Biblia Todo Logo
Bìoball air-loidhne

- Sanasan -

Nm 14 - A Txꞌan Biblia Yin Kꞌanjobal 1989


Max alxi aj eb israel satak Jehová
( Dt 1.26-33 )

1 A wal yet max yaben eb israel juntzan tu', cax max aj yaw eb masanil, ok'ilc'al chi yun eb max ec' jun ak'bal tu'.

2 Max alxi aj masanil eb, max yalon eb bay cham Moisés c'al bay cham Aarón: Watx' mi wali ta a bay Egipto, ma xin bay takin tx'otx' max on camxac'al canok.

3 ¿Tzet wal yuj chon yitok Jehová bay jun tx'otx' tu'? Asan mi yuj co cam xol owal cayti', cax chi cancan eb jetbi c'al eb juninal, yet chi occan eb mosejal bay eb cajan cayti'. Yelxac'al mi watx' tatol chon meltzoj bay Egipto, ẍi eb israel tu'.

4 Max lajwi tu xin, cax max oc ijan eb waj alneni, cax chi yalon eb axca ti': Co say junok mactxel chon ikban meltzoj bay Egipto, ẍi eb.

5 Cax max ay nojan cham Moisés yetok cham Aarón bay sat tx'otx' bay satak eb anima tu' masanil.

6 Axa pax Josué, is c'ajol Nun, c'al yetok Caleb, is c'ajol Jefone, a ton eb max betic' iloj tx'otx', max tziltok eb is pichil yuj tx'oxon eb tol chi cus is c'ul eb.

7 Max yalon eb bay masanil eb anima axca ti': —A tx'otx' tx'otx' max bet jil tu', caw wal tol watx' tx'otx'.

8 Ta chi el yin c'ul Jehová colwaj jetok, ok jic'alta' tx'otx', a Cham ok ak'on ayon. Caw wal yax sat tx'otx'.

9 Yuj wal tu xin, c'am che yiel e ba yintak Jehová, cax c'am chex xiw bay eb anima ay bay jun lugar tu'. Axcac'al co loon junok pan, cac'al tu' ok yun c'ayil eb nak tu' juj. Tok ay mactxel ok colon eb ayon, a pax ayon ti xin, ayoc Jehová jetok. C'am chex xiw bay eb, ẍi eb.

10 Caxc'al mi axca tu' yalon eb, palta a eb anima tu' chi yochejxac'al eb chi k'okch'ennej eb. A yet tu', cax max tx'oxon ba Jehová yetok is mayk'ak'al bay ti' is cajlobal bay chi co chalej co ba yetok, bay is satak eb conob Israel masanil.

11 Max yalon Jehová bay cham Moisés axca ti': —¿Bak'in ok bek juntzan anima ti' in yintaknen elok? ¿Bak'in ok bekcan eb is cabc'ulal win, ti wal chi yil eb jantak milagro chi wun xol eb?

12 A tinani' ok watek junok miman ilya' yiban jun conob ti' yet chi c'ayilok. A en ok el junok conob wuj tol yel miman, cax tol ay yip yintak eb conob ti', ẍi Jehová.

13 Cax max tak'wi cham Moisés bay Jehová axca ti': —Caw wal yojtak eb anima bay Egipto jantak yayji oc epalil yet max eltek jun conob ti' xol eb bay tu'; yuj wal tu xin, a yet ok yaben aj eb anima bay Egipto tol cha c'ayil juntzan anima ti',

14 ok yalon eb a k'umal bay eb anima ay yul yet Canaán. A eb tu' max yab c'apax eb tol ach ti' Jehová, ayach ec' co xol ti', cax tol yin ac-'omba satil chi yun a k'anjab jetok. Ayachc'al ec' xol jun asun ayic' jiban; yet c'ualil ayach oc xol jun miman boc'an asun tu', cax chach beyc'al co satak. Axa yet ak'balil xin, xol jun miman k'ak' ayach ocok, cax chach bey co satak ayon a conob on ti'.

15 Ta junelnej cha mak'cam juntzan anima ti' axca tol junnej anima yayji, axa pax eb anima tol ok aben a k'umal xin, xiwil tzet ok yal eb en. Ok mi yal eb axca ti':

16 Maj je' yuj Jehová yak'on ayjok ec' eb anima bay sat tx'otx' bay max yak' is ti' yak'on bay eb, xan max mak'cam eb bay tz'inan tx'otx', ẍi mi eb.

17 Yuj tu xin, a tinani' Mamin Jehová, chin tewi ayach tol cha tx'ox epalil tinani', axca bay max ak' a ti'. Max aloni,

18 tol c'am chi tit owal yin ayman, yujtol ay a camc'ulal c'al a mimanc'ulal yiban eb yob, c'al eb tenomtak, palta chaoc yailal yiban mac ay is mul, c'al yiban yuninal eb c'al yitxiquin eb c'al yuninal eb yitxiquin eb tu'.

19 Ak' mimanc'ulal yiban juntzan anima ti', atac'ala' yayji oc a miman camc'ulal yin eb yettaxc'al max con el bay Egipto, masantac'al max con jay bay takin tx'otx' ti', ẍi cham.


Max alay oc yailal yiban eb israel yuj Jehová
( Dt 1.34-40 )

20 Max tak'wi Jehová bay cham Moisés axca ti': —Yunokabi, chi wak' mimanc'ulal yiban eb anima ti' axca wal alon tu'.

21 Palta chi wak' in ba yin testigoal yetokc'al in tzekekial tol chi nojcan el sat tx'otx' ti' yuj,

22 tol c'am junok eb conob ti' ok octok sat tx'otx', yujtol max yil eb in mayk'ak'al yetokc'al milagro max wun bay Egipto c'al bay takin tx'otx' ti', palta lajonelxa in yak'on porobal eb, cax c'amc'al chi yikej eb tzet chi wala'.

