Mc 9 - A Txꞌan Biblia Yin Kꞌanjobal 1989

¹ Max yalon c'apax Jesús bay eb axca ti': —Wal yel chi wal ayex, ay jaywan e xol mac ex ayex ec' ti', tol manto ok ex camok okto e yil yoccan Dios yin Yajawilal yetok yipalil, ẍi bay eb.

Max q'uexpoj yili Jesús

² Obxiixto yalon Jesús juntzan tu', max yiontok Pedro, yetok Jacobo c'al Juan bay jun miman tzalan. Asan eb max toj yetok. Max q'uexpoj yili Cham bay tu' satak eb.

³ Max tzekeki aj is pichil, saklubinakxac'al axca sakbat. C'am junok tx'ajwom yulyibank'inal ti' chi apni sakbanen pichilej axca wal yet tu'.

⁴ Axa max yilontek eb oxwan tu', ayic' Elías yetok Moisés, lanan k'anjab eb yetok Jesús.

⁵ Xan max yal Pedro bay Jesús: —Mamin Meẍtol, caw wal watx' jet yujtol ayon ec' cayti'. Tekan watx' chi co watx'nej oxebok lanchu, junok et, junok yet Moisés, yetok junok yet Elías, ẍi bay Cham.

⁶ Caw max xiw eb cuywom Jesús tu', xan man yojtakok Pedro tzet chi yala'.

⁷ Max lajwi tu xin, max ay boc'naj jun asun yiban eb, axa yeltek jay belan k'anej xol jun asun tu', max al-lay axca ti': A ton in C'ajol bay xiwil chi camel in c'ul ti'. Acbajek e txiquin bay, ẍi.

⁸ Axa max yilontek eb, c'amxa mac ayic'ok. Asanxanej Jesús ayic'ok.

⁹ A yet lanan bey eb yaytek bay jun tzalan tu', max yalon Cham bay eb: —Ayta mac bay che yalil jun tzet max e yil ti'. Ato yet ok in ictzoj aj xol eb camnak, ayin Chekbilintek yuj Dios xol eb jet animail ti', catatu' ok e yalon elok, ẍi bay eb.

¹⁰ Yuj tu' xan munilc'al ay jun k'anej ti' yul c'ul eb. C'am junok mactxel bay max yal eb. A yet max yalon tol ok ictzoj aj xol eb camnak tu', max c'oli naobtanen eb, tzet chi yal elapnok jun k'anej tu'.

¹¹ Max lajwi tu', max k'anlen el eb jun ti' bay: —A eb meẍtol yin ley Moisés chi yal eb axca ti': A Elías, yowalil ok babjok jay satak Cham Sic'bil el yuj Dios, ẍi eb. ¿Tzet yuj xan chi yal eb axca tu'? ẍi eb bay.

¹² Axa yalon Jesús bay eb tu' axca ti': —Yel toni, yowalil chi babji jay Elías tu', yuj watx'nen masanil. Palta ¿tzet ẍi tx'an Un Tz'ibbilcan win ayin Chekbilintek yuj Dios xol eb jet animail ti'? Chi yal yul tx'an tol ok wil yailal, cax ok in intaknelaycan el yuj anima.

¹³ Chi wal ayex, tol a Elías tu', ulnakxa ec'ok. Ay eb max yak' wal nabal yetnen axca wal chi yochej c'ul. Axca yal-laycan yin yul tx'an Un Tz'ibbilcanok, cayton wal tu' max yut eb, ẍi Jesús bay eb is cuywom tu'.

Max jaycan c'ul nak unin ayoc espíritu yob yin

¹⁴ A yet lanan yapni eb bay ayic' juntzanxa eb cuywom, max yilontok Jesús tol xiwil anima ayic' yetok eb. Axa eb meẍtol yin ley Moisés, lanan teyelen ba eb yetok eb cuywom Jesús.

¹⁵ A yet max yilontok masanil eb ayxa ec' tu' yapni Jesús, caw max c'ayaj c'ul eb, xan max yak' eb yanej toj chaoni.

¹⁶ A yet max apni oc eb c'atan Cham, max k'anlen el bay eb: —¿Tzet che teyelej e ba yin yetok eb? ẍi Cham bay eb.

¹⁷ Ay jun nak max tak'wi aj xol eb anima tu': —Mamin Meẍtol, max witek jun in c'ajol ayach. Ayoc espíritu yob yin, xan c'am chi je' k'anjabi.

