Nm 26 - A Txꞌan Biblia Yin Kꞌanjobal 1989

Max ilay aj bisil eb israel junelxa

¹ A yet max lajwi ec' jun ilya' tol chi cam anima yuj tu', max yalon Jehová bay cham Moisés c'al bay cham sat sacerdote Eleazar, is c'ajol Aarón:

² Iaj is bisil eb israel yin junjun makanil yayji eb, chi el yich yin eb tol 20 abil is k'inal tol tiempo wal toj yin owal, ẍi Jehová.

³ Max wajban oc cham Moisés yetok Eleazar masanil eb winak bay yac'alil Moab, bay is ti a' Jordán, bay sataktok Jericó,

⁴ yet chi tz'ibelay masanil eb 20 abil is k'inal chi beyc'altok, axca wal max yun yalon Jehová bay cham Moisés. A ton masanil eb max eltek bay Egipto:

⁵ A eb is c'ajol Rubén is babel c'ajol cham Israel, a ton eb chi binaj can yin is yinatil: Enoc, Falú,

⁶ Ezrón, c'al Carmi;

⁷ axa is bisil yinatil eb ti' ay 43,730 eb winak yin masanil.

⁸ A Falú, a' ay is c'ajol Eliab;

⁹ axa pax Eliab a' ay is c'ajol Nemuel, Datán c'al Abiram. A Datán yetok Abiram tu' yicham winakil conob yayji eb. A ton eb junej yayji is lajk'anej yetok Coré. Max meltzoj oc eb ajc'ulal yin Jehová, yin cham Moisés c'al yin cham Aarón.

¹⁰ Palta max jak tx'otx' tx'otx' is ti' cax max turlay aytok eb cawan tu' yetokc'al Coré. Masanil eb max tzakloj yintak Coré tu' max cami, a ton 250 eb winak max cam yuj k'ak'ej. A juntzan tu' max oc tx'oxbanilejal bay eb israel masanil.

¹¹ Axa pax eb is yinatil Coré xin, maj cam eb.

¹² Axa pax eb c'ajol Simeón xin, chi binajcan yin is yinatil, a ton Nemuel, Jamín, Jaquín,

¹³ Zera c'al Saúl.

¹⁴ Axa is bisil eb yinatil eb ti', ay 22,200 eb winak yin masanil.

¹⁵ A eb is c'ajol Gad chi binajcan yin yinatil, a ton eb ti': Zefón, Hagui, Zuni,

¹⁶ Ozni, Era,

¹⁷ Arodi c'al Areli.

¹⁸ Axa is bisil eb yinatil eb ti', ay 40,500 eb winak yin masanil.

¹⁹ A pax eb c'ajol Judá max cam bay tx'otx' Canaán a ton Er c'al Onán.

²⁰ A eb c'ajol Judá chi binajcan yin is yinatil, a ton Sela, Fares c'al Zara.

²¹ A eb c'ajol Fares, chi binajcan yin is yinatil, a ton Hezrón c'al Hamul.

²² Axa is bisil eb yinatil Judá, ay 76,500 eb winak yin masanil.

²³ A eb c'ajol Isacar, chi binajcan yin is yinatil, a ton Tola, Fúa,

²⁴ Jasub c'al Simrón,

²⁵ Axa is bisil eb yinatil eb ti' 64,300 eb winak yin masanil.

²⁶ A eb c'ajol Zabulón, chi binajcan yin is yinatil, a ton Sered, Elón c'al Jahleel.

²⁷ Axa is bisil eb yinatil eb ti' ay 60,500 eb winak yin masanil.

²⁸ Axa pax yin yinatil José, cab tribual max yunej, a ton Manasés c'al Efraín.

²⁹ A is c'ajol Manasés, chi binajcan yin is yinatil, a ton Maquir, is mam Galaad.

³⁰ Axa eb is c'ajol Galaad, chi binajcan yin is yinatil, a ton Jezer, Helec,

³¹ Asriel, Siquem,

³² Semida c'al Hefer.

³³ (A Zelofehad is c'ajol Hefer, c'amc'al is c'ajol, asan is cutz'in ay, a ton Maala, Noa, Hogla, Milca c'al Tirsa.)

³⁴ Axa bisil eb yinatil Manasés ay 52,700 eb winak yin masanil.

