Nehemías 3 - A Txꞌan Biblia Yin Kꞌanjobal 1989

Max pojlay ec' mulnajil

¹ A cham sat sacerdote Eliasib c'al eb yet sacerdoteal ajun yetok, a eb tu' max ca watx'nen aj bay ok oc puertail yet no calnel. Max yaon oc eb yul k'ab Dios*fn* axa yaon oc eb puertail. Max ca watx'nen aj eb muralla, max tojtac'al bay torre chi yik Hamea masantac'al bay torre chi yik Hananeel. Lajwi tu' max yaoncan oc eb yul k'ab Dios.

² Axa junxa makan muralla chi beyc'al toji max ca watx'nej aj eb winak aj Jericó. Junxa makan max ca watx'nen eb yet Zacur, a ton is c'ajol Imri.

³ Axa eb yinatil Senaa max ca watx'nen aj bay ok oc puertail yet no txay. Max yaoc eb jolom puerta max yaon oc eb is puertail c'al yetok ch'en hierro ayoc is mitx'banilok.

⁴ Axa junxa makan muralla chi beyc'altoji, a Meremot, c'ajol Urías yitxiquin Cos max ca watx'neni. Axa junxa makan, a Mesulam c'ajol Berequías, yitxiquin Mesezabeel max ca watx'neni. Junxa makan, a Sadoc c'ajol Baana max ca watx'neni.

⁵ Axa junxa makan max ca watx'nej eb aj Tecoa, palta a eb mimek winak yayji xol eb, maj yal c'ul eb max colwaj yetok eb chi ikban mulnajil tu'.

⁶ A Joiada c'ajol Paseah, c'al Mesulam c'ajol Besodías, a eb max ca watx'nen aj bay ok oc puerta chi yik Jesana. Max yaon oc eb is jolom puerta, c'al yetok is puertail, c'al yetok ch'en hierro ayoc is mitx'banilok.

⁷ Junxa makan muralla chi beyc'altoji max ca watx'nej aj Melatías aj Gabaón c'al yetok Jadón aj Meronot, yetokc'al eb anima aj Gabaón c'al yetok eb aj Mizpa. Ayoc eb yalan yikbej cham gobernador bay yetc'ulal yayubc'ual a' Éufrates.

⁸ Axa junxa makan max ca watx'nej aj Uziel, c'ajol Harhaía, jun watx'nem ch'en watx' yili. Axa junxa makan max ca watx'nej Ananías jun watx'nem perfume. A eb cawan tu' max ca watx'nen aj muralla Jerusalén masantac'al bay muralla caw wal miman sat.

⁹ Junxa makan max ca watx'nej aj Refaías, c'ajol Hur; a ton jun tu' ayoc alcalil yin nanok lugar ay yul makbej conob Jerusalén.

¹⁰ Junxa makan max ca watx'nej aj Jedaías, c'ajol Harumaf, yujtol a satak is na ay, axa junxa makan max ca watx'nej aj Hatús c'ajol Hasabnías.

¹¹ A Malquías c'ajol Harim, c'al Hasub, c'ajol Pahat-moab, a eb tu' max ca watx'nen aj junxa makan yetok jun torre chi yik Hornos.

¹² Axa junxa makan max ca watx'nej aj Salum, c'ajol Halohes. A jun tu' alcal yayji oc bay nanxa lugar ayoc yul makbej conob Jerusalén. Max colwaj c'apax eb is cutz'in yetok.

¹³ A Hanún yetok eb cajyom bay Zanoa max ca watx'nen aj bay ok oc puerta bay jobe. Max yaon oc eb puertail, axa yaon oc eb ch'en hierro is mitx'banilok. Max ca watx'nen c'apax aj eb 450 metro muralla, masantac'al bay puertail bay chi bet can k'alem.

¹⁴ Axa Malquías c'ajol Recab, yajaw yayji bay yul makbej conob Bet-haquerem, a jun tu' max ca watx'nen aj bay ok oc puertail bay chi bet can k'alem max yaon oc is puertail tu' yetokc'al ch'en hierro ayoc yin is mitx'banilok.

¹⁵ A Salum c'ajol Colhoze, yajaw yayji bay yul makbej conob Mizpa, a jun tu' max ca watx'nen aj bay ok oc puerta bay nuk' aej. Max yaoc is patil max yaon oc is puertail tu' c'al ch'en hierro max yaoc yin is mitx'banilok. Max ca watx'nen c'apax aj muralla bay a' najab Siloé bay cawilal yawben te' eb rey, masantac'al bay chi aytok k'och beal conob David.