¹⁸ Tzanc'al bay ayic' nak cax chi tita', chi telc'oj nak yuj. Chi eltek sukuwal ti' nak yuj, cax chi natx'atx'i ye nak. Caw lanan bakbi nak yuj. Max wal-lej bay eb chi ec'c'al cuywok entak, tol chi yican el eb yin nak, palta maj je' yuj eb, ẍi bay.

¹⁹ Axa yalon Jesús axca ti': —¡A… a wal ayex ti'! ¡Caw c'am che yaoc e c'ul yin Dios! ¡Mimanxa tiempoc'al wayji ec' e yetok! ¿bak'intoc'al ok nachaj el e yuj xin? Chi yab yail in c'ul e yuj. Iektek jun unin tu' ayin, ẍi.

²⁰ Axa bet yiontek bay tu'. A yet max yilon oc jun espíritu yob tu' tol a Jesús, max caktzaj yin jun unin tu'. Max telc'ojtok nak unin tu', max c'oli yec' telton nak yuj. Max eltek sukuwal ti' nak.

²¹ Axa k'anlen Jesús bay is mam jun unin tu': —¿Jantakxa tiempoal michchaj yuj? ẍi. Axa yalon nak mamej tu': —Yintax yaliẍal ayxa oc yin.

²² Xiwilxa el chi toj yiban k'ak' yuj, c'al yul a', chi yochej chi yak' camok. Palta ta chi je' oj, ok' a c'ul jin. Colwajan jetok, ẍi nak bay.

²³ —¿Tzet yuj xan chala' ta chi je' oj? cachi. Chi je', ta chaoc Dios yin a c'ul. A eb chi yaoc c'ul yin, masanilc'al tzet yetal chi je' yunen bay eb, ẍi bay nak.

²⁴ Axa yaj yaw is mam nak unin tu' yin ipejal: —Chi waoc yin in c'ul. Ocan wetok, cax chi ajc'al can waon oc yin in c'ul, ẍi nak.

²⁵ A yet max yilon Jesús tol xiwil wajon ba anima yin, axa tzuon jun espíritu yob tu'; —Ach espíritu yob, ak'om chacaycan anima c'al ak'om membok anima, chi wal ayach, elan yin jun unin ti'. C'amxa chach oc yin junelxa, ẍi Cham bay.

²⁶ Axa yel yaw jun espíritu yob tu'. Max caktzaj yin jun unin tu' junelxa. Catatu' bian, max el yin; palta jun unin tu xin, toxac'al max cancan jaban yuj. Yuj tu' xan xiwil eb max aloni tol max camxac'al nak.

²⁷ Palta axa Jesús max oc mitx'an yin is k'ab nak, max tok'on aj wan. Axa yaj wan nak tu'.

²⁸ Max lajwi tu xin, axa yoctok Jesús tx'oklil yetok eb is cuywom tu' yul na. Max k'anlen el eb bay: —¿Tzet yuj xan maj je' juj jion el jun espíritu yob tu'? ẍi eb bay.

²⁹ Axa yalon bay eb tu': —A jun makan espíritu yob ti', man comonok chi eli. Asan yuj txaj chi je' yel jun makan ti', ẍi Jesús bay eb.

Yin ayokto max yal Jesús yuj is camichal

³⁰ A yet max el eb bay tu', max ec' eb yulak yet Galilea. Max yochej Jesús tol c'am mac max aben yapni,

³¹ yujtol lanan cuywaj bay eb is cuywom, xan max yal bay eb axca ti': —Ayin ti', caxc'al Chekbilintek yuj Dios xol eb jet animail, palta ok in alay oc yul k'ab juntzan winak. Ok in yak' cam eb, palta a yet cabjial, ok in ictzoj ajok, ẍi bay eb.

³² Palta a eb xin, maj nachaj el yuj eb tzet chi yala'. Max xiw pax eb k'anlen el bay, tzet chi yal elapnok.

¿Mactet yel miman yelapnok?

³³ Max lajwi tu', max apni oc eb bay conob Capernaum. A yet ayxa ec' eb bay na max k'anlen bay eb: —¿Tzet che yalubtanej yulak be? ẍi.

