Pr 12 - A Txꞌan Biblia Yin Kꞌanjobal 1989

¹ A mac ay yelapnok ak'bal cuenta yul sat, chi yochej chi aj can is nabal; axa mac c'am chi cha yabej, c'am is nabal.

² A junok anima watx', a watx'il chi cha bay Jehová, axa mac yob nabal, chi lowcan yin yuj Cham.

³ A eb a yobtakilal ayoc yipok c'ul, lajan eb axca junok na watx'nebil yiban arena; a pax eb watx' is nabal xin, tec'an waay eb axca junok tzet yetal caw is xe'.

⁴ A junok ix ix tol watx'c'al tzet chi yunej, axca wal rey chi yut ix yichamil; a pax junok ix istzilej tol caw wal yob is nabal xin, caw wal chi yak' lajwok ay ix yichamil tu'.

⁵ A eb anima watx' is nabal, asan watx'ilal chi na eb; a pax eb yob is nabal xin, asan etnewal chi na eb.

⁶ Chi cam anima yuj is k'anej eb yobtakwom, axa pax is k'anej eb watx' is nabal xin, chi colchaj anima yuj.

⁷ A yet chi ayc'ay eb yobtakwom, chi lajwi ay eb junelnej, axa pax mactxel watx' is nabal, chi mayji yetok is familia.

⁸ Watx' chi al-lay yin eb anima yuj is jelanil, a pax mactxel c'am is nabal xin, intaknebil elok.

⁹ Watx' yet mac c'am wal yelapnok palta ay yak'omal serbil, yintak pax mac mimektak chi yut ba, palta c'am wal tzet watx' chi lo'.

¹⁰ A mactxel watx' is nabal, chi taynej is jobbejal no', a pax eb yob is nabal, caw wal chi yetnej eb no'.

¹¹ A mactxel chi mulnaj sat is tx'otx', ay is lobej; a pax mactxel c'am is nabal xin, asan yin tzet yetal tol c'am yopiso chi ec' tiempo yuj.

¹² A eb c'am Dios yul sat, chi yochej eb chi oc beyomal yin aymanil yuj yunen yobtakil; a pax eb watx' is nabal, a is mulnajil eb, a chi ak'onc'al tzet chi oc yuj eb.

¹³ A eb yobtakwom, ac'al oc is yobal k'anej eb tu' chi ioncantek yiban, a pax mac watx' is nabal xin, chi elcan xol yatakilal.

¹⁴ Junjunc'al mactxel chi cha paktzil tzet yetal chi yala', cax chi chaon c'apax paktzebal yuj tzetak chi el yuneni.

¹⁵ A mactxel yob is nabal, chi na' tol watx'c'al masanil tzetak chi yunej, axa mactxel tol ay is nabal xin, chi cha yab watx' nabalej.

¹⁶ A mactxel yob is nabal, jun bek chi tx'ox yowal; a pax mac ay is nabal xin, toc'al chi eq'uel tzet chi utlay tu' yuj.

¹⁷ A junok testigo tol watx'c'alta' is nabal, yel tzet chi yala'; a pax junok testigo toc'alta' chi etnewi, asan lek'tial chi yala'.

¹⁸ Ay mac chi yak' cus c'ul yet animail yuj is k'anej, comonc'al chi yala'; a pax mactxel watx' is nabal xin, caw wal chi mimanc'ulnelay eb ayoc yin cusc'ulal yuj is k'anej.

¹⁹ A mactxel yel chi k'anjabi, chi ayjic'al ec'ok; a pax eb lek'ti xin, jun ch'an bek chi c'ayil eb.

²⁰ A yin is nabal mac tol a yobal chi na' yuneni, ay etnewomal; a pax mac a watx'ilal chi na' yunen xin, tzalojc'ulalc'al ay.

²¹ A mactxel watx' is nabal, c'am junok tzet yobtak chi jay yiban; a pax eb yobtakwom xin, toxac'al ok ispay aj yatakilal yuj eb.

²² Caw wal chi yajlay eb lek'ti yuj Jehová; a pax mac c'am etnewomal chi yun xin, caw wal chi tzaloj c'ul Cham yetok.

²³ A mactxel ay is nabal, c'am chi yixac'al aj can ba yuj tzet yetal yojtak; axa mactxel c'am is nabal xin, chi tx'oxxac'al el is c'am nabalil tu'.

²⁴ A mac chi mulnaji, chi chekwaji; a pax mac isaj xin, chi cheklayi.

²⁵ A bilc'ulal chi yak' cusaj co c'ul, a pax junok watx' k'anej xin, chon yak' tzalojbok.

²⁶ A mactxel watx' is nabal, ikbajwom yayji yin watx'il bay yet animail; a pax mac tol yob is nabal xin, chi yikbaj yet animail yin yobal.

²⁷ A junok uktem no' tol isaj, c'am chi watx'nej el no no' chi michchaj yuj; a pax mactxel tol c'asan xin, chi yak' nabal yetok tzet chi yi' tu'.

²⁸ A is beybal eb watx' is nabal, k'inalej chi yak'a'; a yin jun beybalej tu', c'am camich.