Pr 10 - A Txꞌan Biblia Yin Kꞌanjobal 1989

Babel makan k'anej cham Salomón

¹ A juntzan is k'anej cham Salomón: A eb uninalej tol ay is nabal, chi yak' eb tzalojbok c'ul is mam; axa eb c'am is nabal xin, tol chi yak' eb cus c'ul is txutx.

² A mac chi yi' is beyomal yin yobal, c'am chi oc is watx'ilok, palta a watx' beybalil chi colwaj yul k'ab camich.

³ A Jehová, c'am chi cha' cam eb watx' yuj wajil, axa eb yobtakwom xin, c'am chi cha' Cham yi' eb yochwan.

⁴ A yuj isajil, xan ok ach oc mebail. Ta yelc'ulal chach mulnaj xin, ok ach oc beyomal.

⁵ A junok c'ajolej aj nabal, chi waj sat awoj yet is tiempoal. Axa junok wayan chi yun yet tiempoal wajoj sat awoj, chi yak' q'uixwan is mam.

⁶ Chi al-lay watx' k'anej yin eb anima watx' is nabal; axa eb yobtakwom xin, toxac'al chi maktzan eb yuj c'aybanilal.

⁷ A mactxel tol watx' is nabal, chi nalaytek yin tzalojc'ulalil; axa pax junok yobtakwom, tok ayto mac chi naoni.

⁸ A mactxel aj nabal, chi cha' yab cuybanilej, axa mactxel asan comon k'anej chi yal xin, ok lajwokxac'al ayok.

⁹ A mactxel watx' is beybal, c'am bay chi xiwi; axa mactxel yobc'al chi yut ba, ok low yin.

¹⁰ A mactxel tol chi mutz'mon sat yin naon yobtakil, chi tit mimek yailal yuj; a mactxel asan comon k'anej chi yal xin, ok lajwokxac'al ayok.

¹¹ A is k'anej junok watx' is nabal, a chi ak'on watx'ilal xol anima, axa mactxel tol yobtakwom xin, toxac'al chi maktzan yuj c'aybanilal.

¹² A mactxel ay sawenal, chi say tzet chi yun yaj owal, axa mac ay is camc'ulal xin, ayc'al is mimanc'ulal.

¹³ A eb aj nabal, chi saylay ec' eb yuj is watx' nabal tu', a pax mac c'am is nabal xin, chi ak'lay yik eb c'ax.

¹⁴ A mactxel jelan, c'am chi yixac'al aj can ba yetok is jelanilal tu'; axa mac c'am is nabal xin, ayxa may juntzan k'anej chi yala'.

¹⁵ A beyomal chi colon el eb beyom; a pax mebil chi ak'on lajwok eb meba'.

¹⁶ A k'inalej, a ayoc paktzebalok bay junok watx' is beybal, axa tzet yetal chi yi' eb yobtakwom, a ton yailal.

¹⁷ A mactxel chi cha yab tenchebalej, a jun tu' lanan toj yul beal k'inalej; a pax mactxel tol c'am chi cha yab xin, chi c'aycantok.

¹⁸ Lek'ti mactxel chi c'ubaj el is chichonc'ulal; yob nabal mac tol aloj k'umalc'al chi yunej.

¹⁹ A mactxel miman tzet chi yala', chi oc is mul xol is k'anej tu'; a pax mactxel c'am wal tzet chi yal xin, aj nabal toni.

²⁰ A is k'anej junok watx' is nabal, caw wal miman yelapnok, axca ch'en plata caw wal watx'. A pax is nabal junok yobtakwom xin, c'am jabok yelapnok.

²¹ A yuj is k'anej junok watx' is nabal xiwil mactxel chi cuychaji; axa mactxel yob is nabal xin, chi camaj yuj is yob nabalil tu'.

²² A yuj watx'c'ulalil Jehová xan chon oc beyomal, man yujok tol chi co mak'cam co ba yin mulnajil.

²³ A eb yob is nabal, caw wal chi tzaloj eb yet chi yunen eb yobtakilal; a pax mactxel ay is nabal xin, chi yak' tzalojbok is c'ul yuj is jelanil tu'.

²⁴ A tzet yetal bay chi xiw junok yobtakwom, ac'al oc jun tu' chi titcan yiban; axa mactxel watx' is nabal xin, chic'al yun is yochwan.

²⁵ A yet chi ec' yowal c'ul Dios axca junok owal cak'ek', toc'al chi c'aycan aj eb yobtakwom yuj; a pax mac watx' is nabal xin, chi ayjic'al ec' yin tojbalk'inal.

²⁶ A mac chi chekon junok isaj, yob chi yab yuj, axca wal pajil vinagre, ma axca yet chi toj mub yul co sat, yujtol c'am chi yi ba jun chekbanilej tu'.

²⁷ A mactxel tol ay yelapnok Jehová yul sat, ok najatilbok is k'inal, axa eb yobtakwom xin, chi c'uplay is k'inal eb.

²⁸ A tzet lanan tit is satak mactxel watx'c'al is nabal, a ton tzalojc'ulal; axa watx'il chi yechbanej eb yobtakwom, man ok cha eb.

²⁹ A Jehová chi taynen eb watx' tzet chi yunej, a pax mactxel yob tzet chi yut ba xin, chi yak' lajwok ay Cham.

³⁰ A mactxel tojol is nabal, ok mayjokc'al; axa mactxel yob tzet chi yun xin, c'am chi mayji bay sat tx'otx' ti'.

³¹ A mac watx' is nabal, a jelanilal chi yala', axa mactxel yobc'al k'anjab xin, ok ak'lay tz'injok.

³² A mactxel watx' is nabal, asan k'anej chabejtak chi yala'; a pax mactxel yob is nabal xin, asanc'al yobal k'anej chi yala'.