Nm 16 - A Txꞌan Biblia Yin Kꞌanjobal 1989

Max aj wan Coré yin cham Moisés

^1-2 A Coré is c'ajol Ishar yinatil Coat, titnak yin is tribual Leví, yetokc'al oxwanxa eb titnak yin is tribual Rubén, max meltzoj oc eb ajc'ulal yin cham Moisés. A eb max yaoc ba tu', a ton Datán c'al Abiram, is c'ajol Eliab eb, yetok c'apax On is c'ajol Pelet; yetok junxa 250 eb israel max yaoc ba yetok eb. A eb max yaoc ba tu', yajaw conob yayji eb, ayoc eb tz'akilok eb chi lajti'nen junok k'anej bay yul conobal tu'.

³ Masanil eb tu' max wajbaj oc ba eb, cax max toj eb yilon cham Moisés yetok cham Aarón; max yalon eb axca ti': —K'okbilxa e maynen e ba tu', yujtol co masanil on ayon ti' yet-xa Dios jayji, ayxa oc Cham co xol co masanil. ¿Tzet yuj xan che yaoc e ba yajawilal jiban, ayon is conob on Jehová ti'? ẍi eb.

⁴ A wal yet max yaben cham Moisés juntzan k'anej tu', cax max ay nojan sat tx'otx'.

⁵ Max yalon cham bay Coré c'al bay masanil eb tzunan oc yintak axca ti': —Ato yet yecal, catatu' ok tx'oxon Jehová ayon mactxel eb yet, asan eb sic'bil el yuj ok je' yoc is c'atan yin yak'on serbil altar.

^6-7 A yet k'inibalil yet yecal, iektek e txayib, cax che yaon aytok tzak'ak' yul, yetok incienso, cax che yaon oc satak Jehová. A mac ok sic'can el Cham, a ton jun tu' sic'bil el xin. K'okbilxa e maynen e ba tu xin, ex levita, ẍi Moisés.

⁸ Max yalon pax bay Coré axca ti': —Abek tzet ok wal ti xin, ex levita:

⁹ ¿Tom caw wal txennej yelapnok jun ti' yin e nabal, tol sic'bil ex el yuj co Diosal xol eb jet conob Israel, cax max ex yaon oc Cham bay is cawilal yuj e taynen is cajlobal c'al e yak'on serbil eb conob?

¹⁰ Max el yin is c'ul Jehová tol a' ayex, tribual ex Leví ti', chex oc is cawilal Cham, axa tinani' xin, che yochej chex ocxac'al sacerdoteal.

¹¹ Wal yel c'am yelapnok cham Aarón yet che yal yobal k'anej yin, yetok masanil eb ajun e yetok ti', palta tol a wal bay Jehová tenomtak che yut e ba, ẍi cham Moisés.

¹² Yin aymanil max chek cham Moisés tu' toj tit Datán yetok Abiram is c'ajol Eliab, palta max yalontek eb bay axca ti': —C'am chon toji.

¹³ ¿Tom txennej tzet max on otej, max on eiltek bay tx'otx' Egipto bay xiwil watx'il, caw wal xiwil tzet ay sat tx'otx', max on eontek yet chon cam cayti', chitoc'al ochej chaoc a ba yajawilal cayti'?

¹⁴ Ach ti' manak bay junok tx'otx' caw wal xiwil tzet ay sat bay max on etek, c'am jabok co tx'otx' chak'a' bay chi jaw jabok juva. ¿Tom suconxac'al chela'? C'am chon toj jab tzet chala', ẍitek eb.

¹⁵ Yuj wal tu xin, max tit yowal cham Moisés, max yalon bay Jehová axca ti': —Manchak a cha' is yofrenda eb nak tu'. Ayin ti', caw wal c'am tzet chi wut eb nak, tamwal junok is burro eb nak chi wiic'ok, ẍi cham bay Jehová.

¹⁶ Max lajwi tu' max yalon cham Moisés bay Coré axca ti': —A yet yecal chach oc satak Jehová, yetok eb nak 250 ajun etok. Ac'ala' c'apax cham Aarón chi apni c'apax oc cham bay tu'.