¹⁶ A Nehemías c'ajol Azbuc, gobernador yayji yin nanok yul makbej conob Bet-sur, a max ca watx'nen aj junxa makan muralla max tojtac'al bay satak is mukbanil David masantac'al max apni bay wajan a' aej, max apni oc bay ay is cuartel eb soldado.

¹⁷ Axa eb levita ikbabil yuj Rehum, c'ajol Bani max ca watx'nen aj junxa makan muralla chi beyc'altoji. Axa bay sataktok, a Hasabías yajaw yayji bay nanok yul makbej conob Keila. A jun tu' max ca watx'nen aj junokxa makan q'uexelok eb yet conob.

¹⁸ Axa junxa makan chi bey toji max ca watx'nej aj eb yetbi ba yetok eb tu'. A Bavai c'ajol Henadad, a' max ikban eb. A jun tu', yajaw yayji bay nanxa yul makbej conob Keila tu'.

¹⁹ Axa Ezer c'ajol Josué, yajaw yayji bay Mizpa, a jun tu' max ca watx'nen aj janic'xa bay satak bay wajan arma, masantac'al bay esquina.

²⁰ Max beyc'altok, axa Baruc, c'ajol Zabai, yin masanil c'ul max ca watx'nen aj junxa makan muralla max toj bay esquina masantac'al max apni oc bay puertail yatut Eliasib, a ton cham sat sacerdote.

²¹ C'al Meremot c'ajol Urías, yitxiquin Cos, a max ca watx'nen aj junxa makan max beyc'altok, max toj bay puertail yatut cham Eliasib masantac'al bay chi apni oc yatut cham.

²² Axa junxa makan muralla max beyc'altok, max ca watx'nej aj eb sacerdote cajan bay jobeal yet a' Jordán.

²³ Max beyc'altok satak yet eb tu', axa Benjamín c'al Hasub, a eb max ca watx'nen muralla bay satak is na. Max lajwi yet eb tu', axa Azarías c'ajol Maasías, yitxiquin Ananías, a max ca watx'nen c'apax aj bay satak yatut.

²⁴ Axa junxa makan max ca watx'nej aj Binuy, c'ajol Henadad, max toj bay yatut Azarías masantac'al max apni oc bay esquina.

²⁵ Chi beyc'altok, axa Palal c'ajol Usai, max ca watx'nen aj bay esquina masantac'al cawilal jun torre can ayajok bay is despacho cham rey, a ton bay yiban yamak'il yatut eb soldado chi taynen bay tu'. Axa junxa makan max ca watx'nej aj Pedaías, c'ajol Faros,

²⁶ masantac'al bay satak puertail bay chi eltok eb ix ix ioj aej, chi tojcan bay yetc'ulal yichcan, cawilal jun torre yelxac'al can ayajok. A eb chi ak'wic'alta' serbil bay templo, eb cajan bay Ofel, max ca watx'nen aj junok makan.

²⁷ Axa eb aj Tecoa max ca watx'nen junxa makan muralla, max tojtac'al bay satak jun torre can ayaj tu' masantac'al bay muralla bay Ofel.

²⁸ Axa eb sacerdote xin, max ca watx'nej aj eb muralla bay satak is yatut junjun, max tojtac'al bay puertail bay chi oc no chej.

²⁹ Max beyc'altok satak yet eb tu', axa Sadoc c'ajol Imer, a' max ca watx'nen aj muralla bay satak is yatut. Junxa makan max beyc'altok axa Semaías max ca watx'nen ajok, a ton c'ajol Secanías. A jun tu' max taynenc'alta' puerta bay yetc'ulal yichcan.

³⁰ Max ca watx'nen aj Hananías c'ajol Selemías, c'al Hanún, a ton yet is wak unin Salaf, junxa makan yet. Axa yet max lajwi yet eb tu', axa Mesulam c'ajol Berequías max ca watx'nen aj jun makan bay satak is yatut.

³¹ Axa Malquías watx'nem ch'en watx' yili, max ca watx'nen aj muralla masantac'al bay yatut eb chi ak'wi serbil bay templo, c'al bay yet eb txonjom, satak puertail bay ayoc eb taynewom masantac'al bay chi ayji eb chi taynen bay esquina tu'.

³² Axa eb watx'nem plata c'al yetok eb txonjom, max ca watx'nen aj muralla max tojtac'al bay ayic' eb chi taynen bay esquina tu', masantac'al max apni oc bay ay puertail yet no calnel.