Nm 22 - A Txꞌan Biblia Yin Kꞌanjobal 1989

Yawtebal Balaam yuj Balac

¹ Lajwi tu xin, max beyc'altoj eb israel, max watx'nen aj eb is campamento bay ac'al yet Moab bay k'axepal ec'tok a' Jordán bay yetc'ulal Jericó.

² Axa yaben cham Balac reyal Moab, is c'ajol Sipor, tzet max utlay eb amorreo yuj eb israel,

³ max xiwaj yetok eb anima ay bay Moab, yujtol max yila' tol xiwil eb israel tu'.

⁴ Yuj tu' xan max yal eb anima ay bay Moab tu' bay eb yicham winakil conob Madián axca ti': Masanil juntzan anima ti', ok yak' lajwok eb co tx'otx' axca chi yun lajwi an ac'un yuj no wacax, ẍi eb.

⁵ Yuj tu' xan max chek cham Balac toj tit jun cham tz'akan c'ul chi yik Balaam is c'ajol Beor, cajan bay Petor, bay is ti' a' miman Éufrates, yul yet Amav. Max chek cham Balac eb yicham winakil conob yet chi toj yal eb bay Balaam: A bay Egipto max tit jun miman conobal anima, mayal nojil sat tx'otx' tx'otx' yuj eb, mayal jayoc eb co c'atan.

⁶ Yuj tu xin, titan yin aymanil, cax chi ul a catabnen juntzan anima ti', yelxac'al miman is bisil eb jintak. Axtawal yuj a catab tu', ok je' wak'on ayc'ay eb, c'al yelaj eb bay yul co conobal ti'. Yujtol wojtak a a catab c'al a watx' k'anej chala', chic'al yunej, ẍitok cham.

⁷ Lajwi tu', axa toj eb yicham winakil conob Moab c'al eb yicham winakil Madián, bay ayic' cham Balaam. Caw wal miman ch'en tumin max yitok eb yet chi tojlanej eb catab k'anej tu', cax max yalon eb is chekbanil max yaltok cham Balac.

⁸ Max yalon cham Balaam tu' bay eb axca ti': —A tinani' cananek cayti', atac'ala' tzet ok yun yalon Jehová ayin yet jun ak'bal ti', axca tu' ok je' wak'on paktzil e k'anej tu' yet yecal, ẍi cham. Xan max can eb icham winak tu' yetok cham Balaam yet jun ak'bal tu'.

⁹ Max tx'ox ba Dios bay cham Balaam, cax max k'anlen Dios bay axca ti': —¿Mactxel juntzan anima ayic' ayach tu'? ẍi.

¹⁰ Max tak'wi cham Balaam tu': —Chekbej yayji eb yuj cham Balac reyal Moab, is c'ajol Sipor, tol chi ul yal eb ayin,

¹¹ tolab ay jun conobal anima max tit bay Egipto, mayal nojil tx'otx' tx'otx' yuj eb. Tol chi yochej cham Balac tu' tol chin toj bay is conob tu', yet chi toj in catabnej jun conobal anima tu', yet watx' chi je' yukten el eb yul is conob tu' yaloni, ẍi bay Dios.

¹² Max yalon Dios bay Balaam: —C'am chach toj a catabnej jun conob tu', yujtol ayin wal caw max wal watx' k'anej yin eb, ẍi Dios.

¹³ Axa yet max k'inibi aj yet junxa c'ual, max aj wan cham Balaam cax max yalon bay eb is chekbej Balac tu' axca ti': —A tinani', meltzojanek bay e conob. C'am chin toj e yetok, yujtol mayal yal Jehová tol c'am chi je' in toji, ẍi cham.

¹⁴ Max meltzoj eb bay is conob bay ay cham Balac, max yalon eb axca ti': —Maj jetek ba cham Balaam tu' jetok, ẍi eb.

¹⁵ Majc'al cha' yab cham Balac tu', xan max chektok juntzanxa eb tol mimek yayji oc yikbej xol eb yintak eb max betic' tu', cax ec'ban bisil eb max toji.

¹⁶ Axa toj pax eb yilon cham Balaam; max yalon eb bay cham axca ti': —Max con is chektek cham Balac is c'ajol Sipor ayach. Chi yal cham tol c'amokab mac chi tenon oc wanaj a toji;

¹⁷ yujtol ok ach yutc'al yin tol miman elapnok c'al ok yak'on masanil tzet ok a k'ana', asan ta wal tol chekej a toj a catabnen juntzan anima tu', ẍi eb.

¹⁸ Max tak'wi pax cham Balaam: —Caxc'al nojnak yul is despacho cham yuj oro ma yuj plata cax chi yak'on masanil ayin, maj je' wunen bay chi tit yin in c'ul yin in tenon tzet yetal chi yal Jehová in Diosal.

¹⁹ Ta chi je' e can pax cayti' yet junxa ak'bal ti', yet watx' ok wab paxok tzet ok yut yalon Jehová junelxa ayin, ẍi cham.

²⁰ Max tx'oxon pax aj ba Jehová bay cham Balaam yet ak'balil tu', max yalon bay: —Tatol max jay pax eb chekbej tu' junelxa ayach, chi je' chach toj yetok eb, palta asan wal tzet ok wal ayach, asan chi toj ala', ẍi Cham bay Balaam.

