Os 13 - A Txꞌan Biblia Yin Kꞌanjobal 1989

Ok lajwok ay conob Israel

¹ A yet max k'anjab eb yicham winakil conob Efraín yet payxa, axa juntzanxa tribual yet israelal max tx'oxoni tol ay yelapnok yul sat eb. Axa tinani' xin, ok cam eb aj Efraín tu' yuj is mul max yaocok, tol max oc eb ayilal bay Baal.

² Chito ajc'al can yaon oc is mul. Chi watx'nej aj ch'en plata is diosalok, axca wal chi yochej c'ul, c'al axca wal chi tit yin is nabal eb watx'nem yechelej. Chi lajwi tu' chi yalon aj paxok: Ak'ek e xajanbal bay, ẍi. Axa eb anima xin, chi tz'ubil eb ti' jun yechelej lajan yili axca wacax tu'.

³ Yuj tu' xan lajan ok yunc'al eb axca asun ayay yet chi k'inibi, axca c'apax yal ak'bal ayay yet caw k'inibalil, tol chi pet c'ayajok. Lajan c'apax eb axca matz'il trigo chi ilay bey yuj cak'ek', ma axca mub chi el yul junok wentena.

⁴ Max yalon Jehová axca ti': Ayin Jehová e Diosal in, yettaxc'al ayex ec' bay Egipto, c'am junokxa che yaoc e diosalok, palta asannej in. Asannej in e Colomal wayji ocok.

⁵ Caw wal watx' max yun ex in taynen bay takin tx'otx', bay xiwil k'ak'.

⁶ Palta a yet caw wal max yak' sobra e lobej, max quex aj can e maynen e ba, cax max in tojcan c'ayc'ulal e yuj.

⁷ Yuj tu' xan ok wut in ba ayex axca wal junok no coj, ma axca wal junok tz'ibcoj chi makwaj yulak be.

⁸ Ok in eltek jucnaj e satak, axca junok no txutx oso tol mayal ilay bey is yune', cax ok ex wak'on coc'axtok bay tu', axca wal junok no coj chi chionxac'al aytok is chibej, ma axca chi yut coc' tzilnentok junok no chiwajwom no' is chibej.

⁹ Ok ex wak' c'ayil ayex israel ex ti', c'am mactxel ok je' tenon ec'tok.

¹⁰ Max e k'an e rey, c'al eb e yikbajwomal, palta ¿tom a eb chi je' taynen e conoblak ti'?

¹¹ Aytek wowal e yin yet max wak'on e reyal tu', ac'ala' ay c'apaxtek wowal e yin yet max wion c'apax ec' eb e reyal tu'.

¹² Txequel yayji is yobtakil conob Efraín. Tz'ib max yuncan is mul tu'.

¹³ A conob Israel, chi apni oc is c'ual yet chi na ba c'ul, palta caw wal c'am is nabal; axca junok unin man watx'ok chi yut ba, xan c'am chi je' yalji el yin is txutx, caytu' yayji.

¹⁴ Ok in colcan el in conob bay cambal. Ok in colcan el yul k'ab camich. Ayin ok wak' lajwok camich. Ayin ok wak' c'ayil cambal. Manxa ok in tx'ox in yabenc'ulal yin conob Efraín,

¹⁵ caxc'al chi aj can xol eb yet israelal. Palta ok tit wowal yin, axca chi yun tit cak'ek' bay yichcan, axca ton yec' cakxuchum cak'ek' bay tz'inan tx'otx', xan ok tanaj a' nuk' aejlak. Axa eb ajc'ul, ok iontok masanil is beyomal eb.

¹⁶ A conob Samaria ok yi' c'apax is yailal, yujtol pit chi yut ba ayin. Ok cam eb yuj espada. A yuninal eb ok mak'lay ay bay sat tx'otx' yet chi cami. A eb ix yob ix, ok jakchaj is mimanil eb yuj espada, ẍi Jehová.