Nm 30 - A Txꞌan Biblia Yin Kꞌanjobal 1989

Leyal yin bay chi jak' co ti'

¹ Max yalon cham Moisés bay eb yajaw yayji yin junjun tribual Israel axca ti':

² Max yal Jehová tatol ay junok winak chi yak' is ti' yak'on junok tzet yetal bay, ma chi yak' is ti' yin tol c'am chi yun junok tzet yetal, yowalil chi yikej yunen tzet max yal tu'. C'am chi je' yak'on tac is ti' yin tzet maxax yala'.

³ Ta a junok ix k'opoj ix, tol ayto ec' yetok is mam, cax chi yak' is ti' yak'on junok tzet yetal bay Jehová, ma chi yak' is ti' yin tol c'am chi yun junok tzet yetal,

⁴ ta c'am tzet chi yal is mam ix tu' a yet chi yabenajok tol ay ti' ix max yak'a', yowalil chi yikej ix yunen bay max yak' is ti' tu'.

⁵ Palta ta a' is mam ix tu' chi yak' yowalil a yet chi yabenajok tol ay ti' ix max yak'a', ta axca tu', manxa yowalilok chi yun ix bay tzet max yak' is ti' tu'. C'amxa c'apax chi ak'lay pural ix yuj Jehová yiken bay max yak' ix is ti' tu'.

⁶ Ta a junok ix ix chi yak' is ti' bay Jehová caxc'al max cam naoni, ma xin yinc'al aymanil max yal yuj yunen junok tzet yetal, ma yuj c'am chi yun junok tzet yetal, lajwi yak'on ti' tu' cax chi nupay pax ix;

⁷ ta a yet chi yaben aj is yichamil ix jun tu', c'amc'al tzet chi yal yuj, yowalil ok yikej ix bay max yak' is ti' tu'.

⁸ Palta ta a yet chi yaben aj is yichamil bay max yak' ix is ti' tu', c'am pax chi cha' c'ul nak, man yowalilok chi yikej ix bay max yak' is ti' tu', c'am c'apax chi ak'lay pural ix yuj Jehová yin yikeni.

⁹ Ta a eb xal camnak yichamil ma eb xal pojlejnak ba yetok yichamil chi yak' is ti' yin junok tzet yetal bay Jehová, yowalil chi yikej eb xal.

¹⁰ Ta a junok ix ix tol ay yichamil chi yak' is ti' yin yunen junok tzet yetal, ma yin c'am chi yun junok tzet yetal,

¹¹ ta a yet chi yaben aj is yichamil ix tu', yuj bay max yak' ix is ti' tu', c'amc'al tzet chi yala', a ix tu' yowalil chi yikej ix yunen bay max yak' is ti'.

¹² Palta ta a yet chi yaben aj is yichamil ix tu', yuj bay max yak' ix ti', ta c'am chi cha c'ul nak, man yowalilok chi yikej ix yunen bay max yak' is ti' tu', a Jehová c'am c'apax chi yak' pural ix yuneni.

¹³ A nak ichamilej chi je' yaloni tatol chi je' yiken ix ix bay max yak' is ti' yin tzet c'am chi yunej, ma c'amak.

¹⁴ Ta ayxa jun cabok c'ual yaben aj nak jun tu', cax c'amc'al tzet chi yal pax nak, yowalil chi yikej ix yunen bay max yak' is ti' tu'.

¹⁵ Ta a yet mayal ec' tiempo catatu' chi yalon nak tol c'am chi cha c'ul, axa yiban jun winak tu' chi cancan jun k'anej bay max yak' ix is ti' tu', ẍi cham Moisés.

¹⁶ A ton juntzan ley max yal Jehová bay cham Moisés yuj tzet wal chi yun nak winak yetok yistzil, ma eb mamej yetok is cutz'in, ta a ix k'opoj tu' ayto ec' ix yetok is mam.