Nm 20 - A Txꞌan Biblia Yin Kꞌanjobal 1989

A' aej max eltek bay sat ch'en ch'en

¹ A wal yet babel xajaw, max apni oc eb israel bay takin tx'otx' chi yik Zin. A tu' max cancan eb jun tiempoal yul is makbej Cades. A tu' max cam xal María is yanab cham Moisés, cax max mukay bay tu'.

² Yujtol caw wal c'am a' aej chi yuc' eb conob, xan max aj yaw masanil anima yin cham Moisés c'al yin cham Aarón.

³ Max yalon eb bay cham Moisés axca ti': —Watx' mi mata max on camxac'al yetok eb jet conob max yak' cam Jehová.

⁴ ¿Tzet yuj xan max on e yitek bay takin tx'otx' ti'? ¿Tom che yochej chon cam pax ayon ti' yetok co jobbejal no'?

⁵ ¿Tzet yuj xin, xan max con e yieltek bay yul yet Egipto, cax max con e yiontek bay jun lugar manxa yobalok ti'? A cayti' c'am chi je' trigo, tamwal te higo, tamwal an uva, tamwal granada, tamwal ay jabok a' aej chi je' juq'ueni, ẍi eb.

⁶ A wal yet max yaben cham Moisés c'al cham Aarón juntzan k'anej tu', max jitzon el ba eb, cax max toj eb bay is puertail is cajlobal Dios. A bay tu' max bet ay nojan eb bay sat tx'otx'; axa yet jun bek tu' cax max tx'oxon ba is mayk'ak'al Jehová bay is cawilal eb cham.

⁷ Max yalon Jehová bay cham Moisés axca ti':

⁸ —Itok a k'okoch cax chalon bay oẍtak Aarón tol chi colwaj etok yet che wajbantok eb anima, chex toj bay ch'en miman ch'en bay tu'. Cax chalon bay ch'en tol chi elol aej bay sat ch'en, axa satak masanil eb anima tu' ok elol a', axa yuq'uena' eb tu' yetokc'al is jobbejal no' eb, ẍi Jehová.

⁹ Max yion eltek cham Moisés te k'okoch satak Jehová, axca max yun yalon Cham;

¹⁰ max wajbantok eb eb anima bay ch'en ch'en tu'. Max yalon cham Moisés bay eb anima axca ti': —Abek xin, ayex tol tenomtak ex ti': ¿Tom yowalil wal chi jieltek a' aej sat jun ch'en ch'en ti', cax chi jak'on a' e yuq'uej? ẍi cham.

¹¹ Max lajwi yalon cham axca tu', max yion aj cham is k'ab cax max mak'on oc is k'okoch cayel yin sat ch'en ch'en tu', axa yelol secnaj aej tu'; max yuq'uena' eb yetok jobbejal no' tu'.

¹² Max lajwi tu xin, cax max yalon Jehová bay Moisés c'al Aarón axca ti': —Yujtol ayex ti' c'am wal chin e yaoc yin e c'ul, cax maj e tx'ox satak conob Israel ti' tol asanxanej in ocok, yuj tu' mayexnak ok e yioctok eb anima ti' bay sat tx'otx' tu' bay max wala' tol ok wak' ayex, ẍi Cham.

¹³ Meriba*fn* is bi jun lugar tu' bay max alxi aj eb israel yin Jehová, cax max tx'ox Cham tol asanxanej ocok.

Maj cha' eq'uel eb Edom eb israel bay is tx'otx'

¹⁴ A yet ayic' cham Moisés bay Cades cax max yaontok cham is chekbej bay cham reyal Edom yet chi toj yala': Ayon israel on, tol ac'al onto oc etok, chi jaltok ayach: Ojtak tol jantakxa yailal max jil bay Egipto.

¹⁵ Ac'ala' ojtak c'apaxok tzet max yun yapnican oc eb jichmam on bay tu' yet payxa yin najatilxa tiempoal. Axa yet yintakilxa ti' xin, caw wal max yak' eb nak aj Egipto yatakilal jiban on, c'al yiban eb jichmam on.

¹⁶ Yuj wal tu xin, max co k'an is colwal Jehová jetok; max yab Cham yel jaw xin, xan max chektek is yángel yet max on yion el bay Egipto tu'. Yuj tu xin, a tinani' ayon ec' bay conob Cades bay is mojonal a tx'otx',

¹⁷ xan chi jal ayach, matawal chi el yin a c'ul chon a cha eq'uel yul a nación ti'. C'amc'al sat e yawoj ok co lo', c'amc'al aej bay e yuc'bala' ok juq'uej; asanc'al yul miman be chon toji. C'amc'al bay ok on el q'uexnaj yul miman be tu' masantac'al ok on k'axpoj ec' yul a nación ti', ẍitok cham Moisés.

¹⁸ Max tak'wi cham reyal Edom tu' axca ti': —C'am chex ec'tok yul in nación ti'. Tatol ok e mimanej e ba cax ok ex ec'tok, ok in eltok e yin yetok in soldado, ẍi bay eb.

¹⁹ Max yalon pax eb israel axca ti': —C'amak, ayon ti' asanc'al yul miman be chon toji. Ta ay bay ok juc' aej bay e yuc'bala' yetok co jobbejal no', ok co tojlanej ayach. Asan wal chi jochej tol chon k'axpoj ec' bay sat a tx'otx' ti' yin watx'il, ẍitok eb.

²⁰ Cax max tak'wi pax cham reyal Edom tu' axca ti': —C'am permiso chex ec'tok, ẍi cham. A' max yutej tol max toj cham makon eb israel yetok masanil eb is soldado, watx'xac'al yayji oc is yarma eb yul is k'ab.

²¹ Yuj tu' xan max say eb israel junxa be bay max ca toji.

Camichal cham Aarón

²² Masanil eb israel max el eb bay Cades, cax max t'inontok ba eb bay yetc'ulal witz Hor, bay sat is mojonal Edom.

²³ A tu' max yal Jehová bay cham Moisés yin cham Aarón axca ti':

²⁴ A tinani' xin, toxa ok cam Aarón ti', man ok apnok oc bay sat tx'otx' max wal tol ok wak' ayex, yujtol maj e yikej chekbanil max wak' ayex bay is ti' a' Meriba.

²⁵ A tinani, itok Aarón ti' yetok is c'ajol chi yik Eleazar bay jolom witz Hor ti'.

²⁶ A tu' ok eil is pichil Aarón ti' chi k'an yin is sacerdoteal, cax chaoncan oc yin Eleazar, yujtol a Aarón ti' ok camxac'al bay tu', ẍi Jehová bay cham Moisés.

²⁷ Cax max yiken cham Moisés tzet max yal Jehová; satak wal masanil anima max ilaytok Aarón c'al Eleazar yuj, bay jolom witz Hor.

²⁸ A tu' max yiel cham Moisés is pichil cham Aarón cax max yaon oc yin Eleazar bay jolom witz tu'; a bay tu' max camxac'al cham Aarón. Maxc'al lajwi tu xin, cax max paxaytek cham Moisés yetok Eleazar.

²⁹ Axa yet max yaben masanil eb israel tol mayal cam cham Aarón, 30 c'ual max oc eb yin cusc'ulal yuj cham.