Nehemías 4 - A Txꞌan Biblia Yin Kꞌanjobal 1989

Is buchwal eb ajc'ul

¹ A yet max yaben Sanbalat tol mayal co chaoc co ca watx'nen aj muralla, caw wal max tit yowal c'ul, cax max chaon oc buchwaj yetok yowal c'ul jin.

² Max oc ijan yalon buchwal k'anej jin satak eb ajun yetok, c'al eb soldado aj Samaria. Max yal axca ti': Mimekxac'al chi yut ba juntzan israel ak'om wajil ti'. ¿Ok mi ca watx'nej aj eb jun muralla ti' yaloni? ¿Chi mi na eb tol yuj xajanbal eb tu' junnej c'u ok yun watx'jok jun mulnajil tu'? ¿Chi mi laj na eb tol a xol juntzan icham tz'ayil ch'en bulan ay ti', ok yieltek eb ac' ch'en yaloni? ẍi eb.

³ Ay c'apax oc Tobías amonita xol eb. A' chi aloni: A juntzan ch'en chi watx'nej aj eb yin muralla tu', elawtakxac'al chi yut eb. Ta chi ajtok junok no wax bay yiban tu' chi tzakay no' tenon ay bulnajok, ẍi.

Txaj cham Nehemías

⁴ Axca ti' max yun in txajli: Mamin, ach co Diosal, abtonab tzet wal chi yun buchwaj eb jinon. Tokabcan is yobc'ulal eb tu' yiban, axa eb yajc'ul eb, yiokabtok eb masanil is tzet yetal eb cax chi tojcan eb mosejal bay junokxa nación.

⁵ C'amokab chak' mimanc'ulal yin is mul eb ti', cax c'amokab chi toj c'ayc'ulal oj tzet max yun eb, yujtol caw wal yob tzet max yal eb jin, mac on chi co watx'nej aj muralla ti', quin chi.

Max ec'xac'al eb ajc'ul yiban

⁶ Max on occ'al ijan co mulnaj yin muralla, ayman max nanji juj yujtol caw wal ay is tzalojc'ulal eb conob mulnaji.

⁷ Axa pax Sanbalat, yetok Tobías, eb árabe, eb amonita, c'al yetok eb aj Asdod max yaben eb tol ayc'al oc mulnajil juj yuj co ca watx'nen aj muralla, c'al mayal makay bay mimek max yun jakchaji, yuj tu' caw wal max tit yowal eb.

⁸ Masanil eb max k'umelej el ba tol chi oc eb jin, cax chi yuchon ay eb Jerusalén junelxa yaloni.

⁹ Caytu' max yun jak'on co txaj bay co Diosal, cax max jaon oc co taynemal junjun c'u c'al junjun ak'bal yuj eb ajc'ul tu'.

¹⁰ Max yalon c'apax eb chi mulnaji: Mayal c'unbi aj eb nak ikom ch'en, xiwilxa pojilal jun icham muralla ti', maj techaj juj co watx'nen ajok, ẍi eb.

¹¹ A mi naon eb ajc'ul oc jin tu', tol c'am chi nachaj el juj, ma c'am chi jila', cax ok oc eb co xol yet chon is mak'cam eb cax chi oc waan mulnajil ti', yalon eb.

¹² A eb jet conob cajan bay cawilal eb tu', chi ulc'al yal eb tol a juntzan anima tu' t'inan ok oc eb jin yaloni, tzanc'al bay chon mulnaji.

¹³ Yuj wal tu' xan max wala' tol yin junjun makan yicanc'al ba, chi taynej bay yul muralla bay jobelak tx'otx' c'al bay jakanto, cax chi yion eb is yespada, is lanza, c'al is julbal.

¹⁴ A yet max wiloni tol chi xiw eb, cax max in tec'ban in ba walon bay eb yicham winakil conob c'al eb ayoc yin yajawilal xol conob tu', c'al bay masanil anima: C'am chex xiw bay eb tu', naektek tol caw wal ay is may yayji oc co Diosal, xan co colek eb jetbi, c'al juninal, c'al eb jet conob, c'al jatut, quin chi bay eb.

¹⁵ Max yaben eb ajc'ul oc jin tu' tol makbil eb juj, cax max nachaj el yuj eb tol maxax yuchtok Dios masanil tzet max wajan alnej eb tu', caytu' max yun joc pax co mulnaj junjun on yin muralla.

¹⁶ Atax yet jun c'ual tu', nannej eb in mulnajwom chi mulnaji, axa nanxa eb xin, watx' yayji eb yetok is mitx'k'ab yet owal, a ton is lanza, c'al is makbal julbalej, c'al is julbal yetok c'apax ch'en coraza. Axa eb yajawil conob ayoc eb yetok eb mulnajwom yin yiptzen eb,

¹⁷ a ton eb anima ayoc yin watx'nej muralla. Eb iktzom max oc pax ijan eb yin ikoj tzetak yetal, cax jun junej is k'ab eb chi mulnaji, axa junxa xin, inej oc ch'en mitx'k'abej yet owal.

¹⁸ Axa eb chi mulnaj yin watx'nen aj muralla tu' ayoc is yespada eb yin is nan. A bay in c'atan, a tu' ay pax ec' nak chi xuon no cacho.

¹⁹ Max wal bay eb yajawil conob, c'al bay eb ikbajwom, c'al bay masanil eb anima: Caw wal miman mulnajil, yel xiwil yayji ocok, axa ayon ti', max on pojaxtok yinlak muralla, cax tx'ok tx'okxac'al bay ayon cantok junjun on.

²⁰ Yuj tu xin, a yet che yaben xulay no cacho, cax chex tit co c'atan, axa co Diosal ok ak'on owal juj, quin chi.

²¹ Xan a nanok on chon mulnaji, chon oc yet chi sakbi masantac'al yet chi k'ekbi, axa nanxa xin, ibil oc is mitx'k'ab yet owal.

²² Axa yet jun tiempoal tu', max walon bay eb wet conob tu' tol chi can eb way yetok is chekbej bay yul conob Jerusalén ti' yet chi taynej eb conob ti' jetok yet ak'balil; axa yet c'ualil xin, chon mulnaji.

²³ Ac'ala' c'apax ayin ti' yetok eb ayto wuj in ba yetok, c'al eb in chekbej, c'al eb chin tayneni, majc'al jiel co pichil yet ak'balil, ibilc'al aj co lanza juj.