Tenchebal Balaam yuj yángel Jehová

²¹ Axa yet max k'inibi ajok max aj wan cham Balaam, max yaon oc tz'um no' is txutx burro cax max toj yetok eb cham yicham winakil Moab.

²² Max ajtok cham yiban no' tu', cax tzunan oc cawan is chekbej yintak. Axa Jehová max tit yowal yin cham yujtol max toji. Axa cham yángel Jehová max oc waan yul be yet chi makchen el be tu'.

²³ A yet max yilon no burro tu' tol lecan oc is yángel Jehová bay nan yul be, ibil oc jun espada yuj, cax max c'oli toj no' xolak te'. Max michchaj mak'lay no' yuj cham Balaam yet chi oc pax no' yul be.

²⁴ Cax max oc pax lecan jun ángel tu' junelxa bay yaliẍ sat be bay xol an uva tol latz'bil aj ch'en ch'en yin corralil bay tilak be tu'.

²⁵ Axa yet max yilon pax no' tol lecan oc jun ángel tu' junelxa bay nan yul be tu', cax chi chilon oc ba no' yinlak ch'en ch'en ayoc tilak be tu'. Max chil-lay oc yakan cham Balaam yuj no' yinlak ch'en, cax max mak'on pax cham no'.

²⁶ Max el cham yángel Jehová bay tu', max jitzontok ba bay sataktok, max oc pax waan bay yelxac'al yaliẍ sat be, bay c'amxa bay chi je' yelcan junok tilak be yet chi chalen ba.

²⁷ Max yilon pax no burro tu' junelxa tol waan oc jun ángel tu' bay nan yul be, toxac'al max ay paknaj no' yalan cham Balaam, xan max tit-xac'al yowal yin no', max c'oli mak'on cham no' yetok is k'okoch.

²⁸ A wal yet jun bek tu' max k'anjab aj no' yuj Jehová, max yalon no' bay cham Balaam axca ti': —¿Tzet max ach wutej? Mayal tz'aknaj oxel chin a mak'a', ẍi no'.

²⁹ —Yujtol yelxac'al chin etnej chi wabej. Tolok wal ayic' junok ch'en espada cayti', tixwal chach in tek cam tinani', ẍi cham bay no'.

³⁰ Max tak'wi no' bay cham axca ti': —Ayin ti' a chej inc'alta'a, chach occ'al wiban yet chach ec'c'al ec'jabok, caw wal ojtakxa c'am junelok caytu' chach wutej, ẍi no'. —Ja' yel toni, ẍi cham.

³¹ Lajwi tu' axa Jehová max ak'on yil cham Balaam jun yángel tu', tol ayic' bay nan yul be, ayoc ch'en espada yul is k'ab. Maxc'al wal yil cham jun ángel tu xin, max ay nojan satak.

³² Max yalon jun ángel tu' bay cham axca ti': —¿Tzet yuj xan max a mak' no' a chej ti' yin oxel? Ayin max in oc a satak cax max in makchen a be, yujtol max tit wowal yuj max ach tit yetok juntzan anima ti'.

³³ Asan no burro ti' max quin iloni, max yion el ba no' yul be yin oxel. Ta maj jitzil ba no' yul be, mayal mi ach wak' cam tinani', a pax no chej ti' maj cam no', ẍi cham ángel tu'.

³⁴ Max yalon cham Balaam bay cham yángel Jehová tu' axca ti': —Max oc in mul ayach xin, man wojtakok ta ach cha makchej in be tu'; yuj tu xin, ta c'am chi cha a c'ul chin toji, chi je' in meltzoj tinani', ẍi cham.

³⁵ Max tak'wi jun ángel tu' bay axca ti': —Chi je' chach toj yetok eb anima ti' palta asanc'al tzet ok wal ayach, asan ok ala', ẍi cham ángel tu'. Xan max tojc'al cham Balaam yetok eb chekbej tu'.

Max toj Balac chaon cham Balaam

³⁶ Axa max yaben cham Balac tol toxa chi apni oc cham Balaam, max toj chaon bay yulak be bay jun conob ay yul yet Moab bay is ti' a' aej chi yik Arnón, caw wal sat mojonxac'al ay.

³⁷ Max yalon cham Balac tu' axca ti': —Yelc'ulal max ach wawtej, ¿tzet yuj xan ijan maj a jetek a ba? Yamita max a na' tol man ok in tzakay wak'on jantak tzet chochej, ẍi cham Balac tu' bay.

³⁸ Max tak'wi cham Balaam axca ti': —C'am chach oc il, ayinxa ec'ok, palta c'am chi je' walon tzet yetal chi yochej in c'ul; asan tzet yetal chi chek Dios wala', asan ok ul wala', ẍi cham Balaam.

³⁹ Lajwi tu xin, cax max toj cham Balaam yetok cham Balac bay conob Quiriat-huzot.

⁴⁰ A tu' max chek cham Balac mak'lay cam no wacax c'al no calnel yet chi chi' cham Balaam yetokc'al eb icham winak is chekbej cham Balac.

⁴¹ Axa yet junxa c'ual xin, max ilaytok cham Balaam yuj cham Balac bay jolom witz chi yik Bamot-baal; a tu' chi je' yilontok eb is campamento eb israel.