Nehemías 8 - A Txꞌan Biblia Yin Kꞌanjobal 1989

Max yawtej Esdras ley satak masanil eb anima

¹ Axca tu' max yun wajban ba masanil conob bay Jerusalén bay ti' puerta bay chi eltok eb ix ix ioj aej. Cax max yalon eb bay cham Esdras tol chi yitek tx'an yunal ley yet cham Moisés, ak'bil yuj Jehová bay co conob.

² A yet babel c'ual yet jun xajaw tu' max yiontek cham sacerdote Esdras tx'an yunal ley bay satak eb anima wajan ec' tu', masanil eb winak yetok masanil eb ix ix, c'al yetok masanil eb unin tol chixa nachaj el yuj ayic' bay tu'.

³ Max chaon oc cham yawten tx'an yet k'inibalil masantac'al yet max oc chuman, satak masanil anima bay tu'. Masanil eb conob tu' caw wal watx' max yun taynen yab eb tzet ayay yul tx'an yunal ley tu'.

⁴ Watx'nebil aj jun te plataforma bay lecan ajtok cham Esdras. Ay c'apax ajtok cham Matatías, cham Sema, cham Anías, cham Urías, cham Hilcías c'al cham Maasías, bay is watx' k'ab cham. Axa pax bay is q'uexan k'ab cham xin, a tu' ay pax ajtok cham Pedaías, cham Misael, cham Malquías, cham Hasum, cham Hasbadana, cham Zacarías c'al yetok cham Mesulam.

⁵ Max yil masanil conob jakontok cham Esdras tx'an un, yujtol can bay ayajtok cham. A yet max jakon cham tx'an tu', cax max aj lecan masanil eb anima.

⁶ Max yalon cham Esdras watx' k'anej bay Jehová, cham Dios Miman Yayji Ocok. Cax masanil eb anima ayaj is k'ab eb can max yalon eb: Yunokabi, ẍi eb. Ayman max ay nojan eb sat tx'otx' yuj yoc eb yin ayilal bay Jehová.

⁷ Axa eb cham levita: a ton Josué, Bani, Serebías, Jamín, Acub, Sabetai, Hodías, Maasías, Kelita, Azarías, Jozabed, Hanán c'al yetok Pelaías, a eb ti' max watx' alnen el bay eb conob tzet chi yal elapnok ley tu' cax ayc'al ec' eb conob bay is lugar tu'.

⁸ Max yawten eb tx'an yunal ley Dios tu' yin jichanil, cax max coc'alnen yin is ti',*fn* yet chi nachaj el yuj eb anima tzet chi yal tx'an ley tu'.

⁹ Masanil eb anima max ok'ajok yuj max yab eb tzet wal yayji oc ley. Axa cham Nehemías tol gobernador yayji oc bay tu', c'al cham sacerdote Esdras tol meẍtol c'apaxok, c'al yetok eb levita chi cuyon eb conob tu', max yalon eb tol c'amokab chi oc cusc'ulal yin eb anima tu', yujtol a jun c'ual tu' yet Jehová co Diosal yayji.

¹⁰ Yetok c'apax junxa, max yalon cham Nehemías bay eb: Asek, cax che loon loj yet k'in, c'al e yuq'uen ac' vino yin tzalojc'ulalil, cax che yawten eb anima c'am is lobej watx'nebil low e yetok, yujtol a jun c'ual ti' yet Cham Jajawil yayji ocok. C'amokabc'al chex cusi, yujtol a tzalojc'ulalil chi yak' Jehová, a ton wal ayoc jipomalok, ẍi.

¹¹ Max tenchanelay c'apax eb conob yuj eb levita: Bekek e yok'i yujtol yet Jehová yayji jun c'ual ti', c'amokab mac chi cusi, ẍi eb.

¹² Cax max toj masanil eb conob lowok c'al yuq'uena', max yawtelen ba eb lowok. Caw wal max oc tzalojc'ulalil yin is yanimail eb, yujtol max cam wal yaben eb tzet max yal is cuybanil.

Max cha' eb k'inal chinama

¹³ A yet junxa c'ual max wajban ba eb yajawil yayji yin junjun makan tol yicanc'al ba xol conob masanil, eb sacerdote c'al eb levita, yetok cham Esdras, yuj cuyon eb tzet wal yelapnok ley.

¹⁴ Axca tu' max yun nachaj el yul tx'an un tu' yuj eb tol a Jehová max alon bay cham Moisés tol chi ayji ec' eb israel bay yulak chinama yin k'in yet is suk xajaw.

¹⁵ Axca tu' max yun yal-lay el xolak conob c'al bay Jerusalén tol chi toj eb anima bay xolak te' yiontek eb is k'ablak te olivo, te arrayán, an palma, ma junokxa tzanc'al tzet teal tol ay is k'ablak watx' chi oc yin chinamail, axca yalon yul tx'an yunal ley.

¹⁶ Cax max toj eb anima sayon is k'ablak te tu', axa yet max jayoc eb xin, max watx'nen aj eb is chinama bay yibanlak patil is yatut, ma bay yamak'il yatut, c'al bay yamak'il is templo Dios, c'al bay lugarlak ti' puertail bay chi el eb ix ix ioj aej, c'al bay puertail Efraín.

¹⁷ Masanil eb anima meltzojnaktek bay Babilonia max watx'nej aj is chinama, cax max octok eb yul. Atax yul is tiempoal Josué is c'ajol Nun, c'amc'al bay max uj axca jun ti', yuj wal tu' xan caw wal max tzaloj aj eb anima.

¹⁸ Cax max yawten cham Esdras tx'an un tu' junjunc'al c'u masantac'al chi tz'aknaj ukeb c'ual jun k'in tu'. Axa yet is waxakeb c'ual xin, max wajban pax ba eb yin yoc eb yin ayilal bay Jehová axca yalon ley tu'.