³⁴ Palta tz'inc'al ẍi eb, yujtol a yet ayoc eb yul be tu', chi c'oli yalubtanen eb mactxel junok miman yelapnok xol eb.

³⁵ Xan max ay chotan Jesús. Max yawtentek eb lajcawanil c'atan, max yalon bay eb: —Ta ay junok e xol ti' chi yochej miman chi yun yelapnok, yowalil yaynakil chi yut ba e yintak e masanil. Yowalil chi oc e yak'omalok serbil e masanil, ẍi Jesús bay eb.

³⁶ Axa yiontek Jesús jun unin xol eb tu', max lacon ajok, axa yalon tu':

³⁷ —Tzanc'al mac wujc'al chi chaon junok unin axca jun ti', axca tol ayin chin is cha'. Man asannejok in chin is cha eb, chi cha' c'apax eb Cham cheknej intek, ẍi.

A mac man ajc'ulok oc jin, a jetok ayocok

³⁸ Axa yalon Juan bay Jesús axca ti': —Mamin Meẍtol, ay jun winak max jila', lanan yion el espíritu yob yin anima yin ach yak'on binajok. Palta max co tenchanej, yujtol man junnejok chi ec' jetok, ẍi bay.

³⁹ Max yalon Jesús: —Maj je' e tenon oc wanaj yunen nak, yujtol c'am junok mactxel chi xew yak'on junok milagro yetok wikbej, cax chi yalon pax in k'umal.

⁴⁰ Yujtol a eb man ajc'ulok oc jin, a jetok ayoc eb.

⁴¹ Tzanc'al mac chex colon eltek yalan e cawxinakil, yujtol wet ex ayin Cristo in ti', caxc'al a junok vaso siquila' chi ak'lay ayex, yowalil ok cha' paktzil.

A juntzan yetbeyom co mimanil chi on yetax el co nabal

^42-48 Ta ay mac chi ak'on etax el is nabal junok uninto chi yaoc c'ul win, caw ok'bal c'ul. Yel mi watx' chi pixlay oc t'unan junok miman ch'enal molino*fn* yin is nuk' babelal, cax chi k'oklaytok yul a' mar, yet watx' c'am chi yak' etax el nabal jun mactxel tu'. Ta a junok e k'ab chi ak'on etax el e nabal, watx' che tzoq'uil jun e k'ab tu', yet watx' c'am chi etax el e nabal yuj junelnej. Yujtol caxc'al junxanej e k'ab, palta ta ok e cha' k'inalej tol ayc'al yin tojbalk'inal, watx' e yet. Palta ta ok ex tojcan infierno xin, bay c'am is tanub k'ak' k'ak', caxc'al tz'akan masanil yetbeyom e mimanil, palta yobc'alta' e yet. Ta a junok e yakan chi ak'on etax el e nabal, yel mi watx' che tzoq'uil jun e yakan tu', yet watx' c'am chi etax el e nabal yuj junelnej. Yujtol caxc'al junxanej e yakan, palta ta ok e cha' k'inalej tol ayc'al yin tojbalk'inal, watx' e yet. Palta ta ok ex tojcan infierno xin, bay c'am is tanub k'ak' k'ak', caxc'al tz'akan masanil yetbeyom e mimanil, palta yobc'alta' e yet. Ta a junok e bak' sat chi ak'on etax el e nabal, yel mi watx' che yiiltek, yet watx' c'am chi etax el e nabal yuj junelnej. Yujtol caxc'al junxanej e bak' sat palta ta ok ex oc yul k'ab Dios, watx' e yet. Palta ta ok ex tojcan infierno xin, bay c'am is tanub k'ak', caxc'al tz'akan e bak' sat cabil, palta yobc'alta' e yet. A no patz chi chiontok eb tu', c'am chi camil no'. A k'ak'ej chi ak'on tz'a eb, c'am chi tani.*fn*

⁴⁹ Axca chi yun yoc yatz'amil junjun xajanbal, axca tu' ok yun yalay oc k'ak'al eb masanil.

⁵⁰ A atz'am atz'am, caw ay yopiso atz'am, palta k'inalok ta ay jabok atz'am chi c'ay is c'achial, ¿tzetto wal ok yun c'achibi aj junelxa? Axcaokab yoc yopiso atz'am atz'am tu xin, cayexokab tu'. Ayokab c'apax junc'ulal e xol, ẍi Jesús bay eb.