Nm 34 - A Txꞌan Biblia Yin Kꞌanjobal 1989

Is mojonail jun nación tu'

¹ Max k'anjab Jehová bay cham Moisés max yalon axca ti':

² Al masanil juntzan cuybanilej ti' bay eb et israelal. Toxa wal ok ex octok bay tx'otx' Canaán tu', tol e yet ok yunej. A ton wal is mojonal ti':

³ A is mojonal bay sur chi ec' bay takin tx'otx' yet Zin bay tilak tx'otx' yet Edom. A is txiquin bay yichcan chi chael yichtac'al bay yetc'ulal sur a' Mar Muerto.

⁴ Chi beyc'al yajtok bay sur tu' masantac'al bay yich witz Acrabim, chi ec'c'al tok bay Zin masantac'al chi apni oc bay Cades-barnea. Chi lajwi tu' cax chi tojc'al pax bay Hasar-adar, masantac'al bay Asmón.

⁵ Chi toj bay Asmón tu' masantac'al bay a' elom aej yet Egipto, cax chi lajwi yapnican oc bay a' mar Mediterráneo.

⁶ A is mojonal bay yayub c'u, a ton a' mar Mediterráneo.

⁷ Axa is mojonal bay norte, chi tojtac'al t'innaj bay a' mar Mediterráneo masantac'al chi apni oc bay jolom witz Hor.

⁸ Chi toj pax bay jolom witz Hor masantac'al bay chon ocapnok bay Hamat, masantac'al bay Zedad.

⁹ Chi toj bay Zedad tu', chi ec'tok bay Zifrón masantac'al chi apni oc bay Hasar-enán.

¹⁰ Axa is mojonal bay yichcan chi tojtac'al t'ininok bay Hasar-enán masantac'al bay Sefam.

¹¹ Chi toj pax bay Sefam tu', cax chi apni oc bay Ribla, bay yetc'ulal yichcanil Aín. Chi lajwi tu' chi ayc'altok jun mojon tu' bay yetc'ulal yichcanil a' najab Cineret,

¹² cax chi beyc'altoj bay a' Jordán masantac'al chi apni oc bay a' Mar Muerto. A masanil juntzan mojon tu' a ton is mojonal e tx'otx' tu', ẍi Jehová, cachi bay eb.

A tzet ok yun pojlay ec' tx'otx' tx'otx'

¹³ Max yak' cham Moisés masanil juntzan chekbanilej ti' bay eb israel: A ton jun tx'otx' ti' ok e pojic' e yin ayex ti', a ton jun max yal Jehová tol ok pojlay ec' xol eb nan is lajoneb tribu, yujtol mayal chacan nan yox tribu is satak,

^14-15 chi yal elapnok a ton is tribual Rubén, yetok Gad c'al yetok nanxa yet Manasés. Mayal cha junjun yet, yin tx'otx' tol yet-xa eb yayji, a ton bay yetc'ulal yichcanil a' Jordán bay satak Jericó, ẍi cham Moisés.

¹⁶ Max k'anjab pax Jehová bay cham Moisés, max yaloni:

¹⁷ A mactxel ok pojon ec' tx'otx' tu' e xol, a ton sacerdote Eleazar yetok Josué is c'ajol Nun.

¹⁸ Palta yowalil che yawtej junjunok eb yajaw yayji yin junjun tribu, yet chi pojlay ec' tx'otx' tu'.

¹⁹ A eb winak tol yowalil ok awtelayok a ton eb ti': A yin is tribual Judá, a ton Caleb is c'ajol Jefone.

²⁰ Axa yin yet Simeón, a ton Semuel is c'ajol Amiud.

²¹ Axa yin yet Benjamín, a ton Elidad is c'ajol Quislón.

²² Axa yin yet Dan, a Buqui ayoc yajawil, a ton is c'ajol Jogli.

²³ Axa yin yet Manasés is c'ajol José, a Haniel is c'ajol Efod, a' yajaw yayji.

²⁴ Axa Kemuel is c'ajol Siftán, yajaw yayji yin yet Efraín is c'ajol c'apax José.

²⁵ Axa yin yet is tribual Zabulón, a Elisafán is c'ajol Parnac ayoc yin yajawilal.

²⁶ Axa yin yet Isacar, a Paltiel is c'ajol Azán, ayoc yin yajawilal.

²⁷ Axa yin yet Aser, a Ahiud is c'ajol Selomi ayoc yin yajawilal.

²⁸ Axa yin yet Neftalí, a Pedael is c'ajol Amiud ayoc yin yajawilal, ẍi Jehová.

²⁹ A ton yul k'ab juntzan eb ti' max yaoc Jehová pojon ec' tx'otx' Canaán xol eb yinatil Israel.