Mt 14 - A Txꞌan Biblia Yin Kꞌanjobal 1989

Camichal Juan, cham ak'om bautismo

¹ Max yabaj Herodes, cham yajawil yul yet Galilea, yabixal Jesús yet jun tiempoal tu',

² xan max yal bay eb is chekbej axca ti': A jun tu', a ton Juan, cham ak'om bautismo mayal ictzoj aj xol eb camnak. Yuj tu' xan ay is yipal yunen juntzan milagro tu', ẍi bay eb.

^3-4 Caytu' max yut yalon axca tu', yujtol camnakxa Juan tu' yuj. Tix yuj ti' xan ak'bil cam yuj. Ay jun yuẍtak Herodes tu' chi yik Felipe. Herodías bi yistzil. Axa Herodes tu' montejnak el yistzil yuẍtak tu', xan max yal Juan bay Herodes tu' axca ti': Caw man mojok che' jun ix ti', ẍi bay. Yuj tu' xan max ak'lay c'ul Herodes tu' yuj ix. Axa yak'on mitx'lay Juan tu' bian, max yaon oc yul preso, cax max oc cadena yin.

⁵ Max yochej Herodes max yak' cam Juan tu', palta chi xiw bay conob, yujtol max yojtaknej el eb anima masanil tol chekbej Dios yayji Juan.

⁶ Axa yet max chaon Herodes k'inal yabilal xin, max wajban oc anima. Axa canalwi ix yune' Herodías tu' satak eb masanil. Caw wal watx' yec' ix max yil Herodes.

⁷ Yuj tu' xan max loctek bi Dios, cax yak'on ti' bay ix axca ti': —Tzanc'al tzet ok a k'an ayin ok wak' ayach, ẍi.

⁸ Palta max ak'lay c'ul ix yuj txutx, xan max yala': —A jolom Juan ak'om bautismo chak' ayin yul junok plato, ẍi ix bay.

⁹ A yet max yaben cham rey tu' axca tu xin, caw wal max cus is c'ul cham. Palta toxa max loctek cham bi Dios, max yab c'apax eb ayic' yetok cham tzet max yala', yuj tu' xan max yala' tol chi ak'lay bay ix.

¹⁰ Axa chekon toj yilay el jolom Juan tu' yul preso.

¹¹ Chi lajwi tu xin, cax chi ilaytek bay ix yul junok plato. Cayton tu' max yut eb xin. Max yak'on eb jolom Juan bay ix, cax max yak'on ix bay is txutx.

¹² Axa yapni oc eb cuywom Juan tu', max yiontok eb is mimanil mukayok. Max lajwi tu xin, max toj eb yalon bay Jesús tzet max on cami.

Max low eb oyeb mil winak yuj Jesús

¹³ A yet max yaben Jesús xin, axa yoc yul jun barco yetok eb is cuywom tu', max toj bay jun tz'inan tx'otx' tx'oklil yaloni. Axa yet max yaben aj eb anima bay conoblak k'umal, max toj eb tilak a' mar bay ok apnok Jesús.

¹⁴ Axa yet max eltek Cham yul barco xin, max yilon jun miman bulan anima ayxa ec' bay tu'. Max ok' c'ul Cham yin eb, cax max jayc'alcan c'ul eb is ya'ay eb ibil oc yuj eb yuj Cham.

¹⁵ Axa yet yayc'ualil, max jayoc eb is cuywom bay, cax max yalon eb bay axca ti': —Ilab lanan toj c'u, tz'inan tx'otx' pax bay ayon ec' ti', xan tekan watx' cha chek pax eb anima ti' bay juntzan aldea cawil-lak ti', yet watx' chi toj man low ba eb, ẍi eb bay.

¹⁶ —¿Tzet xan wal ok tok man low ba eb? Ak'ek low eb ayex ti', ẍi Cham bay eb is cuywom tu'.

¹⁷ —Palta asan wal ch'an oyeb co yaliẍ pan ibil, yetok cac'on co txay, ẍi eb bay.

¹⁸ —Iektek ayin xin, ẍi bay eb.

¹⁹ Max lajwi tu', max yalon bay eb anima bulan ec' tu', tol chi ay chotan eb sat ac'al, cax max yion aj ixim oyeb pan tu', c'al no cac'on txay. Max aj t'anan satcan, cax max yalon yuj diosalil yuj. Axa bijon ay ixim pan tu', cax max yak'on bay eb is cuywom. Axa eb max pojontok xol anima.

²⁰ Max low eb masanil xin, cax max nojcan c'ul eb. Max lajwi tu' max wajlay aj ixim bijquiltakil maxto cani, lajcawebto motx ixim max wajnaj ajok.

²¹ Oyeb mil eb winak max lowi, tx'ok pax yel eb ix c'al eb unin.

Chi bey Jesús yiban a' mar

²² Max lajwi tu', cax max yalon Jesús bay eb is cuywom tol chi ajtok eb yul barco, cax chi babji k'axpoj eb, yak'ban chi yal toj ba Cham bay eb anima bulan ec' tu'.

²³ Max lajwi yalon toj ba bay eb anima tu xin, cax max toj bay jun tzalan txajlok. Ayxa ec' bay tu' tx'oklil cax max k'ekbi ayok.

²⁴ Axa eb cuywom xin, ayxa ec' eb nan a' yetok te barco tu'. Lananxa pitxloj te' yuj a', yujtol caw wal ow jay cak'ek' satak eb.

²⁵ Toxa chi sakbi, cax max apni oc Jesús yintak eb. Max bey Cham yiban a'.

²⁶ A yet max yilontok eb cuywom tu' bey Cham yiban a', max xiw eb yuj. Max el yaw eb yuj xiwilal, max yalon eb axca ti': —¡Toxc'a co lab jun ti'! ẍi eb.

²⁷ Axa yalon Cham bay eb tu': —Manchak ex oc il. Ayin Jesús in. Manchak ex xiwi, ẍi bay eb.

²⁸ Max yalon Pedro bay: —Mamin, ta yel ach, chek in bey yiban a', cax chin toj ayach tu', ẍi bay.

²⁹ —Sebach, ẍi bay Pedro tu'. Axa yaytek Pedro yul te barco tu', cax max beytoj bay Jesús yiban a'.

³⁰ Axa max yabeni caw ow cak'ek', max xiwajok. Max yabeni tol lananxa paxay laaok, max el yaw: —Mamin, col in, ẍi.

³¹ Ayman max oc mitx'naj Jesús yin k'ab, cax max yalon bay axca ti': —Ach ti' c'am wal chaoc a c'ul win. ¿Tzet xan max ak' cabc'ulal? ẍi bay.

³² Axa yet max octok eb yul te barco tu xin, max oc wanaj jun cak'ek' tu'.

³³ Max yion ay ba eb ayxac'alta' ajtok yul te barco tu' bay Jesús, cax max yalon eb bay: —Wal yel, ach ti' C'ajol ach Dios, ẍi eb bay.

Max jaycan c'ul eb ya'ay aj Genesaret

³⁴ Max k'axpoj ec' eb yiban a' xin, axa yec'apnok eb bay jun lugar chi yik Genesaret.

³⁵ A yet max yaben eb anima bay jun lugar tu' tol a Jesús, ayman max yak' eb yojtaknej el eb cajan bay masanil jun makbej tu', xan max yi jay eb masanil jantak is ya'ay bay Cham.

³⁶ Cax max k'anon eb mitx' jabok ti' pichil Cham, xan masanil eb max mitx'oni, max jayc'alcan c'ul eb.