23 Yuj tu', man ok yil eb tx'otx' max wak' in ti' wak'on bay is yichmam eb. Tamwal junok eb tol chin intaknen elok, ok ilon tx'otx'.

24 Palta asan in chekbej Caleb ok apnok oc bay sat tx'otx' tu', yujtol yikemc'al ayin, watx'c'al is nabal; a' ok sataknen tx'otx' yetok eb is yuninal, a ton tx'otx' tx'otx' max bet yil tu'.

25 Cajan eb amalecita c'al eb cananeo bay jobelak cawil ti', yuj tu xin, a yet yecal chex meltzoji. Axa tu' chi ca e toj bay takin tx'otx' yetc'ulaltok a' Cakyin Mar, ẍi Jehová.

26 Max k'anjab Jehová yetok cham Moisés c'al yetok cham Aarón axca ti':

27 —¿Jantaktoc'al tiempoal ok techaj juntzan anima c'am watx'il is nabal ti' wuj? Max wab yalon eb in k'umal.

28 Asi', al bay eb axca ti': Ayin Jehová in, max wak' in ti' tol ok yun axca wal max yun waben e yalon tu'.

29 Masanil eb nak winak tol ec'banxa is k'inal yin 20 abil, eb max ilay aj is listail, a ton eb yob max yal win, ok cam eb cax ok can c'otjab is bakil eb bay takin tx'otx' ti'.

30 Asannej Caleb is c'ajol Jefone, yetok Josué is c'ajol Nun, a eb ti' ok octok bay tx'otx' tx'otx' tu', bay max wak' in ti' wak'on ayex. Axa e masanil mac ex tol yob tzet max e yal win, maj ex octok bay tx'otx'.

31 Axa pax eb e yuninal max e yala' tol ok ayc'ay yul is k'ab eb ajc'ul, ok wioctok eb bay tx'otx' maj e yochej tu'; a eb ok yak' tzalojbok c'ul bay tu'.

32 Axa pax ayex ti' ok can e mimanil bay takin tx'otx' ti'.

33 A eb e yuninal ti', ok ec' eb iloj calnel bay takin tx'otx' ti' yin 40 abil, axca tu' ok yun tojlanen el eb e tenomtakil, masantac'al ok yal e cam cayti' e masanil bay takin tx'otx' ti'.

34 Yin cawinak c'u max e yil tzetbil wal yili tx'otx' max bet e yil tu', yuj tu xin cawinak abil yailal ok oc e yiban, chi yal elapnok junjun abil yin junjun c'u. Axca tu' ok yun e yojtaknen el yailal tol ajc'ul in e yin.

35 Ayin Jehová in ti', chi wala'. Axca tu' ok wun ayex yujtol max e wajbaj oc e ba yin ajc'ulal win, xan a bay takin tx'otx' ti' ok ex lajwokcan ayok, ẍi Jehová quex chi bay eb.


Max cam eb ilom tx'otx' yob is nabal

36-37 A eb max betic' iloj tx'otx' yuj cham Moisés, yobc'al max yun yalon eb tzetbil yayji oc tx'otx', xan max yal eb anima buchwal k'anej yin Jehová.

38 Yuj tu' max yatek Jehová jun ilya' yiban eb ilom tx'otx' tu', xan max cam eb. Asanxanej Josué is c'ajol Nun, yetok Caleb, is c'ajol Jefone, majto camok.


Max ayc'ay eb israel bay Horma
( Dt 1.41-46 )

39 A yet max yalon cham Moisés bay eb israel tzet max yal Jehová, masanil eb max oc yin cusc'ulal yuj.

40 Axa yet max sakbi aj yet junxa c'ual, max pet aj wan eb, max naon eb tol chi toj eb yak' owal yetok eb anima cajan bay tzalanlak. Xan max yal eb bay cham Moisés axca ti': —A tinani', wal yel, tonek bay sat tx'otx' bay max yak' Jehová is ti' tol ok yak' ayon. Manak tu', yel toni max oc co mul, ẍi eb.

41 Max yalon cham Moisés bay eb axca ti': —¿Tzet yuj xan che ten tzet max yal Jehová? A jun tzet che na' tu', caw wal man watx'ok ok elocok.

42 Manchak ex toji, yujtol man ok colwaj Jehová e yetok, ok ex ayc'ay yuj eb ajc'ul.

43 Makbil exxac'al yuj eb amalecita c'al yuj eb cananeo, tol ok yak' eb owal e yetok, cax ok ex mak'on cam eb, yujtol max e yiel e ba yintak Jehová, xan c'amxa oc Cham e yetok, ẍi cham Moisés.

44 Palta a eb xin, max pitnejc'al ba eb, cax max toj eb bay siquilal tx'otx'. Axa pax te caẍail is trato Jehová, yetok cham Moisés, c'am wal jabok chi el bay yul campamento.

45 Axa yet max toj eb nak tu xin, makbil yajapnok eb yuj eb amalecita c'al yuj eb cananeo, cax max yak'on eb owal. Axa max yun xin, max ayc'ay eb israel tu', max uktelay eb masantac'al bay Horma.

Kanjobal (Q’anjob’al) © Sociedad Bíblica de Guatemala 1989

Bible Society in Guatemala
Lean sinn:



Sanasan