Nehemías 5 - A Txꞌan Biblia Yin Kꞌanjobal 1989

Cawxinakil ay xol conob

¹ A yet jun tiempoal tu' caw wal max yal ba eb anima, eb winak c'al eb ix ix yuj tzet chi utlay eb yuj eb yet conob.

² Ay eb chi aloni tol xiwil yuninal xan yowalil chi jec eb is trigo yet c'am chi cam eb yuj wajil.

³ Ay pax mac chi aloni tol chi yacantok yunal is tx'otx', ma yawoj uva, ma yatut, yin prendail yuj manon tzet chi lo' yuj wajil.

⁴ Ay c'apax mac chi aloni tol yuj yak'on tojlabal bay cham rey chi k'an tumin majanej cax chi yaoncantok is tx'otx' ma yawoj yuj majanbilal ch'en.

⁵ Max yalon pax eb: Axca ayon ti' yetok eb jet conob ti', junnej jinatil on, c'am mac tx'ok yili yuninal, lajanc'al yili juninal yetok yuninal eb, xan tzet wal yuj a eb juninal ayoc eb yalan is chekbanil eb, ayon ayxa co cutz'in ayoc is chekbejok eb, chi ak'on co jec tzetak yetal tu'. C'amxa tzet watx' chi jut co ba yujtol yet-xa eb co tx'otx' c'al jawoj, ẍi eb.

⁶ A yet max waben yalon eb anima tzetbil yayji tu', caw wal max tit wowal.

⁷ Max lajwi tu' max cam in naon wali, cax max in tenchanen eb mimek winak yayji, c'al eb yajawil conob yuj k'anon el eb miman yuca' is tumin bay yet conob. Yuj tu' xan max wawtej masanil eb anima yin jun k'umbalba yuj jun k'anej tu'.

⁸ Cax max walon bay eb: Ayon co xol ti' tol max jak' jip co colon el jet conob txonbilcantok bay juntzan tx'ok nacional, ¿tom okto e txonc'altok eb jet conob, ayonxa ok co man pax bekchaj el junelxa? quin chi bay eb. Cax tz'inxac'al ẍi eb masanil. C'amxa chi nachaj el yuj eb tzet chi yut paktzen eb.

⁹ Cax max walon paxok: Caw wal man watx'ok jun tzet che yun ti'. Is moj wal tol che tx'ox tol miman yelapnok Dios yul e sat, yet c'amxa chi buchwaj eb anima ajc'ul oc jin.

¹⁰ Yetok c'apax eb ayto wuj in ba yetok, c'al eb chi mulnaj wetok, max jak' majanej eb tumin, c'al trigo max jak' c'apax q'uex eb, palta ok jak' tan juntzan is jec eb tu' yiban.

¹¹ Yuj tu' xan chi wal ayex tol che yak' meltzoj is tx'otx' eb wal tinani', is yawoj eb, is yolivo eb, c'al is yatut eb, cax che yak'on tan is jec eb ayex tu' yiban, cax che yak'on meltzoj is yuca' tumin, ma trigo, ma vino, ma aceite, juntzan toxa max e k'an bay eb, quin chi bay eb.

¹² Max tak'wi eb masanil: Ok jak' pax masanil bay eb. C'amxac'al tzet ok jal yuj juntzan tu'. A masanil tzet chal tu' ok jikej, ẍi eb. Caytu' max yun wawten c'apax eb sacerdote; satak wal eb, cax max wak' yak' eb is ti' yuj tzet max yal eb tu'.

¹³ Yetok c'apaxok max in tzicobtanej in pichil, max waloni: Axca wal tu' ok yun tzicon eltek Dios bay e yatut c'al bay e satak, tatol man ok e yikej bay che yak' e ti' ti'. Axca c'apax tu' ok yun yion ec' Cham tzet yetal ay ayex tinani', quin chi bay eb. Masanil eb max tak'wi: Yunokab axca tu', ok jikej, ẍi eb. Cax max yalon eb watx' k'anej bay Jehová. Max yiken eb tzet max yal tu'.

Is watx'c'ulal Nehemías

¹⁴ A yet junc'alxa abil yoc Artajerjes yin reyal bay Persia cax max quin yaon oc yin gobernadoral bay yul yet Judá, masantac'al max tz'aknaj 32 abilxa yoc Artajerjes tu' yin reyal. A yet lajcaweb abil ayin oc yin gobernadoral tu', tamwal eb ayto wuj in ba yetok, tamwal ayin c'apaxok max co cha colwal tol jettac'a yayji ocok.

¹⁵ Akxa eb gobernador max ec' yet yalantok, yet c'amto chin oqui, caw wal axca ikatz yayji eb bay eb conob. Junjunc'al c'u chi k'anon el eb 40 siclo ch'en plata yuj tzet chi lo', c'al yuj is vino. Yetok c'apaxok chi etnelay eb conob yuj eb chekbej eb, palta ayin xin, maj wun axca tu' yujtol caw wal miman yelapnok Dios yul in sat.

¹⁶ Yetok c'apax junxa, max wikej in watx'nen c'apax junok makan wet yin is murallail conob, yetok eb in chekbej, max mulnajc'al eb wetok. C'am junok tx'otx' max ji'.

¹⁷ Ay 150 eb winak chi low wetok, a ton eb wet conob, c'al eb ayoc yin yajawilal, axa pax eb toc'al chon ul ilonok, chi tit bay juntzan nacionlak oyan oc jinlak ti', c'am oc eb tz'akilok.

¹⁸ A tzet yetal tol wet yayji chi watx'ji junjun c'u: jun no buey chi cami, wakc'on no icham calnel chi cami, tx'ok pax yayji no caẍlan. Cax yinc'al laj lajoneb c'ual chi ilaytek xiwil vino, palta c'am bay max in k'an tzet max in lo' yin wopiso ti' tol in moj in chaoni, yujtol miman yayji oc is cawxinakil jun conob ti'.

¹⁹ Xan max in txajli: Na in c'altek Mamin, yuj in watx'ilok, yuj masanil tzet max wun yin jun conob ti', quin chi.