³⁵ Axa eb is c'ajol Efraín, chi binajcan yin is yinatil, a ton Sutela, Bequer c'al Tahán.

³⁶ Ay jun is c'ajol Sutela chi binajcan yin is yinatil, a ton Erán.

³⁷ Axa is bisil eb yinatil Efraín, ay 32,500 eb winak yin masanil.

³⁸ A eb is c'ajol Benjamín, chi binajcan yin is yinatil, a ton Bela, Asbel, Ahiram,

³⁹ Sefufam c'al Hufam.

⁴⁰ A eb c'ajol Bela, chi binajcan yin is yinatil, a ton Ard, c'al Naamán.

⁴¹ Axa is bisil eb yinatil Benjamín 45,600 eb winak yin masanil.

⁴² A pax is c'ajol Dan chi binajcan yin is yinatil, a ton Suham.

⁴³ Axa is bisil eb yinatil Suham ay 64,400 eb winak yin masanil.

⁴⁴ A pax eb is c'ajol Aser, chi binajcan yin is yinatil, a ton Imna, Isúi, c'al Bería.

⁴⁵ A is c'ajol Bería, chi binajcan yin is yinatil, a ton Heber, c'al Malquiel.

⁴⁶ (A Aser tu' ay jun is cutz'in chi yik Sera.)

⁴⁷ Axa is bisil eb yinatil Aser tu' ay 53,400 eb winak yin masanil.

⁴⁸ A eb is c'ajol Neftalí chi binajcan yin is yinatil, a ton Jahzeel, Guni,

⁴⁹ Jezer, c'al Silem.

⁵⁰ Axa is bisil eb yinatil Neftalí ay 45,400 eb winak yin masanil.

⁵¹ Yuj tu' xan a is bisil masanil eb winak yet Israel ay 601,730.

Leyal tzet chi yun pojlay ec' tx'otx' tx'otx'

⁵² Max k'anjab Jehová bay cham Moisés, max yaloni:

⁵³ Chi pojlay ec' tx'otx' tx'otx' xol masanil tribu atac'ala' jantak is bisil junjun max aji.

^54-56 Yin suerteal chi yun pojlay ec' tx'otx' xol eb. Miman tx'otx' chak' bay mac xiwil bisil, txennej tx'otx' chak' bay mac txennej is bisil, ẍi Jehová.

Is bisil eb levita

⁵⁷ Eb c'ajol Leví chi binajcan yin is yinatil, a ton Gersón, Coat c'al Merari.

⁵⁸ A eb yitxiquin Leví tu', chi binajcan yin is yinatil, a ton Libni, Hebrón, Mahli, Musi, c'al Coré a ton eb tu' yinatil Leví. A Coat tu' a ton is mam Amram.

⁵⁹ A Amram tu' max mojay yetok jun ix yinatil Leví, a ton ix chi yik Jocabed. A yet ayic' Leví tu' bay Egipto max alji ix. A Amram yetok Jocabed a ton eb is mam c'al is txutx Aarón yetok Moisés c'al María.

⁶⁰ Axa eb c'ajol Aarón xin, a ton Nadab, Abiú, Eleazar c'al Itamar.

⁶¹ A Nadab c'al Abiú max cam eb yet max yak'on eb jun k'ak' tol tx'ok yeli, bay Jehová.

⁶² A masanil eb winak yin yinatil Leví, a ton eb yin jun xajaw is k'inal chi beyc'altok, ay 23,000. A eb ti' c'am oc eb bisilok juntzanxa eb yet israelal, yujtol a eb levita tu' c'am is satak eb max yi' yetok juntzanxa tribual tu'.

⁶³ Caywal tu' max yun yeloc is bisil eb israel max ilay aj yuj cham Moisés yetok cham sacerdote Eleazar bay ac'al Moab, bay ti' a' Jordán bay satak Jericó.

⁶⁴ A masanil eb tu', c'am junok eb max bislay yuj cham Moisés c'al cham Aarón yet max yion aj eb cham is bisil eb yet babelal bay takin tx'otx' Sinaí.

⁶⁵ Yujtol max yal Jehová tol ok cam eb bay takin tx'otx', c'amxa junok eb tu' maxto cani; asanxanej Caleb is c'ajol Jefone, yetok Josué is c'ajol Nun max cani.