Mt 9 - A Txꞌan Biblia Yin Kꞌanjobal 1989

Max jaycan c'ul nak anima sicbinak el is mimanil

¹ Axa yoc Jesús yul junok barco, cax max k'axpoj ec' yiban a'. Max ec'apnok bay junxa k'axep bay ay is conob.

² Ay jun winak sicbinak el is mimanil, batxbil sat is wayub. Max ilay jay bay Jesús. Max yilon oc Jesús xin, tol chi yaoc eb inen oc nak tu' yin c'ul tol ok jaycan c'ul nak yuj Cham, xan max yal Cham bay nak sicbinak el tu' axca ti': —Ach wet animail, ak' tzalojbok a c'ul. Max ak'lay mimanc'ulal yin a yobtakil, ẍi bay nak.

³ Axa jaywan eb meẍtol yin ley Moisés ayic' bay tu xin, max na eb yul c'ul yin Jesús axca ti': A jun winak ti', buchwal k'anej chi yun yin Dios yuj tzet chi yal tu', ẍi eb.

⁴ Palta Jesús xin, max yojtaknej el tzet chi naoc eb yin, xan max yal bay eb axca ti': —¿Tzet xan yob tzet chi ec' yul e c'ul win?

⁵ ¿Baytet junok suboj yelapnok jalon xol cab k'anej ti': A mi jun, Chi wak' mimanc'ulal yin a yobtakil, ma jun Ajan wanok, cax beyan, ta con chi?

⁶ A tinani' xin, ok in tx'ox e yila', tol a' ayin Chekbilintek yuj Dios xol eb jet animail ti', chic'al je' wuj wak'on tancan el mulej bay yulyibank'inal ti', ẍi bay eb. Lajwi tu xin, axa yalon bay nak sicbinak el is mimanil tu' axca ti': —Ajan wanok, iaj a wayub, paxan bay atut, ẍi bay nak.

⁷ Axa yaj wan nak tu', max toj bay yatut.

⁸ A yet max yilon eb bulan ec' tu' tzet max uj xin, max c'ayaj c'ul eb, cax max yalon eb watx' k'anej bay Dios, yujtol miman yikbej max yak' bay eb anima.

Yawtebal Mateo yuj Jesús

⁹ Max el Jesús bay jun lugar tu', cax max yilontok yin jun winak chi yik Mateo. A jun winak tu', chotan ay tekon el tojlabal bay eb anima, cax max yalon Jesús bay axca ti': —Tzaklojan cuywok wintak, ẍi Cham bay. Cax max tojxac'al yetok Cham yet jun bek tu'.

¹⁰ Axa yay chotan Jesús low yetok eb is cuywom yul yatut Mateo tu'. Cax xiwil eb tekom el tojlabal, c'al eb yob is beybal max ulic' low yetok eb yin meẍa.

¹¹ Maxc'al yil eb fariseo jun tu', max k'anlen eb bay eb is cuywom Jesús axca ti': —¿Tzet yuj xan chi low e meẍtol tu' yetok eb tekom el tojlabal, c'al yetok eb yob is beybal? ẍi eb.

¹² Maxc'al yab Cham axca tu xin, cax max tak'witok bay eb axca ti': —K'inalok ta ayic' junok antem anima tinani', tok ay yopiso yuj eb watx' c'ul. Asan eb ya'ay, a eb tu' ay yopiso yuj.

¹³ Asek xin, ojtaknejek el tzet chi yal elapnok jun k'anej yul tx'an Un Tz'ibbilcanok, bay chi yal axca ti': Chi wochej tol chi ok' e c'ul yin e yet animail, yintak pax e yak'on tz'a xajanbal ayin, ẍi. Man yujok ul wawten eb watx' is beybal naoni, xan max in jayi, palta yuj ul wawten eb chi yojtaknej el ba tol yobtakwom, ẍi bay eb.

C'am chi chalej ba icham beybalej yetok is cuybej Jesús

¹⁴ Max jayoc eb is cuywom Juan cham ak'om bautismo, bay Jesús, cax max k'anlen eb bay Cham axca ti': —¿Tzet yuj xan c'am chi yak' eb a cuywom c'ajbanc'ulal? A pax ayon ti', chi jak'on c'ajbanc'ulal. Cay c'apax tu' eb fariseo chi yak' eb c'ajbanc'ulal, ẍi eb bay.

¹⁵ Axa tak'wi Jesús bay eb axca ti': —K'inalok ta ay junok nupayil chi oc tinani', ¿xin ta wal chi je' tol man ok low eb awtebil bay jun nupayil tu', ta ayto pax ec' nak anima lanan nupay tu'? Ok ajapnok tiempoal yel nak chi nupay tu' xol eb, catatu bian, ok oc eb yin c'ajbanc'ulal, ẍi Cham.

¹⁶ K'inalok c'apax junok icham pichilej chi olchaj tinani', tok ay mactxel chi aon oc an ac' nip manto labilok yul a' nipilok an. Yujtol a an ac' nip tu' chi utz' an, cax chi mimanbi nic'chajnakil an icham tu'.

¹⁷ Yetok c'apaxok, tok ay mactxel chi aon ay vino tolto chi watx'ji, yulak icham tz'um netal vino.*fn* Yujtol a yet chi sipc'oj ajok, chi nic'chaj no tz'um tu' yuj. Nabac'al chi etax el vino c'al no tz'um tu', xan a yul no ac' tz'um chi ay vino ato watx'ji tu', yet watx' c'amc'al junok tzet chi etax elok, ẍi Jesús bay eb.

