Nehemías 12 - A Txꞌan Biblia Yin Kꞌanjobal 1989

Listail eb sacerdote yetok eb levita

¹ A ton juntzan eb sacerdote yetok eb levita max meltzoj yetok Zorobabel, c'ajol Salatiel, c'al yetok Josué: A eb sacerdote, a ton eb ti': Seraías, Jeremías, Esdras,

² Amarías, Maluc, Hatús,

³ Secanías, Rehum, Meremot,

⁴ Ido, Gineto, Abías,

⁵ Mijamín, Maadías, Bilga,

⁶ Semaías, Joiarib, Jedaías,

⁷ Salú, Amoc, Hilcías c'al Jedaías, a ton juntzan eb ti' yajaw yayji xol eb yet sacerdoteal eb yul is tiempoal Josué.

⁸ Axa pax eb levita, a ton eb ti': Josué, Binuy, Cadmiel, Serebías, Judá, c'al Matanías, a ton eb tu' yetok juntzanxa eb ajun yetok eb, a eb ayoc yin bitnen watx' k'anej bay Dios.

⁹ Axa Bacbuquías yetokc'al Uni, yican ba eb yetok eb, chi oc waan eb satak eb yet chi bitni eb.

¹⁰ A listail eb yinatil Josué yin txolilal, a ton Joiacim, Eliasib,

¹¹ Joiada, Johanán, c'al Jadúa.

^12-21 A ton is listail eb sacerdote yajaw yayji oc yin junjun makan eb yet sacerdoteal eb yul is tiempoal cham sat sacerdote Joiacim: Meraías Seraías Hananías Jeremías Mesulam Esdras Johanán Amarías Jonatán Melicú José Sebanías Adna Harim Helcai Meraiot Zacarías Ido Mesulam Ginetón Zicri Abías …, Miniamín Piltai Moadías Samúa Bilga Jonatán Semaías Matenai Joiarib Uzi Jedaías Calai Salai Eber Amoc Hasabías Hilcías Natanael Jedaías

Yajaw Makan

²² Max tz'ibelay is listail eb levita yajaw yayji yin junjun makan inatilej, c'al eb sacerdote yul is tiempoal Eliasib, Joiada, Johanán c'al Jadúa, tol sat sacerdote yayji oc eb. A jun lista ti' max lajwi tz'ibelay yul is tiempoal Darío aj Persa.

²³ Axa pax is listail eb yajaw yayji yin junjun makan yinatil eb levita, ayoc eb tu' yul yunal yabixal templo; max tz'ibelayc'al jun lista tu' masantac'al yul is tiempoal Johanán is yitxiquin Eliasib.

²⁴ A eb yajaw yayji xol eb levita chi bitni: a ton Hasabías, Serebías, Jesúa c'ajol Cadmiel. A eb ajun yetok eb, ac-'omba yayji eb yetok eb yet chi bitni eb c'al yalon eb yuj diosal bay Jehová yet ayoc eb yin yopiso, axca max yun yalon cham rey David chekbej Dios.

²⁵ Axa eb taynemal juntzan cuarto yet c'uanbal cawilal puertail templo, a ton Matanías, Bacbuquías, Obadías, Mesulam, Talmón, c'al Acub.

²⁶ A eb mayal binaj ti' ayic' eb yul is tiempoal Joiacim, c'ajol Josué, yitxiquin Josadac. A ton yul is tiempoal cham gobernador Nehemías, c'al cham sacerdote c'al meẍtol Esdras.

Max alaycan oc muralla yul k'ab Dios

²⁷ A yet max apni oc c'ual yalaycan oc murallail Jerusalén yul k'ab Dios, max awtelaytek eb levita tzanc'al baytal cajan eb, max jayoc eb bay Jerusalén yuj chalay k'inal muralla, yet chi tzaloj eb yin yalon eb watx' k'anej, c'al bitni eb yetok platillo, arpa, c'al lira.

²⁸ Xan a eb levita chi bitni tu', max tit eb bay cawilal Jerusalén c'al bay yaldeail yet Netofa,

²⁹ c'al bay Bet-gilgal, c'al bay yulak is makbej Geba c'al bay Azmavet, yujtol a eb chi bitni tu' max watx'nej ay ba eb yin aldeail bay yinlak Jerusalén.

³⁰ Caytu' max yun watx'nen ba eb sacerdote c'al eb levita atac'ala' ley. Lajwi tu' max watx'nen c'apax ba eb conob, caytu' max yun watx'nen c'apax eb puertail conob c'al is muralla atac'ala' ley.

