal xin, chi el q'uixwilal.

³⁵ A junok chekbej aj nabal, chi tzaloj cham rey yetok; a pax junok chekbej tol chi el q'uixwil cham yuj xin, chi tit yowal c'ul cham yin.