Malaquías 4 - A Txꞌan Biblia Yin Kꞌanjobal 1989

Ok jay c'ual yowal c'ul Jehová

¹ A Jehová, Cham Yajaw yin Masanil, chi alon axca ti': Lanan jayoc jun c'ual, yet ok c'aylay el masanil eb buchwajwom c'al eb yobtakwom yuj wowal, axca chi yun tz'atok an ch'im yul junok horno. C'amxa mactxel ok canok.

² Palta a pax ayex tol ay welapnok yul e sat ti', ok tx'oxaj ba jun Colwajwom tol caw wal ay yipalil ayex, axca tx'oxon aj ba c'u yet chi ajolok. A wal jun tu' ok ak'on tzalojc'ulal ayex junelxa. Toxac'al ok ex aj t'uklabok yuj tzalojc'ulal, axca no ach'ej wacax tolto chi eltek bay makan.

³ A yet jun c'ual tu', ayex ti' toxac'al ok e tec'tok eb yobtakwom, axca wal chi yun tec'lay ay tik'ak'il tan, caytu' ok e yut eb.

⁴ Naektek cuybanilej max wak' bay in chekbej Moisés, yet ayic' bay jolom witz Horeb. A juntzan ley c'al chekbanilej tu', moj wal tol che yikej e masanil ayex israel ex ti'.

⁵ Ilek wali, ok in chektok Elías in chekbej, yet c'amto chi apni oc jun c'ual yet ok txecloj aj yowal in c'ul; a wal jun c'ual tu', miman yayji ocok, ayxa is may ok yunej.

⁶ A Elías tu' ok aon oc eb mamej c'al eb uninalej yin junc'ulal. Ta c'amak, yowalil chin jay ul wak'on lajwok el e conob yin junelnej, ẍi Cham.