³¹ Max lajwi tu' max in chekon ajtok eb yajaw yet Judá bay yiban muralla, cax max waon oc cab mimek coro yin txolilal yuj aloj yuj diosalil. A jun babel coro max toj yiban muralla bay yetc'ulal co watx', bay yetc'ulal puerta bay chi bet cancan k'alem.

³² Axa yintak coro tu', a tu' tzakan Osaías yetok nanxa eb yajaw bay Judá,

³³ yetok Azarías, Esdras, Mesulam,

³⁴ Judá, Benjamín, Semaías, c'al Jeremías.

³⁵ Ajun c'apax eb sacerdote yetok trompeta: a ton Zacarías c'ajol Jonatán; axa eb is yichmam, a ton Semaías, Matanías, Micaías, Zacur, c'al Asaf.

³⁶ Ajun c'apax juntzan icanejal chi aon oc música yetok eb, a ton Semaías, Azarael, Milalai, Gilalai, Maai, Natanael, Judá c'al Hanani. A ton eb tu' chi aon oc juntzan mitx'k'abej yet música axca yet cham rey David, cham chekbej Dios. A satak eb tu' babel toj cham meẍtol Esdras.

³⁷ Max ec' eb yiban puertail bay nuk' aej, cax max beyc'altoj eb satak bay yiban muralla. Max ajtok eb bay jun k'ochbe yetc'ulal conob David, c'al bay cawilal yiban is despachoben cham, masantac'al bay puertail bay chi eltok eb ix ix ioj aej ay bay yetc'ulal bay chi ajol c'u.

³⁸ Axa junxa yet is cab coro, a tu' max tojcan bay yetc'ulal co q'uexan. Tzakan in yintak junxa coro tu' bay yiban muralla yetok nanxa eb anima, cax chon tojtac'al bay torre chi yik Hornos, max con ec'tok bay muralla caw wal miman sat

³⁹ bay puerta chi yik Efraín, bay puerta chi yik Jesana, bay puerta yet no txay, bay torre chi yik Hananeel, c'al bay torre chi yik Hamea, masantac'al bay puerta yet no calnel. Max on oc waan bay puerta yet eb chi taynen bay tu'.

⁴⁰ Lajwi tu xin, max apni oc cab coro tu' bay templo Dios. Max in apni c'apax oc yetok nanxa eb yajaw ajun wetok.

⁴¹ A eb sacerdote chi xuon trompeta: a ton Eliacim, Maaseías, Miniamín, Micaías, Elioenai, Zacarías, Hananías,

⁴² Maasías, Semaías, Eleazar, Uzi. Johanán, Malquías, Elam, c'al Ezer. Axa jun coro tu' caw wal can max yun bitni eb, max ikbelay eb yuj Izraías.

⁴³ A wal yet jun c'ual tu' caw wal xiwilxa xajanbal max ak'layi. Axa eb anima max tzalojbi wal aj eb yujtol a Dios max ak'on jun miman tzalojc'ulal bay eb. Eb ix ix c'al eb unin, caw wal max ayji c'apax ec' eb yin tzalojc'ulal. A jun tzalojc'ulal max uj bay Jerusalén tu' caw wal max ablaytac'al najat.

Lobej eb sacerdote c'al eb levita

⁴⁴ A yet jun tiempoal tu' ay juntzan eb max alay oc yin yilomalok c'uanbal bay chi wajay ofrenda, babel sat awoj, c'al yetok diezmo, atac'ala' jantak chi tit bay junjun lugar yul yet junjun conob. A juntzan tu' yet eb sacerdote c'al eb levita, yujtol a eb aj Judá caw wal chi tzaloj eb yetok eb sacerdote c'al yetok eb levita tu',

⁴⁵ yujtol a eb tu' max yikej eb yunen atac'ala' yalon ley, c'al yiken eb juntzanxa ley max yal Dios. Axa eb chi aon oc música c'al eb taynem templo, a eb tu' max yikej eb yilon yopiso axca max yun yaloncan cham rey David c'al Salomón is c'ajol.

⁴⁶ Axca yet payxa tu' yul is tiempoal cham David c'al Asaf, ay c'apax yajawilal eb chi bitni tu', a ton eb chi bitnen watx' k'anej c'al aloj yuj diosal bay Dios.

⁴⁷ A yul is tiempoal Zorobabel c'al Nehemías, junjunc'al c'u chi yak'on eb conob lobej eb chi bitni c'al eb chi taynen templo. Chi ak'lay c'apax loj bay juntzanxa eb levita axcac'al yet eb t'inan chaoni. Axa eb levita tu' chi ak'on bay eb sacerdote, yinatil Aarón jantak yet eb t'inan chaoni.