Is cutz'in Jairo c'al ix ix max mitx'on ti' pichil Jesús

¹⁸ Lananto wal yalon Jesús juntzan ti' bay eb, cax max jayoc jun yajawil eb israel bay Cham. Max bekon ay jajnaj ba satak Cham cax max yaloni: —Ato wal camil ix in cutz'in ti'. Ton wetok, cax chi toj a batxban oc a k'ab yiban ix, yet watx' chi ictzoj aj ix, ẍi bay Cham.

¹⁹ Axa toj Jesús yetok xin, max toj c'apax eb cuywom yetok eb.

²⁰ Axa xol eb anima max tzakloj yintak Cham, ayoc jun ix ix caw ya'ay. Lajcawebxa abil c'al c'oli yay a' aej yin, xan max yak' ix yip jitzontok ba yintak Cham, cax max oc mitx'naj ix janic' yin ti' pichil Cham.

²¹ Yujtol max na' ix axca ti': Tix wal ok jaycan in c'ul, asan tanej wal chin mitx' ti' pichil Cham, ẍi ix.

²² Axa meltzojtok acan Jesús yintak, max oc t'anan yin ix. Max yalon Cham bay ix axca ti': —Ach ix, tzalojanxa tinani'. Ti max jaycan a c'ul wuj, yuj max quin aoc yin a c'ul, ẍi bay ix. Yet-xac'al jun bek tu', max jaycan c'ul ix yin junelnej.

²³ Axa yet max apni oc Jesús bay yatut cham yajaw tu xin, max yiloni tol lanan xulay juntzan axca yili chirima, cax xiwil chi wekeki anima yok'i.

²⁴ Xan max yal Cham bay eb anima axca ti': —Elanektok yina. A ix unin ti', man camnakok ix, toc'al chi way ix, ẍi Cham bay eb. Toc'al max tzeyelay Cham yuj eb.

²⁵ Max lajwi yuktelay eltok eb yina yuj Cham xin, cax max octok Cham bay ayic' ix unin tu'. Axa yoc mitx'an Cham yin is k'ab ix, cax max aj wan ix.

²⁶ Masanil anima bay jun lugar tu' max aben k'umal jun tzet max uj tu'.

Chi ilwican aj cawan winak c'amc'alta' chi ilwi

²⁷ Max el Jesús bay tu xin. Lananxa toj yul be, cax max tzakloj cawan anima c'am chi je' yilwi yintak Cham. Max awjitok eb bay Cham yin ipejal axca ti': —Ach Yinatil David, ¿c'am mi chi ok' a c'ul jin on? ẍi eb.

²⁸ Axa yet max apni Cham bay na xin, max jitzonxac'altek ba eb bay Cham. Axa k'anlen Cham bay eb tu': —¿Chi mi e yaoc yin e c'ul tol chi je' wuj tzet che k'an ayin tu'? ẍi Cham. —A ton Mamin, chi jaoc yin co c'ul tol chi je' oj, ẍi eb.

²⁹ Axa matxban oc Cham k'ab yin bak' sat eb tu', cax max yalon bay eb: —Yunokab ayex atac'ala' e yaon oc yin e c'ul tu', ẍi bay eb.

³⁰ Cax max jakchajcan sat eb. Yujtol chixa je' yilwi eb xin, xan max cam yalon bay eb axca ti': —Xe yilc'al xin, ayta bay che yalilok. Ayta wal mactxel ok aben aj jun ti', ẍi Jesús bay eb.

³¹ Palta atoc'al wal ch'an yeltok eb, cax max c'oli yalon el eb bay masanil jun lugar tu' yuj tzet max yun Cham.

Chi k'anjabcan jun anima c'amc'alta' chi je' k'anjabi

³² Atoc'al wal ch'an yeltek eb xin, cax max ilay jay jun winak bay Jesús. A jun winak tu', c'am chi je' k'anjabi, yujtol ayoc espíritu yob yin.

³³ Maxc'al uktelay el jun espíritu yob tu' yin nak yuj Jesús xin, cax max k'anjab aj nak. Axa masanil eb anima max ilon jun ti', caw wal max c'ayaj c'ul eb sic'libil, xan max yal eb axca ti': —C'amto bay chi jil junok tzet yetal axca jun ti' co xol ayon Israel on ti', ẍixac'al eb.

³⁴ A pax eb fariseo xin, max yal eb axca ti': —A jun winak ti' chi ta' je' yion el espíritu yob yin anima, yujtol ac'al oc yajawil eb espíritu yob tu' ayoc yetok, ẍi eb.

Chi ok' c'ul Jesús yin eb anima

³⁵ Max ec' Jesús yulak masanil conob, c'al yulak masanil aldea, cax chi cuywajcan yulak nail wajayil eb israel yin culto. Chi yalon el watx' abix yuj tzet wal chi yun yoc anima yul k'ab Dios. Chi yak' c'apax jaycan c'ul eb anima yin tzanc'al tzet ilya'il chi oni.

³⁶ A yet max yilon oc Jesús eb anima, max cus oc c'ul yin eb, yujtol lajan yayji eb axca junok bulan calnel c'am yilomal. Ayoc eb yin somc'ulal, c'al yin yatakilal max yila'.

³⁷ Xan max yal bay eb is cuywom axca ti': —A eb anima ti', tiempoal wal yal-lay k'anej Dios bay eb tinani', axca ixim trigo tiempoalxa pol-layi. Wal yel, xiwil eb c'amtoc'al chi yabej, palta jaywannej pax mac lanan mulnaj xol eb.

³⁸ Yuj tu xin, txajlanek wal bay Cham aj mulnajil, yet watx' chi chektek eb is mulnajwom xol eb, ẍi Jesús.