Os 7 - A Txꞌan Biblia Yin Kꞌanjobal 1989

¹ a yet lanan wanten in conob Efraín, c'al Samaria, a yet tu' max txecloj aj is yajbejtakil, c'al is yobtakilal eb. Yujtol junlajanxac'al chi yun beybalnen eb lek'tial. Elk'omxac'al el eb masanil. Tojolxac'al yoc yulak na. A bay yulak calle chi elk'an eb yinlak anima.

² Tokwal chi na' eb, tatol naan is yobtakil eb tu' wuj. A tinani' ac'al oc is yunben eb tu' ayoc yinlak, xan a yobtakil eb tu' ayoc in satak.

Is yobtakilal eb ayoc yin opiso

³ Caw wal chi tzaloj eb rey c'al eb yajaw yuj yobtakil c'al etnewomal chi yun eb anima.

⁴ Ajmulxac'al el eb masanil. A yochwan eb tu', lajan wal axca junok horno c'am wal chi oc mimanok k'ak'al yuj junok watx'nem pan yak'ban chi pajbi ixim harina; axa yet mayal pajbi ixim xin, catawal tu' chi oc is k'ak'al wal sic'libil.

⁵ A yet c'ual k'in co reyal on, a wal eb ay yopiso tu', toxac'al max yak' eb yaban aj cham yetok eb yajaw yuj uq'uej vino. Toxac'al max yatok cham is k'ab bay eb buchwajwom.

⁶ Ayc'al oc yob nabalej yin nabal eb. Lajan yowal eb axca k'ak'al junok horno. Masanil ak'bal, iquisc'al k'ak' bay horno tu'; axa yet chi k'inibi aj junxa c'ual, chi xulay cakbok wal sic'libil.

⁷ A masanil eb tu', lajan wal yowal eb axca k'ak'al horno, max yak' lajwok eb is yajawil yuj yowal tu'. Masanil is reyal eb max lajwi ayok, palta c'am junok eb chito wal yal ba ayin.

Max pojxac'al el ba eb israel yin is Diosal

⁸ A conob Efraín mayal somtok ba xol juntzanxa conob. Lajanxac'al axca junok patej maj meltzojok.

⁹ A eb tx'ok conobal max ak'on lajwok ay is yipalil. Axq'uijan tol c'am chi yiltek ba, toltax xil is jolom, mayal sakbi elok, tokwal chi yiltek.

¹⁰ A is maynejbail eb israel chi tx'oxon el is yobtakil. Caxc'al mi axca tu' yayji oc eb, tokwal chi na ba c'ul eb meltzojtek ayin, ayin Jehová Diosal in eb.

¹¹ A conob Efraín, lajan wal axca junok no paloma caw wal c'am is nabal, toc'al chi yaxc'ayic'ok. Jun bek chi toj k'an colwal bay Egipto, axa yet junxa bek chi toj pax k'anon colwal bay Asiria.

¹² Palta xin, a yet ok tok eb bay tu', ok in k'oktok in tx'an yiban eb. Ok ayc'ay eb axca chi yun yayc'ay junok no tz'iquin. Ok waoc yailal yiban eb, axca max yun yal-lay bay xol is wajayil eb.

¹³ Ok'bal c'ul eb, yuj max pojil ba eb ayin. Ok tzakaytok eb yuj lowbanilejal ok jayok, yujtol a wal ayin max oc is tenomtakil eb. Chi wochej chin colil eb; palta asan lek'tial chi yun eb win.

¹⁴ Tokwal yetok masanil is c'ul eb chin yawtej yet chi el yaw eb bay sat is tx'at. Chi waj ba eb, cax chi k'anon eb tol watx' chi yun is trigo, c'al is yuva eb, palta caw wal tenomtak chi yut ba eb ayin.

¹⁵ Max wak' is cuybanil eb, max wak'on c'apax yipalil eb; palta axa eb xin, a yobc'ulalil chi naoc eb win.

¹⁶ Chi meltzoj eb; palta majxa jay eb ayin, ayin tol Axac'al in Ocok. Axca junok julbalej tol coxan, c'am chi michchaj tzet yetal chi jul-lay yetok tu', axca tu' eb. A yuj is k'anej eb yajawil eb yin maynejbail, xan ok ayc'ay eb yuj espada. Axa eb aj Egipto xin, toxac'al ok buchwajtek eb yin eb.