Miqueas 5 - A Txꞌan Biblia Yin Kꞌanjobal 1989

Ok ak'lay junok Reyal conob Israel yuj Jehová

¹ Ex aj conob Sión, watx'nejek oc murallail e colbalba, yujtol max jayoc oyan eb ajc'ul e yin. Ok mak'tok eb sat cham yajawil Israel yetok c'ax.

² Chi yalon Jehová axca ti': A pax conob Belén Efrata, caxc'al yaliẍ xol conoblak yul yet Judá, palta a bay tu' ok tit jun yajaw ok waoc yin yajawilal yiban in conob Israel. Ok tit yin jun inatilej tol ayc'alta' yettax payxa, ayc'alta' yettax yichbanil, ẍi Cham.

³ Axa tinani' xin, ok bekcan Jehová is conob, masantac'al yet ok jay jun yune' ix ix lanan yechbanen jay tu'. Catatu' ok meltzoj eb israel ibilcantok preso bay tx'ok conobal, cax ok wajban ba eb yetok eb yet conob.

⁴ A cham Rey tu' ok aj wan taynen is conob yetok yipalil c'al yikbej Cham Jehová co Diosal, cax ok ayjok ec' eb yin junc'ulalil, yujtol a Cham Rey tu', miman ok yun yelapnok xol conob, masantac'al bay lajubal tx'otx' tx'otx'.

⁵ A wal caw Cham ok iontek junc'ulal. A wal yet ok jayoc eb asirio yul co nación ti', yuj yoc eb yulak co cuartel, ok co chektok ukwan eb yajaw, yetok waxakwan tol mimek yelapnok, yuj yak'on owal yin eb.

⁶ A eb tu' ok ak'on ayc'ay eb aj Asiria, a ton is nación Nimrod yetok espada. Ok on colchaj el yuj Cham bay eb asirio, a ton bay eb max k'axpoj ec'tek bay co mojon yin yion ec' eb co tx'otx' yaloni.

⁷ A yet tu', a conob Jacob maxto cani ok yitek watx'ilal xol xiwil conob, axca chi yun yak'on yaxilal yal ak'bal, ma nab yiban an ac'un. A Jehová ok ak'onok, cax manak bay eb anima ok titok.

⁸ Lajan wal ok yun pax is conob Jacob tu' nan xol xiwil nacionlak axca junok no coj ay xol no xolakilteal no', ma axca junok no coj chi oc xol junok bulan calnel. A yet chi oc no' xol no' tu', cax chi mitx'oni, chi coc' tzilnentok. C'amxa junok chi bekcan el yin yiquisal.

⁹ Axca wal tu' ok yun e yak'on ayc'ay eb ajc'ul oc e yin, c'al e yak'on lajwok ay eb, ex yinatil Jacob.

¹⁰ A wal caw Jehová chi alon axca ti' bay eb israel: A yet jun c'ual tu', ok in mak' cam no' e chej, cax ok wak'on lajwok ay e carruaje yet owal.

¹¹ Ok wak' lajwok ay e conobal, c'al e cuartel yin junelnej.

¹² Ok wak' lajwok el masanil eb ajbal e xol. C'amxa junok eb naom el k'anej ok wak' canok.

¹³ Ok wak' lajwok e comon dios, c'al ch'en ch'en yet e txajbal, yet watx' manxa ok ex oc ayilal bay juntzan e diosal max e watx'nej aj tu'.

¹⁴ Ok wocaj masanil te te' bay chex oc ayilal, cax ok wak'on lajwok ay e conobal yin junelnej.

¹⁵ Yetok wal yowal in c'ul cax ok in paktzen bay juntzan nacionlak tol c'am wal jabok max yikej ayin, ẍi Jehová.