Os 11 - A Txꞌan Biblia Yin Kꞌanjobal 1989

Ay is camc'ulal Dios yin is conob pit

¹ Max yal Jehová axca ti': A yet axca wal uninto jun conob Israel ti', caw wal ay in camc'ulal yin; axca wal in c'ajol yayji; atac'al bay Egipto max wawtejtek.

² A wal yet max wawtentek, yelxac'al max el najat in c'atan. A bay juntzan dios Baal max yak' jun in conob ti' xajanbal. Max yak' tz'a eb incienso bay yechelej.

³ Caxc'al mi axca tu', palta max in lac bey Efraín; palta maj yojtaknej tatol ayin chin taynej.

⁴ Max in quetztek Efraín yin camc'ulal, axca quetzlay junok wacax. Lajan in axca junok mac chi ion el yugo junok wacax, cax watx' chi yun yak'on lobej.

⁵ Palta c'am wal jabok chi meltzojtek ayin. Yuj tu' xan tokwal man ok meltzojtok eb junelxa bay Egipto, axa nación Asiria ok yajawbok yiban.

⁶ Espada ok on is conoblak Israel; yuj owal ok lajwok is cuartel eb. Ok lajwok ay eb yuj tzet nabil yuj eb yul yet.

⁷ A in conob ti', naanxac'al yuj, tol chi elcan wintak. Caxc'al chi yal eb tol Ayinxanej ocok, palta c'am chin yi can eb.

⁸ ¿Tzet wal ok yun ex in bekoncan ex conob Efraín? ¿Tzet wal ok yun ex in bekoncan ex yinatil Israel? ¿Ok mi je' ex wak'on c'ayilok axca max wut conob Adma? ¿Ok mi ex wut axca max wut conob Zeboim?*fn* Ya' chi yab in c'ul, chi cus in c'ul e yin.

⁹ Man ok wun axca wal yowal in c'ul. Man ok in meltzoj ex wak'on c'ayil ex conob Efraín, yujtol Dios in, cax man animaok in. Ayin ec' e yetok; Asanxanej in ocok, xan man ok in jay ex in c'ayon elok.

¹⁰ Ok tzaklojc'al eb wuninal wintak, ok el waw axca junok no coj. A yuj ok el waw tu', xan ok tit eb wuninal bay yayubc'u, caw wal ok bil eb yuj xiwilal.

¹¹ Axca no tz'iquin ok yun tit lemnaj eb bay Egipto, ok tit c'apax eb bay Asiria axca no cakmú. Ayin wal caw Jehová in chi wala', tol ok wak' cajay eb junelxa bay is cajlobal junjun.

Is yobtakil eb conob Dios

¹² A wal conob Efraín ti', caw wal asanxanej lek'tial chi yak' ayin. Asanxanej etnewomal chi yun conob Israel ti' win. Axa eb aj Judá, yikemc'al eb ayin is Diosal in eb, tol Asanxanej in ocok.