Nm 9 - A Txꞌan Biblia Yin Kꞌanjobal 1989

Chi chalay k'in Pascua

¹ A yet max lajwi jun abil yel eb israel bay Egipto, yet wal babel xajaw yul junxa abil tu', max k'anjab Jehová bay cham Moisés bay takin tx'otx' Sinaí, max yalon axca ti':

² Al bay eb et conob Israel tol chi cha eb k'in Pascua axcac'alta' is c'ual tol txequel yayjicanok,

³ chi yal elapnok, a ton yet 14 waay jun xajaw ti' yet yayc'ualil, cax chi yiken masanil tzet max wala', yuj tzetbil wal chi yun yikelayi, ẍi Jehová.

⁴ Catatu' max yalon cham Moisés bay eb yet israelal tol chi chalay jun k'in tu'.

⁵ Max chaon eb jun k'in tu' yet yayc'ualil yet 14 waay jun xajaw tu', bay takin tx'otx' Sinaí, axca wal max yun yalon Jehová bay cham Moisés.

⁶ Palta a yet tu', ay juntzan eb winak tol man watx'ok yayji atac'ala' yalon ley, yujtol max mitx' eb junok camnak; xan maj je' chaon eb k'in yet jun c'ual tu'. Yuj tu' xan max toj eb yilon cham Moisés c'al cham Aarón yet tu'.

⁷ Max yalon eb bay cham Moisés axca ti': —Ayon ti' max co mitx' jun camnak, yuj tu' xan man watx'ok jayji on atac'ala' yalon ley. ¿Tok mi wal man ok chalay jak' jofrenda bay Jehová yet jun c'ual ti' yetok masanil eb jet conob? ẍi eb.

⁸ Max tak'wi cham Moisés bay eb axca ti': —Echbanejek, ok wab tzet ẍi Jehová e yuj ayex ti', ẍi cham.

⁹ Max k'anjab Jehová bay cham Moisés, max yalon axca ti': Al juntzan ti' bay eb et israelal.

¹⁰ E masanil ayex ti' c'al yetok eb e yinatil, yowalil che cha k'in Pascua yuj in e yion aj can. A mac man watx'ok yayji atac'ala' yalon ley, yujtol max mitx' junok camnak, ma eb aytok najat yin junok is viaje,

¹¹ okxa cha eb k'in yet 14 waay yet is cab xajaw yet yayc'ualil. Yowalil chi chi' eb no xajanbal yetok c'a' itaj c'al yetok ixim pan tol c'am yich ayocok.

¹² C'am jabokxa no' chi can yuj eb yet junxa c'ual, tamwal ok mak' poj eb is bakil no'. Axca wal max yun waloni, cay wal tu' chi yun e chaon k'in Pascua tu'.

¹³ A pax mac tol c'am chi chaon k'in Pascua, caxc'al watx' yayji atac'ala' yalon ley, tamwal aytok yin is viaje, a jun tu' yowalil chi c'aylay el xol yet conob tu', yujtol maj yak' yofrenda ayin yet jun c'ual tol txequel yayjican tu'. Ac'al oc chi yitek yiban.

¹⁴ Ta ay eb tx'ok conobal cajan ec' e xol, chi yochej chi cha k'in Pascua e yetok yuj in yion aj can, yowalil chi yikej eb axca leyalil max wala'. Axca wal ley max wak' e yikej tu', a' chi yikej pax eb tx'ok conobal cajan ec' e xol, ẍi Jehová.

A jun asun ayoc yiban mantiado

¹⁵ A yet c'ual yet max watx'ji aj is cajlobal Jehová, chi yal elapnok a ton mantiadoal yet trato, max oc boc'an jun asun yiban. A wal yet max aycan aj c'u, lajanxa max yun yili axca k'ak'ej, masantac'al yet max sakbi aj yet junxa c'ual.

¹⁶ Cac'al tu' max yunc'al. Ayc'al oc jun asun tu' yiban mantiado tu' yet chi ec' c'u, axa yet ak'balil axca tol ayoc is k'ak'al jun asun tu'.

¹⁷ A yet max aj lenaj asun tu' yiban mantiado, cax max bey eb israel toji. A bay max oc pax boc'an jun asun tu', a tu' max watx'nej pax aj eb is mantiado.

¹⁸ A Jehová max tx'oxon bay eb israel tatol chi bey eb toji, ma tol chi oc waan eb. A bay tu' chi canc'al can eb, tatol waanc'al oc jun asun tu' yiban cajlobal Jehová.

¹⁹ Ta miman tiempoal chi cancan jun asun tu', chi yikej eb bay Jehová cancan bay tu'.

²⁰ Tatol jun cabnej c'ual chi cancan jun asun tu xin, caytu' chi yun c'apax eb, lajwi tu' chi bey pax eb toji, atac'ala' chi yun tx'oxon Jehová bay eb.

²¹ Ay bay tol asan junok ak'bal chi cancan jun asun tu', axa yet k'inibalil cax chi toj paxok; caytu' chi yun bey pax eb toji. Ta a yet c'ualil ma yet ak'balil chi toj jun asun tu', cax chi toj c'apax eb.

²² Tatol chi canc'al can waan jun asun tu' yiban cajlobal Jehová yin cabok c'ual, ma junok xajaw, ma junok abil, ac'al bay tu' chi canc'al can eb israel tu', c'am chi toj eb. Tatol chi toj pax jun asun tu xin, catatu' chi toj pax eb.

²³ Masantac'al tol a Jehová chi aloni, catatu' chi oc waan eb; ac'al Cham chi alon paxok, cax chi bey paxtok eb. Max yikejc'al eb bay Jehová, atac'ala' max yun yalon bay cham Moisés.