Nm 21 - A Txꞌan Biblia Yin Kꞌanjobal 1989

Max ayc'ay tx'otx' Horma yuj eb israel

¹ Axa yet max yaben cham is reyal eb cananeo ay bay Arad yul yet Néguev tol ayoc eb israel yulak be chi apni oc bay Atarim, max eltok yak'on owal yin eb. Ay eb max michchaj yuj cax max yiontok yul preso.

² Lajwi tu xin, max yak'on eb israel is ti' bay Jehová: ta chi colwaj yetok eb yet chi yak'on ayc'ay eb jun nación tu', ok yak'on c'ayil eb masanil conoblak tu' yin junelnej.

³ Max yikej Jehová colwaj axca max yun k'anon eb, xan max yak' ayc'ay eb israel tu' eb cananeo. Max c'aycan el eb masanil c'al is conobal eb, yuj tu' Horma*fn* max yikcan jun lugar tu'.

Jun labaj tol bronce

⁴ Max el eb israel bay yich witz Hor, cax max toj eb bay be chi ec' bay a' Cakyin Mar. Najat max ec' yoy ba eb yujtol maj ec'tok eb bay tx'otx' Edom. A yet ayoc eb bay yul be tu xin, max cabax aj c'ul eb,

⁵ max tit yowal eb yin Dios c'al yin cham Moisés. Max yalon eb axca ti': —¿Tzet yuj max on eiltek bay Egipto? ¿Tom asan yuj co cam yuj wajil bay takin tx'otx' ti'? C'am tzet chi co lo', tamwal tzet chi juq'uej. C'amxa chi techaj co loon juntzan yobal loj ti', ẍi eb.

⁶ Yuj wal tu xin, max yaontek Jehová juntzan no labaj caw wal ow, yet chi chilay eb anima tu' yuj; xiwil eb israel tu' max cam yuj no'.

⁷ A yet max yilon eb axca tu', max toj eb yalon bay cham Moisés axca ti': —Mayal oc co mul on, max jal yobal k'anej yin Jehová c'al en ach ti'. A tinani' xin, k'an bay Jehová tol chi yiel Cham no labaj ti' co xol, ẍi eb. Cax max k'anon cham Moisés bay Jehová ta chi yak' mimanc'ulal yiban eb anima tu'.

⁸ Max yalon Jehová bay cham Moisés axca ti': —Watx'nej junok ch'en labaj axca yili no' tu', cax chaon ajtok yin junok te' miman is tel, yet watx' a yet chi chilay eb anima yuj no labaj ti', ta chi ajtok t'anan eb yin jun tu', c'amxa chi cam eb yuj no', ẍi Cham.

⁹ Max watx'nen cham Moisés jun labaj naba bronce, max yaon ajtok yin jun te'. Yuj tu xin, a yet max chilay eb anima tu' yuj no labaj tu', cax chi oc t'anan eb yin jun ch'en labaj, cax max jay c'ul eb.

A tzet max yun toj eb bay Moab

¹⁰ Max beyc'altoj eb israel, max apni oc eb bay Obot.

¹¹ Max el pax eb bay Obot, max beyc'altoj eb satak, cax max apni oc eb bay Ije-abarim bay tz'inan tx'otx' bay yichcanil is tx'otx'al eb Moab.

¹² Max tojc'al eb, max apni oc eb bay ti a' aej chi yik Zered.

¹³ Max beyc'altoj eb, max apni oc eb bay k'axepaltok a' aej chi yik Arnón. A jun aej tu' a tu' chi ec' bay tz'inan tx'otx' ay yul makbej eb amorreo. A ton jun aej tu' ayoc yin mojonail yuj eb Moab yetok eb amorreo.

¹⁴ A ton juntzan lugar tu' chi binaj yul tx'an libroal yabixal owal yet Jehová bay chi yal axca ti': A conob Vaheb bay yul makbej Sufá, bay yulak aej c'al bay yul a' Arnón,

¹⁵ a jun k'ean bay is tilak a' aej tu', a' ayoc is mojonalok yet Moab, chi apnitac'al oc bay conob Ar, ẍi.

¹⁶ Max el eb bay a' aej Arnón, max tojc'al eb masantac'al max apni oc eb bay Beer, a ton bay tu' ay jun a' uc'bala' bay max yal Jehová bay cham Moisés axca ti': Wajbaj oc masanil eb anima, ayin ok wak' aej bay eb, ẍi Cham.

¹⁷ A ton yet jun tiempoal tu' max bitni eb israel axca ti': Max ajol a' aej bay wajan. Ajokab wornaj a' aej. Tol ok on bitnok yuj aej max ajol wornaj ti'.