¹⁷ Ach ti' yetok Aarón che yitok e txayib, cax che yaon aytok incienso yul, ac'ala' caytu' chi yun c'apax eb winak ajun etok ti', cax che yaon oc satak Jehová, ẍi cham Moisés.

¹⁸ Axa yet junxa c'ual tu', junjunc'al max yitok is txayib, max yaon aytok eb tzak'ak' yul yetok incienso, cax max wajban oc ba eb bay is c'atan cham Moisés yetok cham Aarón bay satak mantiado bay chi co chalej co ba yetok Jehová.

¹⁹ Maxax wajbaj oc Coré tu' masanil eb israel bay tu', ajc'ulxa yayji oc eb yin eb cham. Yet wal jun bek tu' max tx'oxon ba is mayk'ak'al Jehová bay satak eb anima tu'.

²⁰ Max yalon Jehová bay cham Moisés c'al bay cham Aarón axca ti':

²¹ —Pojek el e ba xol juntzan anima ti', yet wal jun bek ti' cax ok in c'ayon el eb, ẍi cham.

²² Yuj tu' max ay nojnaj eb cham bay sat tx'otx', max yalon eb axca ti': —Mamin, ach ti' ach chak' is k'inal masanil eb anima, ¿tom cha c'ayil masanil eb anima ti' yuj is mul junok winak? ẍi eb cham.

²³ Max tak'wi Jehová bay eb cham:

²⁴ —A tinani' al bay masanil eb wajan ec' ti' tol chi pojil ba eb masanil yinlak is mantiado Coré, Datán, c'al Abiram, ẍi Jehová.

²⁵ Max aj wan cham Moisés max toj bay ayic' Datán c'al Abiram, cax max toj masanil eb yicham winakil eb israel yetok.

²⁶ Max yalon cham bay masanil conob axca ti': —Pojek el e ba yin is mantiado jun makan eb anima yob is nabal ti', c'am junok is tzet yetal eb che mitx'a', ta c'amak, ok ex cam yailok is mul eb, ẍi cham.

²⁷ Yuj tu' xan max pojil ba masanil anima yinlak is mantiado Coré, Datán c'al Abiram. A Datán c'al Abiram tu' max eltek lecan eb bay ti' is mantiado yetok yistzil c'al yuninal eb.

²⁸ Max c'olic'al yalon cham Moisés axca ti': —Axca ti' ok yun e yojtaknen elok tol a Jehová cheknej in wunen masanil juntzan ti', tol man yulok wet chi wunej.

²⁹ Ta ilya' chi on cam eb ti', axcac'al chi yun cam anima, chi yal elapnok tol manak Jehová chin aon oc yin jun opiso ti'.

³⁰ Palta ta ay junok tzet yetal tol c'amtoc'al bay chi uji ok yun Jehová, tol ok poj ba tx'otx' tx'otx' ti', cax yin wal yiquisal eb ok paxcan ay bulnaj eb yul c'ul tx'otx', yetok masanil is tzet yetal eb, xan caytu' ok yun cam eb, ta caytu' ok yunej, ok e yojtaknej elok tol a juntzan winak ti' max intaknen el Jehová, ẍi cham.

³¹ A yet max lajwi yalon cham Moisés juntzan tu', max pojon ba tx'otx' tx'otx' yalan eb winak tu'.

³² Cax max paxay eb nak yul tx'otx' yetokc'al is familia. Caywal tu' max yun c'ayil masanil eb max junanej ba yetok Coré c'al masanil is tzet yetal eb.

³³ Iquis masanil eb anima tu' cax max tojcan eb bay cambal tu', yetok masanil tzet yetal ay eb. Max lajwi tu', cax max junanen pax ay ba tx'otx' junelxa. Axca tu' max yun c'aycan el jun makan anima tu' xol eb israel.

³⁴ A yet max yaben eb anima oyan ec' yinlak tu' yel yaw eb, max toj eb elok, cax max yalon eb: C'amokab chon turlay c'apax aytok yuj tx'otx' ayon ti', ẍi eb.

