Pr 11 - A Txꞌan Biblia Yin Kꞌanjobal 1989

¹ C'am chi cha c'ul Jehová echbal man tz'akanok, palta chi tzaloj yetok echbal tz'akan.

² A maynejbail, asanc'al q'uixwilal chi yitek; axa eb yaynakil chi yut ba, jelan eb.

³ A mactxel tojol is nabal, a ton is tojolal tu' chi ikbani; a pax mac etnewom xin, chi lajwi ay yuj is yetnewomalil tu'.

⁴ A wal yet jun c'ual ok oc beyc'ulal jin, c'amxa yopiso co beyomal, asan co tojolal chon colon el bay camich.

⁵ A tojolal chi watx'nen oc is be eb tojol, axa eb yobtakwom tu' xin, ac'al oc yin is yobtakilal eb tu' chi telc'ojtok.

⁶ A tojolal chi colon el eb anima tojol is nabal, axa pax mactxel tol chi yochejc'al oc tzetak yetal xin, a chi ak'on low yin eb.

⁷ A yet chi cam eb yobtakwom, chi lajwi ay tzet yetal ayoc yipok c'ul eb tu' yetok. C'amxa chi yi ba tzet yetal naan yuj eb watx'nen yetok yipalil.

⁸ Chi col-lay el jun tojol is nabal nan xol is yailal yuj Dios, axa jun yobtakwom chi occan xol yailal tu' is q'uexelok.

⁹ A yuj is k'anej jun yobtakwom xan chi yetnej yet animail; axa jun tojol is nabal, chi colchaj yuj is jelanil.

¹⁰ A yet chi aj can eb watx' is nabal, caw wal chi tzaloj eb conob; chi tzaloj c'apax eb yet chi cam eb yobtakwom.

¹¹ A yuj watx' k'anej chi yal eb tojol, xan chi aj can junok conob, a pax is k'anej eb yobtakwom xin, toc'al chi yak' lajwok ayok.

¹² A mactxel c'am is nabal, yobtak tzet chi yal yin yet animail, axa mac ay is nabal xin, c'amc'al tzet chi yala'.

¹³ A junok wajom k'anej chi yalil tzet max al-lay bay yin ewantakil, axa pax mac watx' is nabal xin, toc'al chi c'ubaj yin is nabal.

¹⁴ Ta c'am mac chi ikban junok conob, chi ayc'ayi; palta ta xiwil mac chi ak'wi nabalej, watx' chi elocok.

¹⁵ A yet chi co wabaj co ba yin junok tx'ok animail, yob chon elocok; a mactxel c'am chi tak'wi yin junok, c'amc'al tzet chi na'.

¹⁶ A junok ix ix watx' is nabal, chi ilay aj can, axa junok winak yaxc'ayinak yin is trato, asan beyomal ok yi', palta intaknebil elok.

¹⁷ A mactxel tol ay is yabenc'ulal, ac'al oc chi chaon watx'ilal, axa mac yob xol yet animail, chi titcan yiban yuj is yobc'ulal tu'.

¹⁸ A mactxel yob, ok cha' paktzil watx' yaloni; axa mactxel watx' tzet chi yun xin, a wal watx'ilal ok cha' paktzilok.

¹⁹ Tatol chon toj yintak tojolal, lanan co toj yintak k'inalej; a pax tatol chon toj yin yobtakilal xin, lanan wal co toj yintak camich.

²⁰ Caw wal chi yaj Jehová eb man watx'ok is nabal; palta caw wal chi tzaloj c'ul Cham yin eb tol c'am is mul.

²¹ Wal yel, a mactxel ay is yobtakilal, yowalil ok low yin, axa mactxel tojolc'al is nabal xin, c'amc'al tzet ok onok.

²² A junok ix ix watx' yili, palta c'am wal is nabal, lajanc'al axca junok no txitam ayoc junok argolla naba oro yin is txam.

²³ A watx'ilal, a chi yochej c'ul eb watx' is nabal; axa tzet ok jayoc yiban eb yobtakwom, asan yowal c'ul Dios.

²⁴ Ay wal anima bekan c'ul pojon ec' is tzet yetal, a jun tu' yelxac'al miman tzet chi cha'; ay pax mac tol bas yel yuj, chi jayxac'al can oc mebil yiban.

²⁵ A mactxel tol chi el wal yin c'ul yak'oni, caw wal chi aj can bay; a mac chi colwaji, ok col-lay c'apaxok.

²⁶ A mactxel toc'al chi wajbaj ec' ixim trigo, caw wal yob chi yal anima yin, axa mactxel tol chi txonon ixim xin, watx' chi al-lay yin.

²⁷ A mactxel chi yunc'al watx'il, a watx'c'ulal anima chi chaloj yuj, a pax mactxel tol a yobtakil chi saya', ok michchaj el yuj yobtakil tu'.

²⁸ A mactxel chi yaoc is beyomal yipok c'ul, ok ayc'ay axca chi yun yayc'ay takin xaklak te'; axa eb tojol xin, ok yi' eb yip axca yaxbi k'ablak te'.

²⁹ A mac yob chi yut ba bay is mam ma bay is txutx, c'al xol eb yuẍtak, c'am satakej ok can bay; a mac yob is nabal, chekbejc'al yayji bay junok aj nabal.

³⁰ A tzet chi yun junok tojol, a chi ak'on cawil. A junok jelan chi monchaj anima yuj.

³¹ Tatol chi cha' eb tojol is nabal paktzil bay sat tx'otx' ti', akxam wal eb c'am yelapnok Dios yul sat, c'al eb ajmul, ¿tzet xa mi wal ok yun eb?