¹⁸ A eb yajaw max jotajtek eb yetok is k'okoch ibil oc yuj, a eb mimek yajaw bay yul is conobal, a yetok is k'okoch eb max jakajtek aej, ẍi is bit eb. Max beyc'altoj eb israel bay tz'inan tx'otx' masantac'al max apni oc eb bay Matana.

¹⁹ Max el eb bay Matana, max apni oc eb bay Nahaliel. Max el eb bay Nahaliel tu', max apni oc eb bay Bamot.

²⁰ Max el eb bay Bamot, max apni oc eb bay jun jobe ay yul is tx'otx'al eb Moab, bay yetc'ulaltok mimek witz yet Pisga, a ton bay tu' miman txequel yilitok tx'otx' tz'inan tx'otx'.

Yayc'aybal rey Sehón

²¹ Max yatok eb israel is chekbej bay Sehón is reyal eb amorreo, max yalontok eb axca ti':

²² Chi jochej chon ec'tok sat e tx'otx' jaloni. C'am wal jabok tzet ok ec' co loaytok xol e yawoj, c'al xol e yuva, tamwal juq'uena' bay e yuc'bala', asanc'al yul miman be chon ec'tok bay yul e tx'otx', ẍi eb chekbej tu'.

²³ Maj wal je' c'ul Sehón tu' yec'tok eb israel tu' bay yul is tx'otx'. Asan tol max wajbaj oc masanil eb is soldado, cax max eltok yak'on owal yetok eb israel tu' bay takin tx'otx'; bay Jahaza max yak'on eb owal.

²⁴ Max yak' eb israel owal yetok eb, cax max ayc'ay eb nak tu' yuj eb; cax conobxa max yut ay ba eb bay sat is tx'otx' eb tu'. Chi tojtac'al tx'otx' bay is ti' a' Arnón, masantac'al chi apni oc bay is ti' a' Jaboc, masantac'al bay chi ec' is mojonal is tx'otx' eb amonita. A jun tx'otx' tu' caw wal watx' makay yuj eb.

²⁵ Axca tu' max yun yoccan is tx'otx' eb amorreo yetok eb israel. Max cajay eb israel bay conob Hesbón yetokc'al juntzanxa conoblak ayic' yinlak.

²⁶ A Hesbón, a ton jun conob bay max ayji ec' Sehón reyal eb amorreo. A Sehón tu' max yak'c'al owal yetok eb reyal Moab yet yalantok. Max yiec' jun makan tx'otx'al eb chi apnitac'al oc bay a' aej chi yik Arnón.

²⁷ Yuj tu' xan max yal eb chi k'anjab yin poesía axca ti': Sebaxek bay Hesbón, a ton bay is conobal rey Sehón. Ca watx'nejek ajok, watx' che yut e watx'nen oc is murallail.

²⁸ Atac'al bay Hesbón tu', bay is conobal rey Sehón, max tit eb max bet aon oc k'ak' k'ak'ej, max ak'on lajwok ay Ar yul yet Moab, c'al eb mimek yajaw yayji bay jun conob bay k'ean yiban a' Arnón.

²⁹ Ok'bal ex c'ul ex aj Moab. Mayal ex lajwi ayok ex conobal dios Quemós. A ton jun e diosal tu' maj je' colwaji xan max elaj masanil eb e soldado, axa eb ix ix max can eb ix yul k'ab rey Sehón.

³⁰ Palta mayal lajwi ay is tec'anil Hesbón tu' juj masantac'al bay Dibón. Max jak' c'apax lajwok eb amorreo tu' bay max on tojc'al, masantac'al max on apni bay Nofa cawilal Medeba, ẍi jun poesía ti'.

³¹ Caytu' max yun yioncan eb israel tx'otx' tx'otx' makbil yuj eb amorreo.

Yayc'aybal rey Og

³² Max lajwi tu' cax max yaontok cham Moisés is chekbej bay conob Jazer yet chi beytzej tzetbil yayji. Max ayc'ay jun conob tu' yetokc'al masanil conoblak oyan oc yinlak, cax max uktelay el eb masanil eb amorreo cajan bay tu'.

³³ Max lajwi tu xin, cax max t'inontok ba eb israel bay yetc'ulal tx'otx' Basán, axa yeltek Og reyal Basán yetok masanil is soldado yak'on owal yin eb bay Edrei.

³⁴ Yuj tu xin, max yalon Jehová bay cham Moisés: C'am chex xiw bay Og tu'; ayin ok waoc Og tu' c'al is soldado c'al is nación ti' yul e k'ab. Axca max e yut Sehón reyal eb amorreo ay bay Hesbón, axca tu' ok e yut c'apax Og tu', ẍi Jehová.

³⁵ Axca tu' max yun cam Og yetok is yuninal c'al masanil eb is soldado yuj eb israel, c'amxa junok max cani. Max occan tx'otx' tx'otx' tu' yetok eb israel.