³⁵ Ac'ala' c'apaxok max yatek Jehová k'ak'ej yet max tz'acantok eb 250 max ak'on tz'a incienso, a ton eb max yaoc ba yetok Coré, Datán c'al Abiram.

³⁶ Max k'anjab pax Jehová bay cham Moisés axca ti':

³⁷ Al bay Eleazar is c'ajol sacerdote Aarón tol chi yieltek is txayib naba bronce bay xol eb max tz'atok tu', cax chi secon el tzak'ak' ayay yul tu' najat.

³⁸ A is txayib juntzan anima max cam yuj is mul ti', wet-xa max yuncanok, yujtol max k'anlay yet max yak'on eb incienso ayin. Yuj tu xin, a juntzan mitx'k'abej tu' che watx'nej oc yin laminail, cax chi oc is makilok altar, yet watx' chi yilc'al oc eb et israelal cax chi naonc'altek eb, ẍi Jehová.

³⁹ Max wajbantek cham sacerdote Eleazar masanil txayib naba bronce tu', juntzan max k'an eb max tz'atok yuj k'ak'ej tu', cax max yaloni tol chi ak'lay uljok cax chi watx'ji oc yin laminail yet chi oc yenelok altar.

⁴⁰ A jun ti' max cancan yet is nabaniltek yuj eb israel c'al yojtaknen el eb tzetbil tol asan eb yinatil Aarón chi je' yoc satak altar yet chi yak'on tz'a eb incienso bay satak Jehová. Ta ay junokxa comonc'al chi yun axca tu', chi cam axca max yun cam eb max oc is mul yetok Coré. Axca max yun yalon Jehová bay cham Moisés, axca wal tu' max yut cham Eleazar.

⁴¹ Axa yet junxa c'ual, masanil eb israel max oc ijan eb teyen oc cham Moisés c'al cham Aarón, max yalon eb axca ti': —Ayex ti' ipan e mak'on cam eb is conob Jehová, ẍi eb anima tu'.

⁴² Masanil conob max waj ba eb yin cham Moisés c'al yin cham Aarón cax chi toj t'anan eb yin mantiado bay chi co chalej co ba yetok Jehová. Yet wal jun bek tu' cax max oc boc'naj asun yin is mantiado tu' cax max tx'oxon ba is tzekekial Jehová.

⁴³ Yuj tu xin, max jitzontok ba cham Moisés yetok cham Aarón bay satak mantiado tu'.

⁴⁴ Max yalon Jehová bay cham Moisés:

⁴⁵ —¡Elanek is c'atan juntzan anima ti', yujtol a yet jun bek ti' ok wak' cam eb! ẍi Jehová. Maxc'al wal yab eb cham axca tu', max ay nojan eb sat tx'otx'.

⁴⁶ Max yalon cham Moisés bay cham Aarón axca ti': —Itek a txayib, chak'on noj yetok tzak'ak' ayic' satak altar cax chaon c'apax aytok incienso yul, cax chach toj xol eb anima yin aymanil, cax cha k'anon mimanc'ulal yuj is mul eb, yujtol mayal tit yowal Jehová, mayal jay ilya' yet chi yak'on cam anima masanil, ẍi cham.

⁴⁷ Max yiken cham Aarón. Yin aymanil max toj lemnaj xol eb anima bay wajan ec' eb tu'. A jun ilya' max yatek Jehová tu' mayal michchaj oc cam anima yuj. Yet wal jun bek tu' cax max yaon aytok cham incienso yuj k'anon mimanc'ulal Jehová yiban eb anima tu'.

⁴⁸ Max oc cham Aarón nan xol eb anima mayal cami yetok eb iquisto, axca tu' max oc wanaj jun ilya' tu'.

⁴⁹ Axa yet jun bek tu' mayal wal cam 14,700; tx'ok pax yayji juntzan eb maxax cam yetok Coré yuj is tenomtakil eb.

⁵⁰ Ato yet max oc wanaj cam anima tu', catatu' max meltzoj cham Aarón bay ayic' cham Moisés.